Read Timugon Murut IMAMAT 19 Bible Online

IMAMAT 19 - Timugon Murut bible

IMAMAT 19

¹Nanusub TUHAN ri Musa

²mambala' ra ulun ru Israil, “Musiti' kau matulai sabap ra matulai Aku TUHAN i Aki Kapuuno' min.

³Musiti' moonong ulun mangurumat ra ama' am ina' nano, am niayuk mangiantak ra orou Sabat koson ra nanusuban Kuno. Aku noyo TUHAN i Aki Kapuuno' min.

⁴“Pai' samba ra sinungkalalaing. Pai' pambaal ra sinungkalalaing intor ra logam am pai' samba raginio. Aku noyo TUHAN i Aki Kapuuno' min.

⁵“Paat ra akau manimbalui ra bibiag tayar ru taak simbalui koson makibarakat ra TUHAN, gagayaa' noyo aturan ondo' tinaakan Kuno ramuyun, maa' raginio mangapu Aku ra taak mino.

⁶Musiti' kual no akanon paat ra orou ru bibiag no simbaluyon kapoam paat ra orou suabon no. Kual ondo' soroi ra paat ra orou katalu no musiti' solobon,

⁷sabap ra kual no kalo mapasau. Amon ru osoi mangakan raginio, kalo mangapu Aku ra taak no.

⁸Makasala osoi mangakan raginio, sabap ra binaal nano ra atan ondo' pinataak noyo Raki' no ra akanon toojo ayuk; kalo boo karaan ulun no ra ulun Kuno.

⁹“Paat ra akau mangkumos ra ampos ru tinanom, pai' kumoso' ampos ru tinanom ondo' timinuu' giu' ra kiing ru umo. Pai' ruli' ra umo koson mangkumos ra ampos ru tinanom ondo' matatang ra mopongo mangkumos.

¹⁰Pai' timungo' kawa' ru anggur ondo' matatang ra mopongo akau mangupu' ra kasaa'; pai' anamo' kawa' ru anggur ondo' maratu'. Tatango' ginilo ngaangai' ra ulun musikin am ulun bansa' ru bokon. Aku noyo TUHAN i Aki Kapuuno' min.

¹¹“Pai' pantakou ra atan pana; pai' pamparuung ra osoi pana; pai' pagabau.

¹²“Pai' pabantu' ralalom inggalan Kuno amon ru makaguang kau kalo manugut ra bantu' no. Baal raginio magasab ra inggalan Kuno. Aku noyo TUHAN i Aki Kapuuno' min.

¹³“Pai' pamparuung ra ulun, am pai' takawi' osoi pana. Pai' ingai' pambayar muno ra ulun ondo' nangandoi noyo rirun, pai' ingai' gaji' nano kabalu' ra sorondom pana.

¹⁴Pai' ulaso' ulun barat, am pai' pabantaa' batu kasaruan ra saang ru ulun bolou saboi maratu' io. Musiti' kau malaa' Raki'; Aku noyo TUHAN i Aki Kapuuno' min.

¹⁵“Pai' jajajou paat ra akau mambisara' ra baalon ru ulun. Pai' pansalaa', ondo' kia ra ulun musikin kapoam langkaya'.

¹⁶Pai' potonowo' ragu sinimbaal intor ra ulun bokon. Paat ra bisaraan sasangulun no, pai' pangani' ra inono' magabau ondo' mangkinibit ra ulun no ukumin ra matoi. Aku noyo TUHAN.

¹⁷“Pai' kalikokot ra osoi pana. Salasayo' noyo pansangaran muno riso, maa' raginio kolondo' tula muno sabap ra ulun no.[10]

¹⁸Pai' balos malikokot ra osoi pana, kapoam mararayus masisang ra ulun. Tagami' noyo ulun ra bokon koson okou mitotogom galama'. Aku noyo TUHAN.

¹⁹“Gagaya' no ra susuban Kuno. Pai' pampaano' ruo salinut bibiag ondo' kalo nogondo'. Pai' panias ra ruo salinut ru sampug giu' ra rondo' umo. Pai' pambayang ra bayang ondo' binaal intor ra ruo salinut ru banang.

²⁰“Amon ru sangulun ulipon ruandu' binantuan ra sangulun ungkuyon koson saukon ra parulug nano, kaa' kalo poyo nabayaran ruandu' no, am amon ru sangulun ungkuyon ra bokon narulug ra ulipon ruandu' no, musiti' ilo ruo ukumin,[11] kaa' kalo ukumin ra potoyon sabap ra ruandu' no lakat poyo inulipon.

²¹Musiti' ungkuyon no magibit ra sanginan domba gawayan giu' ra kulobon ru Kim ru TUHAN koson ra taak simbalui koson mambayar ra kalubatan.

²²Mapataak imam ra domba no ralalom upacara pamasawan koson mamuso ra tula ru ulun no, am mangampun i Aki Kapuuno' riso.

²³“Paat ra akau mumpos ra pagun ru Kanaan am mantanom ra puun ru kinawa' salinut ru atan pana, karaan noyo ra kinawa' ru puun no majamol buoi talu ngambilor ra kasaa', am kalo maakan min ginio.

²⁴Paat ra bilor kaapat, musiti' ngaangai' kawa' no patimpokon koson ra taak mambala' ra paringkuanangan min Raki',[12] TUHAN.

²⁵Paat ra bilor kalimo, am maakan min boo kawa' ru puun no. Amon ru mambaal kau koon raginio, puun ru kinawa' mino mangkawa' ra masuang poyo. Aku noyo TUHAN i Aki Kapuuno' min.

²⁶“Pai' akano' kual ondo' lakat poyo makararaa'. Pai' pambaal ra atan pana ilimu' sihir.

²⁷Pai' lomporo' abuk ra pusisingo muno kapoam lomporon jangut muno.

²⁸Pai' baliso' kungkung muno, kapoam pilato' inan muno koson ra tatandu' mangulir ra ulun matoi. Aku noyo TUHAN.

²⁹“Pai' tauyuo' anak ruandu' muno ra mapasauk risilo ra ruandu' mantalan ra inan giu' ra kuil.[13] Amon ru mambaal kau raginio, majamol pagun mino am lumanja' baal makauyuyu' ra giu' no.

³⁰Iantakon orou Sabat am urumaton intok sumamba Raki'. Aku noyo TUHAN.

³¹“Pai' ongoi pakibilin intor ra ulun ondo' mapandai makimansunur ra ambiluo ru ulun namagatoi. Amon ru mambaal kau raginio, majamol kau. Aku noyo TUHAN i Aki Kapuuno' min.

³²“Panangguang noyo am urumato' noyo ulun ondo' matutuo noyo. Musiti' kau mangurumat am malaa' Raki', sabap ra Aku noyo TUHAN.

³³“Pai' kapuka' ra ulun bansa' ru bokon ondo' minayan ra pagun mino.

³⁴Koonsoi kano risilo koson akau moonsoi ra ulun mino galama', am tagami' ilo koson akau mitotogom galama'. Karaa' ra nakaili' kau nagayan koson ra ulun bansa' ru bokon giu' ra pagun ru Misir. Aku noyo TUHAN i Aki Kapuuno' min.

³⁵“Pai' pamparuung ra osoi pana ra mampakai ra tukuan, timbangan kapoam panuku' ra kalo motopot.

³⁶Pakayo' noyo batu timbangan, timbangan am tukuan ondo' motopot. Aku noyo TUHAN i Aki Kapuuno' min; nagibit Aku ramuyun miningkual intor ra pagun ru Misir.

³⁷Gagaya' no ra ukum am susuban Kuno; Aku noyo TUHAN.”