Read Timugon Murut IMAMAT 2 Bible Online

IMAMAT 2 - Timugon Murut bible

IMAMAT 2

¹Paat ra sasangulun no mapataak ra taak simbalui koson paringkuanangan ra TUHAN,[2] taak simbalui no musiti' intor ra tapung moonsoi kaga', ondo' uasin ra umau jaitun am tinaukan ra kaminyan rasawat no.

²Ulun no musiti' magibit ra taak nano ra imam-imam papag ri Arun. Imam ondo' mapataak ra taak simbalui no musiti' mangalap ra sogonggom tapung am niayuk umau no am ngaangai' kaminyan no, am solobon ngaangai' no ra rasawat ru altar koson tatandu' ra kasalingai' no pinataak noyo ra TUHAN. Owou ru taak ra akanon no mapabansuk ra guang ru TUHAN.

³Suwo ru taak simbalui koson paringkuanangan ra TUHAN no iono longgom ru imam-imam. Taak ti matulai kaga' sabap ra inalap intor ra akanon ondo' pinataak noyo ra TUHAN.

⁴Amon ru taak no ruti' ondo' inansak ralalom ru oven, kalo latakin ruti' no ra ragi. Kakapalon pana ruti' no, baalon intor ra tapung moonsoi kaga' ondo' latakin ra umau jaitun, am kalilison pana ruti' no, ondo' luitin ra umau jaitun.

⁵Amon ru taak no ruti' ondo' inandab ra intok panguuban, musiti' baalon intor ra tapung moonsoi kaga' ondo' latakin ra umau jaitun kaa' kalo latakin ra ragi.

⁶Ruti' no musiti' lalapakon am uasin ra umau jaitun paat ra pataakon.

⁷Amon ru taak no ruti' ondo' ansakon ralalom paliuk, musiti' baalon ruti' no intor ra tapung moonsoi kaga' am umau jaitun.

⁸Ruti' ondo' binaal koson ragitio musiti' pataakon ra TUHAN, am pataakon ra imam ondo' magibit raginio ra altar.

⁹Mangalap imam no ra santayaran ra ruti' no, am solobon no ra rasawat ru altar koson tatandu' ra pinataak noyo ngaangai' no ra TUHAN. Owou ru taak ra akanon no mapabansuk ra guang ru TUHAN.

¹⁰Suwo ru taak simbalui no longgom ru imam-imam. Taak ti matulai kaga' sabap ra inalap intor ra akanon ondo' pinataak noyo ra TUHAN.

¹¹Taak simbalui koson ra paringkuanangan ondo' pataakon ra TUHAN kalo latakin ra ragi. Pai' noyo lataki' ra ragi kapoam ruu' maningot ralalom ru akanon ondo' pataakon ra TUHAN.

¹²Ampos ru tinanom ondo' kumoson galing mino ra moonong bilor musiti' pataakon ra TUHAN, kaa' taak no kalo solobon ra rasawat ru altar.

¹³Taukin ra usi' moonong taak simbalui koson paringkuanangan ra TUHAN, sabap usi' tatandu' ru nabantuan min am i Aki Kapuuno'. Taukin ngaangai' taak mino ra usi'.

¹⁴Paat ra ampos ru tinanom galing ondo' kumoson mino pataakon ra TUHAN, pataakon unor baguon ondo' sininggala' kapoam ondo' inumok noyo kaga'.

¹⁵Unor-unor no musiti' uasin ra umau jaitun am taukin ra kaminyan.

¹⁶Solobon ru imam santayaran ra tapung am umau jaitun, am niayuk ngaangai' kaminyan no, koson tatandu' ra ngaangai' no pinataak noyo koson taak ra akanon ra TUHAN.