Read Timugon Murut IMAMAT 20 Bible Online

IMAMAT 20 - Timugon Murut bible

IMAMAT 20

¹Nanusub TUHAN ri Musa

²mambala' ra ulun ru Israil, “Osoi ayuk ra popolos mino, kapoam ulun bansa' ru bokon ra popolos mino, ondo' mapataak ra anak nano koson ra taak simbalui ra Dewa Molok, musiti' bobolon saboi matoi ru ngaangai' mamagun.

³Osoi ayuk mapataak ra sangulun intor ra anak nano ra Dewa Molok, mapajamol ra Kim Kuno am magasab ra inggalan Kuno ondo' matulai. Mangukum Aku riso am kalo boo karaan io ra ulun Kuno.

⁴Kaa' amon ru siliin ru mamagun mato ra baalon ru ulun no, am kalo mangukum ra ulun no ra matoi,

⁵am Aku galama' boo mangukum riso am ngaangai' sasambaloi nano, am niayuk ngaangai' ulun ondo' mababaya' riso mangiruan Raki' am sumamba ra Dewa Molok. Kalo boo mangkara' Aku risilo ra ulun Kuno.

⁶“Osoi ayuk mongoi pakibilin intor ra ulun ondo' mapandai makimansunur ra ambiluo ru ulun namagatoi, ukumin Ku am kalo boo mangkara' Aku ra ulun Kuno.

⁷Ilai' min maa' raginio magulayun kau matulai, sabap ra Aku noyo TUHAN i Aki Kapuuno' min.

⁸Gagaya' no ra ukum Kuno, sabap ra Aku noyo TUHAN ondo' nampatulai ramuyun Raki'.”

⁹Nanaak TUHAN ra aturan ragitilo, “Osoi magulas ra ama' nano kapoam ina' nano musiti' ukumin ra matoi. Matoi ulun no sabap ra kasalaan nano galama'.

¹⁰“Amon ru sangulun Israil mansawa' ra andu' ru ulun rondo' bansa' riso no, musiti' ulun no am ruandu' no ukumin ra matoi.

¹¹Sangulun ondo' narulug ra sangulun intor ra andu' ru ama' nano, magasab ra ama' nano; musiti' io am ruandu' no ukumin ra matoi. Matoi ilo sabap ra kasalaan nilo galama'.

¹²Amon ru sangulun ungkuyon marulug ra anak mangiwan ra ruandu' nano, musiti' ilo ruo ukumin ra matoi. Nambaal ilo noyo ra baal makauyuyu', am matoi ilo sabap ra kasalaan nilo galama'.

¹³Amon ru sangulun ungkuyon marulug ra ungkuyon ra bokon, nambaal ilo ra baal makauyuyu'. Musiti' ilo ruo no ukumin ra matoi; matoi ilo sabap ra kasalaan nilo galama'.

¹⁴Amon ru sangulun ungkuyon maguot ra sangulun ruandu' am ina' ru ruandu' no niayuk, musiti' ilo tatalu no solobon saboi matoi, sabap ra binaal nilono makauyuyu'. Binaal koson raginio kalo iowon ra popolos mino.

¹⁵Amon ru sangulun ungkuyon marulug ra sanginan bibiag, musiti' io am bibiag no ukumin ra matoi.

¹⁶Amon ru sangulun ruandu' kuminam marulug ra sanginan bibiag, musiti' ruandu' no am bibiag no ukumin ra matoi. Matoi karuruo no sabap ra kasalaan galama'.

¹⁷“Amon ru sangulun ungkuyon maguot ra pabukat ruandu' nano, ondo' kia pabukat ra rondo' ina' rondo' ama' kapoam pabukat ra pansukapu ondo' rondo' ama' suai ina' kapoam rondo' ina' suai ama', musiti' ilo karuruo no tauyuon ra saang ru ulun masuang am kalo boo karaan ra ulun ru Israil. Narulug noyo ungkuyon no ra pabukat ruandu' nano am musiti' magantung ra kinibit no.

¹⁸Amon ru sangulun ungkuyon marulug ra sangulun ruandu' ondo' tatanga' liuran, karuruo no kalo boo karaan ra ulun Kuno.

¹⁹“Amon ru sangulun ungkuyon marulug ra kaminan nano, musiti' ilo ruo magantung ra kinibit no; baal raginio makauyuyu'.

²⁰Amon ru sangulun ungkuyon marulug ra andu' ru kamaman nano, magasab io ra kamaman nano. Musiti' ungkuyon am ruandu' no magantung ra ukuman nilo galama'; ilo ruo kalo makaalap ra anak.

²¹Amon ru sangulun ungkuyon mamundus ra andu' ru maayo ungkuyon nano, matoi ilo ruo ra kolondo' anak. Nambaal noyo ungkuyon no ra baal makauyuyu', am magasab io ra maayo ungkuyon nano.”

²²Indagu TUHAN, “Gagaya' no ra ngaangai' ukum am susuban Kuno, maa' raginio kalo pagiruon kau intor ra pagun ru Kanaan, intok pagibitan Kuno ramuyun ra raino ti.

²³Pai' tilu ra kaulayan ru bansa' ondo' namagun ra giu' no. Pagiruon Ku ilo maa' raginio makaumpos kau ra pagun no. Napajala' ilo Raki' sabap ra binaal nilo ondo' makauyuyu'.

²⁴Kaa' binantu' Ku noyo ra manaak ramuyun ra pagun ondo' langkaya' am malabung no. Masauk pagun no longgom min. Aku noyo TUHAN i Aki Kapuuno' min ondo' napatuliar ramuyun intor ra bansa'-bansa' ra bokon.

²⁵Ginio ra musiti' kau mapandai mapasuai ra bibiag am susuit ondo' maakan am bibiag am susuit ondo' kalo maakan. Pai' akano' bibiag kapoam susuit ondo' kalo maakan. Nambala' Aku noyo ra ngaangai' no majamol. Amon ru mangakan kau, majamol kau niayuk.

²⁶Musiti' kau matulai am masauk ra longgom Kuno ayuk, sabap ra Aku noyo TUHAN am matulai Aku. Napatuliar Aku noyo ramuyun intor ra bansa'-bansa' ra bokon, maa' raginio masauk kau ra longgom Kuno ayuk.

²⁷Moonong ungkuyon kapoam ruandu' ondo' mapandai makimansunur ra ambiluo ru ulun namagatoi, musiti' bobolon saboi matoi. Ulun ondo' mambaal ragitio matoi sabap ra kasalaan galama'.”