Read Timugon Murut IMAMAT 14 Bible Online

IMAMAT 14 - Timugon Murut bible

IMAMAT 14

²aturan ragitilo intor ra upacara pamasawan ra sasangulun ondo' mapali' noyo intor ra maruol ru kungkung ondo' maaja'. Paat ra orou pinatanou ra ulun no mapasau, musiti' io ibiton ra imam.

³Imam pana mongoi giu' ra liwar ru pangkiman am ilain ulun no. Amon ru napali' noyo maruol no,

⁴manusub imam ra ulun magibit ruo ngainan susuit ondo' kalo majamol am ondo' biag, saputul tataun sidar, rondo' tali malia' am rondo' isop.

⁵Imam pana manusub ra ulun maa' raginio manimbalui ra sanginan ra susuit no giu' ra rasawat ru pagangan tana' ondo' suang no timug intor ra taur ru timug.

⁶Mangalap io ra susuit sanginan no poyo am pososopon no ralalom ru raraa' ru susuit ondo' sinimbalui no, mabaya' ra tataun sidar, tali malia' am isop no.

⁷Patakison ru imam raraa' no intulu' ra ulun ondo' kapasawon intor ra maruol ru kungkung ondo' maaja', am potonowon no ra mapasau ulun no. Palabuson boo ru imam susuit ondo' biag no giu' ra tana' malimparang.

⁸Ulun ondo' nakatanou noyo ra mapasau no musiti' mampupu' ra bayang nano, kaurin no ngaangai' abuk nano, am mariu'; am mapasau io boo. Makaumpos io ralalom ru pangkiman, kaa' musiti' io mayan ra liwar ru kim nano buoi katuluan.

⁹Paat orou ra katulu', musiti' igondo' poyo kaurin no abuk nano, jangut nano, am ngaangai' bulu ru kungkung ondo' soroi ra inan nano. Musiti' no pupuin bayang nano am mariu', am mapasau io boo.

¹⁰Paat orou ra kabalu', musiti' io magibit ruo ngainan anak domba gawayan am sanginan anak domba ruandu' umur no sambilor, ondo' ngaangai' no kalo najamaran, am niayuk talu ngakilo tapung ondo' naratok ra umau jaitun am niayuk sampitalu ngalito umau jaitun.

¹¹Magibit imam ra ulun no am ngaangai' taak no giu' ra kulobon ru Kim ru TUHAN.

¹²Mapataak boo imam no ra sanginan intor ra anak domba gawayan no am sampitalu ngalito umau jaitun no koson taak mambayar ra kalubatan. Mapataak io ra taak ti koson ra taak lilion ra TUHAN.

¹³Musiti' simbaluyon ru imam anak domba no giu' ra intok mapasau, intok ru ulun manimbalui ra bibiag tayar ru taak simbalui koson mangampun ra tula am taak simbalui koson mapabansuk ra guang ru TUHAN. Musiti' baalon gitio ru imam sabap taak simbalui koson mambayar ra kalubatan am niayuk taak simbalui koson mangampun ra tula no matulai kaga', am masauk ra imam tatangan.

¹⁴Mangalap imam ra sanganu raraa' ru anak domba no am pakupilon ra talingo pamiris, pangina' ru kalindu' ra pamiris, am ra pangina' ru kalayam ra pamiris ra ulun ondo' potonowon ra mapasau.

¹⁵Mangalap boo imam ra sanganu intor ra umau jaitun am lingigon ra palar ru kalindu' ra kait nano,

¹⁶am pososopon no boo bubua' ru kalindu' ra pamiris nano ra umau no am patakison no intulu' giu' ralalom Kim ru TUHAN.

¹⁷Musiti' imam mangalap ra sanganu umau ra palar ru kalindu' nano am sanganu intor ra raraa' ru anak domba, am pakupilon no ra talingo pamiris, pangina' ru kalindu' ra pamiris, am pangina' ru kalayam ra pamiris ra ulun ondo' potonowon ra mapasau.

