Read Timugon Murut IMAMAT 21 Bible Online

IMAMAT 21 - Timugon Murut bible

IMAMAT 21

¹Nanusub TUHAN ri Musa mapasaboi ra susuban ti ra imam-imam papag ri Arun, “Sangulun imam kalo mijamol ra inan ra maya' ra upacara pampalabangan ra pabukat nano,

²ondo' ak am ulun matoi no ina' nano, ama' nano, anak ungkuyon nano, anak ruandu' nano, pabukat ungkuyon nano,

³kapoam pabukat ruandu' nano ondo' kalo poyo inuot am minayan rondo' baloi riso.

⁴Kalo mijamol io ra inan ra maya' ra upacara pampalabangan ra pabukat ru andu' nano.

⁵“Kalo iowon sangulun imam mangaur ra ati pana tayar ra ulu nano, kapoam mopolompor ra jangut nano, kapoam mamilat ra inan nano koson mapakito ra mangulir io.

⁶Musiti' sangulun imam matulai am kalo iowon magasab ra inggalan Kuno. Mapataak io Raki' ra taak akanon, sabap raginio musiti' io no matulai.

⁷Sangulun imam kalo iowon maguot ra ruandu' mantalan ra inan, kapoam ruandu' ondo' kalo boo ralaa, kapoam ruandu' ra inali noyo, sabap ra patimpokon noyo imam Raki'.

⁸Musiti' ulun ru Israil mangakun ra imam koson ulun pinatimpok Raki' sabap ra mapataak imam Raki' ra taak akanon. Aku noyo TUHAN; Aku ti matulai am mapatulai Aku ra ulun Kuno.

⁹Amon ru anak ruandu' ru sangulun imam masauk ra ruandu' mantalan ra inan, magasab io ra ama' nano; musiti' ruandu' no solobon saboi matoi.

¹⁰“Patimpokon noyo Tingganai Maayo Imam ra pinasasar umau upacara ra ulu nano, am pinambayang io ra bayang ru tingganai maayo imam. Ginio ra kalo polosoon no abuk nano masasung, kapoam mamparilak ra bayang nano koson mapakito ra mangulir io.

¹¹Pinatimpok io noyo Raki', ginio ra kalo mijamol io ra inan. Kalo pairuanin riso Kim Kuno am mumpos ra baloi ru mokoondo' ra baangkai, kabalu' pana baangkai no ama' kapoam ina' nano galama'. Mapajamol binaal nano ra Kim Kuno.

¹³Musiti' maguot Tingganai Maayo Imam ra sangulun ruandu' ondo' lakat poyo ralaa.

¹⁴Kalo paguoton io ra sangulun napuor, kapoam ruandu' ondo' inali noyo, kapoam ruandu' ondo' ragili mantalan ra inan. Paguoton io ayuk ra sangulun ruandu' ondo' lakat poyo ralaa intor ra bansa' nano galama'.

¹⁵Amon ru manggal io ra aturan raginio, anak-anak nano ondo' sotopot no matulai, masauk majamol. Aku noyo TUHAN am patimpokon Ku noyo io ra Tingganai Maayo Imam.”

¹⁶Nanusub TUHAN ri Musa

¹⁷mapasaboi ra baal ragitio ri Arun, “Osoi ayuk intor ra papag muno ondo' kalo matanda' batang ru inan, kalo makapapataak ulun no Raki' ra taak akanon. Aturan ragitio masauk ra sabuoi-buoi no.

¹⁸Ulun kalo matanda' batang ru inan koson ragitio kalo makapapataak ra taak simbalui: ulun bolou, ulun kimpo', ulun makapipilat bulos kapoam makaruruko inan nano;

¹⁹ulun nongkokoi kalindu' kapoam kimpo' kalayam nano;

²⁰ulun ondo' bakuung kapoam taguguo'; ulun makamaruol ra mato kapoam makamaruol ra kungkung, am ulun ondo' inintalian.

²¹Moonong papag ru imam Arun ondo' mokoondo' kalo matanda' ra batang ru inan nano, kalo makapapataak Raki' ra taak akanon.

²²Kaa' ulun raginilo makaakan ra akanon ondo' nakataak noyo Raki', ondo' kia' taak akanon ondo' mapasau, am niayuk taak akanon ondo' mapasau kaga'.

²³Kaa' sabap ra kalo matanda' batang ru inan nano, kalo makainggaar io ra tabir ondo' mapatuliar ra Lamin Matulai kapoam matong ra altar. Kalo majamalan no kuliamos ondo' patimpokon noyo Raki', sabap ra Aku noyo TUHAN am Aku noyo nampalili' ra kuliamos no Raki' ayuk.”

²⁴Ginilo noyo aturan ondo' pinasaboi ri Musa ri Arun, anak-anak ri Arun no am ngaangai' ulun ru Israil.