Read Timugon Murut IMAMAT 15 Bible Online

IMAMAT 15 - Timugon Murut bible

IMAMAT 15

¹Nanaak TUHAN ri Musa am i Arun ra aturan ragitilo

²ra tayar ru ulun ru Israil. Paat mingkual timug intor ra tingkuangon ru sasangulun ungkuyon sabap maruol mologo, majamol timug raginio,

³timug ondo' tumilis kapoam moorot, majamol ulun no.

⁴Majamol niayuk katil intok nanturungan am nambalangan ru ulun no.

⁵Osoi ayuk mangambong ra katil ru ungkuyon ondo' nangingkual ra timug no,

⁶kapoam manturung ra atan ayuk ondo' naturungan noyo ru ungkuyon no, musiti' mampupu' ra bayang nano am mariu', kaa' magulayun io majamol saboi tumolop mato ru orou.

⁷Osoi ayuk mangambong ra ungkuyon ondo' nangingkual ra timug, musiti' mampupu' ra bayang nano am mariu', am magulayun ulun no majamol saboi tumolop mato ru orou.

⁸Amon ru mantiwog ungkuyon ondo' nangingkual ra timug no ra sasangulun ondo' mapasau, musiti' ulun mapasau no mampupu' ra bayang nano am mariu', am magulayun io majamol saboi tumolop mato ru orou.

⁹Pelana kapoam atan ayuk turungin ru ungkuyon ondo' nangingkual ra timug no masauk ra majamol niayuk.

¹⁰Osoi ayuk mangambong ra atan ayuk ondo' naturungan noyo ru ungkuyon no, majamol io niayuk saboi tumolop mato ru orou. Osoi ayuk mangkayang ra atan ayuk ondo' naturungan noyo ru ulun no musiti' mampupu' ra bayang nano am niayuk mariu', am magulayun io majamol saboi tumolop mato ru orou.

¹¹Amon ru kumambong sangulun ungkuyon ondo' nangingkual ra timug no ra ulun bokon ra kalo poyo nambagu' ra kalindu' nano, musiti' ulun kinambong no mampupu' ra bayang nano am niayuk mariu', am magulayun io majamol saboi tumolop mato ru orou.

¹²Musiti' popolon moonong pagangan tana' ondo' kinambong ru ungkuyon ondo' nangingkual ra timug no, am moonong kuliamos intor ra tataun ondo' kinambong nano musiti' liungin.

¹³Kopongo ungkuyon no mapali', musiti' io maginaa io saboi katuluan, am mampupu' ra bayang nano am mariu' ra timug intor ra taur ru timug, am io pana mapasau.

¹⁴Paat orou ra kabalu', musiti' ungkuyon no magibit ruo ngainan susuit asang kapoam ruo ngainan susuit maningkuluuk giu' ra kulobon ru Kim ru TUHAN, am pataakon ngaangai' no ra imam.

¹⁵Mapataak imam ra sanginan intor ra susuit no koson taak simbalui koson mangampun ra tula am sanginan poyo koson ra taak simbalui koson mapabansuk ra guang ru TUHAN. Kon ragitio noyo imam mambaal ra upacara pamasawan tayar ru ulun no ra saang ru TUHAN.

¹⁶Paat mingkual uwa' intor ra sasangulun ungkuyon, musiti' io mariu', kaa' magulayun io majamol saboi tumolop mato ru orou.

¹⁷Atan ayuk ondo' binaal intor ra konoon kapoam kungkung ondo' natiu' ru uwa' no musiti' pupuin, am magulayun kuliamos no majamol saboi tumolop mato ru orou.

¹⁸Mopongo marulug, musiti' ungkuyon am poyo ruandu' mariu', am magulayun ilo majamol saboi tumolop mato ru orou.

¹⁹Paat sangulun ruandu' tatanga' liuran, majamol io buoi katuluan. Majamol osoi ayuk mangambong riso saboi tumolop mato ru orou.

²⁰Atan ayuk ondo' turungin kapoam kaalangin ru ruandu' no paat io liuran, kuliamos no pana majamol.

²¹Osoi ayuk mangambong ra katil ru ruandu' no kapoam atan ayuk ondo' naturungan no noyo, musiti' pupuin ru ulun bayang nano am niayuk mariu', am magulayun io majamol saboi tumolop mato ru orou.

²⁴Amon ru marulug sangulun ungkuyon ra ruandu' ondo' tatanga' liuran, najamalan ungkuyon no ra jamol ru ruandu' no, am ungkuyon no pana majamol buoi katuluan. Moonong intok pambalangan ru ungkuyon no majamol niayuk.

²⁵Amon ru kasarungan sangulun ruandu' buoi kukula' ngoorou ra sala' ka paat io liuran, kapoam amon ru raraa' mingkual no kalo poyo mataru' mopongo io liuran ra kaindalaman no, majamol io buoi ru raraa' no mingkual, koson paat io liuran.

²⁶Moonong intok kaalangan nano, kapoam atan ayuk ondo' turungin nano paat raginio pana majamol.

²⁷Majamol osoi ayuk ondo' mangambong ra kuliamos no am musiti' mampupu' ra bayang nano am mariu'; magulayun ulun no majamol saboi tumolop mato ru orou.

²⁸Mataru' kasarungan no, musiti' ruandu' no maginaa buoi katuluan, am io pana mapasau.

²⁹Paat orou ra kabalu', musiti' io magibit ra imam ruo ngainan susuit asang kapoam ruo ngainan susuit maningkuluuk giu' ra kulobon ru Kim ru TUHAN.

³⁰Mapataak imam no ra sanginan intor ra susuit no koson taak simbalui koson mangampun ra tula am sanginan poyo koson taak simbalui koson mapabansuk ra guang ru TUHAN. Kon ragitio noyo imam no mambaal ra upacara pamasawan ra ruandu' no.

³¹Ginio noyo nanusub TUHAN ri Musa mapakara' ra ulun ru Israil maa' raginio mangkaili ra paat ilo majamol, maa' raginio kalo mapajamol ilo ra Kim ru TUHAN giu' ra tatanga' nilo. Amon ru jamalin nilo Kim ru TUHAN no, matoi ilo.

³²Ginio noyo aturan intor ra ulun nangingkual ra timug sabap ra maruol mologo, am intor ra ungkuyon ondo' nangingkual ra uwa', am intor ra ruandu' ondo' tatanga' liuran, am intor ra ungkuyon marulug ra ruandu' ondo' majamol.