¹⁸Paluiton boo ru imam suwo ru umau ra palar ru kalindu' nano ra ulu ru ulun no. Kon raginii noyo imam no ra mapaugar ra upacara pamasawan.

¹⁹Musiti' pataakon boo ru imam taak simbalui koson mangampun ra tula am mambaal ra upacara pamasawan. Mopongo raginio musiti' no simbaluyon bibiag tayar ru taak simbalui koson mapabansuk ra guang ru TUHAN,

²⁰am mapataak raginio mabaya' ra taak simbalui koson paringkuanangan ra TUHAN, giu' ra rasawat ru altar. Kon ragitio noyo imam mapaugar ra upacara pamasawan, am mapasau boo ulun no.

²¹Amon ru musikin ulun no am kalo makapanaak ra taak ondo' inaru', tayar ru pamasawan riso no makapapataak io ra sanginan ayuk anak domba gawayan tayar ru taak mambayar ra kalubatan, iono taak lilion ra TUHAN. Polosoon ulun no magibit ra sakilogram ayuk tapung moonsoi kaga' ondo' naratok ra umau jaitun, am sampitalu ngalito umau jaitun tayar ru taak paringkuanangan ra TUHAN.

²²Musiti' io niayuk magibit ruo ngainan susuit asang kapoam maningkuluuk, sanginan tayar ru taak simbalui koson mangampun ra tula am sanginan poyo tayar ru taak simbalui koson mapabansuk ra guang ru TUHAN.

²³Paat orou ra kabalu' paat pamasawan ra ulun no, musiti' io niayuk magibit ra ngaangai' taak no ra imam giu' ra kulobon ru Kim ru TUHAN.

²⁴Alapon ru imam anak domba no am umau jaitun no am mapataak raginilo koson taak lilion ra TUHAN, am tayar ragitilo masauk ra imam no tatangan.

²⁵Manimbalui io ra anak domba no am mangalap ra sanganu raraa' no, am pakupilon ginio ra talingo pamiris, pangina' ru kalindu' ra pamiris, am ra pangina' ru kalayam ra pamiris ru ulun no.

²⁶Lingigon ru imam sanganu ra umau no ra palar ru kalindu' ra kait nano galama',

²⁷am ra kalindu' pamiris nano patakison no umau no intulu' giu' ralalom Kim ru TUHAN.

²⁸Musiti' pakupilon ru imam sanganu umau no ra intok napakupilan no ra raraa' no: ra talingo pamiris ru ulun no, ra pangina' ru kalindu' ra pamiris nano, am ra pangina' ru kalayam ra pamiris nano.

²⁹Musiti' pakupilon ru imam suwo ru umau ra palar kalindu' nano ra ulu ru ulun no koson upacara pamasawan ra inan nano ra saang ru TUHAN.

³⁰Musiti' imam mapataak boo ra sanginan intor ra ruo ngainan susuit asang kapoam maningkuluuk no

³¹koson ra taak simbalui koson mangampun ra tula, am sanginan poyo tayar ru taak simbalui koson mapabansuk ra guang ru TUHAN, mabaya' ra taak simbalui koson paringkuanangan ra TUHAN. Kon ragitio noyo imam no nambaal ra upacara pamasawan ra ulun no giu' ra saang ru TUHAN.

³²Gitio noyo aturan ra ulun ondo' marualan ra kungkung ondo' maaja', kaa' kalo makabayar ra taak ondo' inaru' noyo tayar ru upacara pamasawan riso.

³³Nanaak TUHAN ri Musa am i Arun

³⁴ra aturan ragitilo intor ra baloi ondo' natiu' ra kulapuk ondo' gumaai. Aturan ragitilo musiti' gagayaan ru ngaangai' ulun ru Israil mopongo mumpos ralalom pagun Kanaan, ondo' taakin ru TUHAN risilo koson ra ilo tatangan. Osoi ondo' makapandai ra naparatong noyo TUHAN ra kulapuk giu' ralalom baloi nano, musiti' baal raginio pabalaan min ra imam.

