Read Timugon Murut IMAMAT 12 Bible Online

IMAMAT 12 - Timugon Murut bible

IMAMAT 12

¹Nanaak TUHAN ri Musa ra aturan ragitio

²ra tayar ru ulun ru Israil. Paat ra sangulun ruandu' maganak ra sangulun anak ungkuyon, majamol ruandu' no buoi tulu' ngoorou koson buoi io liuran.

³Paat ra orou kabalu', moonsoi sunatin anak no.

⁴Kopongo raginio, lakat poyo majamol ruandu' no buoi talu ngoopor ngoorou poyo sabap ra mampuraa'. Kalo makakambong io ra atan pana ondo' pakayon paat ra sambayang, kapoam mumpos ralalom Kim ru TUHAN ra kalo poyo makai' paat ru pamasawan nano.

⁵Paat ra sangulun ruandu' maganak ra sangulun anak ruandu', majamol ruandu' no buoi mopor am apat ngoorou koson buoi io liuran. Kopongo raginio, lakat poyo majamol ruandu' no buoi onom ngoopor am onom ngoorou poyo sabap ra mampuraa'.

⁶Paat ra mopongo pamasawan riso no, ondo' kia ra maganak ra anak ungkuyon kapoam anak ruandu', musiti' ruandu' no magibit sanginan anak domba ondo' makaumur sambilor ra imam tayar ra taak simbalui koson mapabansuk ra guang ru TUHAN, am sanginan susuit asang kapoam maningkuluuk tayar ra taak simbalui koson mangampun ra tula, giu' ra kulobon ru Kim ru TUHAN.

⁷Pataakon boo ru imam no taak ru ruandu' no ra TUHAN am mapaugar ra upacara koson mamuso ra jamol nano. Mopongo raginio bagu no mapasau ruandu' no. Gitio noyo ondo' musiti' baalon ru sasangulun ruandu' ra mopongo nakapaganak.

⁸Amon ru kalo makabali ruandu' no ra sanginan anak domba, musiti' io magibit ruo ngainan susuit asang kapoam susuit maningkuluuk, sanginan tayar ra taak simbalui koson mapabansuk ra guang ru TUHAN, am sanginan poyo tayar ra taak simbalui koson mangampun ra tula. Paugaron boo ru imam upacara mamuso ra jamol nano. Mopongo raginio bagu no mapasau ruandu' no.