Read Timugon Murut IMAMAT 17 Bible Online

IMAMAT 17 - Timugon Murut bible

IMAMAT 17

¹Nanusub TUHAN ri Musa

²maa' raginio manaak ri Arun am anak-anak nano ra aturan ragitilo, am ra ngaangai' ulun ru Israil.

³Paat sangulun Israil no mapataak ra TUHAN ra sapi', domba kapoam kambing, musiti' simbaluyon bibiag no giu' ra saang ru kulobon ru Kim ru TUHAN. Amon ru manimbalui io ra bibiag no giu' ra intok ra bokon, manggal io noyo ra ukum. Napasasar io noyo ra raraa' am kalo boo karaan ra ulun ri Aki Kapuuno'.

⁵Susuban ragitio makaarati' ra intor paat raginio, musiti' ulun ru Israil magibit ra ngaangai' bibiag ondo' masaga' pataakon giu' Kim ru TUHAN; ragili kaindalaman no simbaluyon bibiag no giu' ra tana' malimparang. Musiti' ulun ru Israil magibit ra bibiag no ra imam giu' ra saang ru Kim ru TUHAN, am simbaluyon ginio ra giu' no tayar ru taak simbalui koson makibarakat ra TUHAN.

⁶Musiti' pawason ru imam raraa' ru bibiag no ra sapapa'-sapapa' ru altar giu' ra saang ru kulobon ru Kim, am monolob ra lomok ru bibiag no maa' raginio owou no mapabansuk ra guang ru TUHAN.

⁷Musiti' ulun ru Israil magulayun gumagaya' ra TUHAN, am kalo manimbalui ra bibiag nilo giu' ra tana' malimparang ra tayar ru taak ra riwato-riwato ondo' sumalu ra kambing. Musiti' aturan ragitio gagayaan ru ulun ru Israil ra sabuoi-buoi no.

⁸Paat sangulun Israil kapoam sangulun bansa' ru bokon ondo' minayan ra popolos ru ulun ru Israil mapataak ra taak simbalui koson mapabansuk ra guang ru TUHAN, kapoam taak simbalui ra bokon

⁹ra TUHAN, musiti' io mapataak raginio giu' ra saang ru kulobon ru Kim ru TUHAN. Amon ru mapataak io raginio giu' ra intok ra bokon, kalo boo karaan io ra ulun ri Aki Kapuuno'.

¹⁰Amon ru ulun ru Israil kapoam ulun bansa' ru bokon ondo' minayan risilo mangakan ra raraa', ulun no anggalon ru TUHAN, am kalo boo karaan io ra ulun Nano.

¹¹Painawo ru moonong ondo' maayag soroi ra ralalom ru raraa' nano. Ginio sabap ra nanaak TUHAN ra susuban maa' raginio ngaangai' raraa' pasasaron ra rasawat ru altar tayar mamuso ra tula ru ulun. Raraa', iono painawo, mamuso ra tula.

¹²Ginio sabap ra manginggalar TUHAN ra ulun ru Israil am ulun bansa' ru bokon ondo' minayan risilo mangakan ra raraa'.

¹³Ulun ru Israil kapoam bansa' ru bokon ondo' minayan risilo, ondo' mamparakop ra sanginan bibiag kapoam susuit ra mapasau, musiti' mapasasar ra raraa' ru bibiag no ra tana' am taubin raraa' no ra tana'.

¹⁴Painawo ru moonong ondo' maayag soroi ra ralalom ru raraa' nano. Ginio sabap ra nambala' TUHAN ra ulun ru Israil ra kalo makaakan ilo ra raraa' ru atan pana ondo' maayag. Osoi ondo' mangakan ra raraa' kalo boo karaan ra ulun ri Aki Kapuuno'.

¹⁵Osoi ayuk, ulun ru Israil kapoam ulun bansa' ru bokon, ondo' mangakan ra raraa' ru bibiag ondo' minatoi noyo, ondo' minatoi toojo kapoam ondo' sinaam ru bibiag masigo, musiti' mampupu' ra bayang nano am niayuk mariu', am maginaa saboi tumolop mato ru orou, am io pana mapasau saguli'.

¹⁶Amon ru kalo pupuin no bayang nano am kalo mariu', musiti' io mansaan ra sonor no.