³⁵

³⁶Manusub imam ra maa' raginio ngaangai' ondo' soroi ralalom ru baloi no paingkualon ra io kalo poyo magilong ra kulapuk no. Amon ru kalo, ngaangai' ondo' soroi ralalom baloi no potonowon ra majamol. Mopongo raginio mongoi imam no ra baloi no

³⁷am magilong ra kulapuk ra giu' no. Amon ru gumutitikan ra masansam-sansam kapoam malia'-lia' ondo' makito nakalabat ra rinding batu no,

³⁸musiti' io mingkual intor ra baloi no am pioton no buoi katuluan.

³⁹Paat orou ra katulu', sumaguli' imam mongoi pagilong ra kulapuk no. Amon ru gumaai kulapuk no,

⁴⁰musiti' io manusub maa' raginio batu-batu ondo' natiu' ra kulapuk no iruon am patirin giu' ra intok majamol ra liwar ru bandar.

⁴¹Mopongo raginio musiti' titikop rinding batu ru baloi no kauron, am nakaur no patirin giu' ra intok majamol ra liwar ru bandar.

⁴²Musiti' batu-batu ondo' baguon pakayon koson pamalit ra batu-batu ondo' pinatiran noyo. Musiti' titikop ru rinding batu no angkupin ra simin baguon.

⁴³Amon ru mujak saguli' kulapuk no ra ralalom ru baloi ra maaligan noyo batu-batu, am rinding batu no makauran noyo am maangkupan noyo saguli' ra simin,

⁴⁴musiti' imam mongoi poyo pagilong. Amon ru gumaai kulapuk no, majamol baloi no.

⁴⁵Musiti' lunsayon baloi no, am batu-batu, tataun no am ngaangai' angkup ru simin no musiti' ibiton ra liwar ru bandar, giu' ra intok majamol.

⁴⁶Osoi ondo' mumpos ralalom baloi no paat lakat poyo napiot, majamol io saboi mokotolop mato ru orou.

⁴⁷Osoi ondo' mombolong kapoam mangakan giu' ra ralalom baloi no, musiti' mampupu' ra bayang nano.

⁴⁸Kaa' makaratong imam mongoi pagilong ra baloi no, am sumugut ra pagilangan nano kolondo' boo kulapuk giu' ra ralalom baloi ondo' inangkupan saguli' no, musiti' potonowon ru imam ra baloi no mapasau sabap ngaangai' kulapuk nairu' noyo.

⁴⁹Koson mapapasau ra baloi no, musiti' imam no magibit ruo ngainan susuit, tataun sidar, rondo' tali am rondo' Isop.

⁵⁰Musiti' simbaluyon ru imam sanginan intor ra susuit no giu' rasawat ru pagangan tana' ondo' makasuang ra timug mapasau intor ra taur ru timug.

⁵¹Musiti' imam mangalap boo ra tataun sidar, Isop, tali malia', am susuit ondo' biag no, am pososopon no boo ngaangai' no ra raraa' ru susuit ondo' sinimbalui noyo am niayuk ra timug mapasau no; am musiti' no patakison intulu' ra baloi no.

⁵²Kon ragitio noyo imam no mapapasau ra baloi no ra raraa' ru susuit, timug mapasau, susuit ondo' biag, tataun sidar, Isop am tali malia' no.

⁵³Musiti' no palabuson boo susuit ondo' biag no giu' ra liwar ru bandar, giu' ra tana' malimparang. Kon ragitio noyo imam no nambaal ra upacara pamasawan ra baloi no, am mapasau boo baloi no.

⁵⁴Gitilo noyo aturan intor ra maruol ru kungkung ondo' maaja';

⁵⁵kagal, talipos kapoam lanit; am niayuk intor ra kulapuk ra bayang kapoam baloi.

⁵⁶

⁵⁷Aturan ragitilo mangaru' ru rorondo' kuliamos no majamol kia kapoam mapasau.