Read Timugon Murut IMAMAT 22 Bible Online

IMAMAT 22 - Timugon Murut bible

IMAMAT 22

¹Nanusub TUHAN ri Musa

²koson mapasaboi ra susuban ti ri Arun am anak-anak nano, “Baalo' min ra matanda' taak-taak simbalui ondo' pataakon ru ulun ru Israil palilion Raki' ayuk, maa' raginio kalo magasab kau ra inggalan Kuno ondo' matulai. Aku noyo TUHAN.

³Osoi ayuk intor ra papag mino, ondo' mapaat ra majamol, minggaar ra taak-taak simbalui ondo' pataakon ru ulun ru Israil palilion ayuk Raki', kalo boo pongondoyon io giu' ra altar. Aturan ragitio masauk ra sabuoi-buoi no. Aku noyo TUHAN.

⁴“Osoi ayuk intor ra papag ri Arun ondo' makamaruol ra kungkung ondo' maaja', kapoam makamaruol ra mologo saboi mingkual timug, kalo paakanon io ra atan pana intor ra taak simbalui ondo' palilion ayuk no, ra io kalo poyo potonowon ra mapasau. Sasangulun imam no majamol amon ru mangambong io ra ondo' majamol sabap ra natiu' ra baangkai, kapoam imam no mangingkual ra uwa',

⁵kapoam nangambong io ra bibiag ondo' majamol kapoam ulun ondo' majamol.

⁶Imam ondo' majamol ra atan pana baal no, magulayun majamol saboi ra tumolop mato ru orou. Kalo makaakan io ra taak simbalui ondo' palilion ayuk no ra io kalo poyo makapariu'.

⁷Mokotolop mato ru orou bagu no mapasau io, am makaakan io ra taak simbalui ondo' palilion ayuk no sabap ra ginio noyo akanon nano.

⁸Kalo makaakan io ra kual ru atan pana salinut ru bibiag ondo' matoi ayuk toojo, kapoam ondo' sinaam ru bibiag masigo. Binaal raginio mapajamol riso. Aku noyo TUHAN.

⁹“Musiti' ngaangai' imam gumagaya' ra aturan raginilo ondo' tinaakan Kuno. Amon ru kalo, makasala ilo am matoi sabap ra manggal ra aturan ra mangapasau no. Aku noyo TUHAN am Aku noyo napapasau risilo.

¹⁰“Ulun intor ra sasambaloi ru imam no ayuk ondo' makaakan intor ra taak simbalui ondo' palilion ayuk no. Ulun ra bokon kalo makaakan raginio, kabalu' pana mayan ulun no masimpung ra imam, kapoam ulun no mangngandoi ra imam.

¹¹Kaa' ulipon ondo' binali ra ruit ru imam galama', kapoam ondo' inanak ralalom baloi ru imam, makaakan ra akanon ondo' apuon ru imam.

¹²Anak ruandu' ru imam ondo' nangindalaki ra sangulun ondo' sala' ka imam, kalo makaakan ra akanon taak simbalui ra palilion ayuk no.

¹³Kaa' anak ruandu' ru imam ondo' napuor noyo, kapoam ondo' inali am kolondo' anak, am minayan saguli' ra ama' nano am ama' nano mampakan riso, makaakan ra akanon ondo' maapu ru ama' nano ra imam no. Sasambaloi ru imam ayuk makaakan ra taak simbalui no.

¹⁴“Amon ru sangulun ondo' sala' ka sasambaloi ru imam, am kalo singonon nangakan ra taak ondo' palilion ayuk, musiti' io mangani' saguli' ra imam no ra ondo' nogondo' suang no, ruangin poyo ra ruo ngoopor piatus.

¹⁵Kalo majamalan ru imam taak simbalui ondo' palilion ayuk no,

¹⁶ra mangani' raginio ra ulun ondo' kalo maaya' mangakan no. Baal ragitio maparatong ra kasalaan am ukuman ra ulun ondo' mangakan raginio. Aku noyo TUHAN am Aku noyo napapasau ra taak simbalui no.”

¹⁷Nanusub TUHAN ri Musa

¹⁸maa' raginio mangani' ra aturan ragitilo ri Arun am anak-anak nano, am niayuk ra ngaangai' ulun ru Israil. Paat ra sangulun Israil kapoam sangulun bansa' ru bokon ondo' mayan ra pagun ru Israil mapataak ra taak simbalui koson mapabansuk ra guang ru TUHAN, ondo' kia tayar manugut ra nazar kapoam koson taak simbalui ondo' pataakon ra kalo kibayarin, bibiag no ondo' kalo najamaran no.

¹⁹Musiti' bibiag no ungkuyon ondo' kalo najamaran, maa' raginio apuon.

²⁰Amon ru mapataak ra bibiag ondo' najamaran, ginio kalo apuon ru TUHAN.

²¹Paat ra sasangulun no mapataak ra taak simbalui koson makibarakat ra TUHAN, ondo' kia tayar manugut ra nazar kapoam koson taak simbalui ondo' pataakon ra kalo kibayarin, bibiag no ondo' kalo najamaran, maa' raginio apuon.

²²Pai' papataak ra TUHAN ra bibiag koson ragitilo: bibiag ondo' moolou, ondo' napandak bungul, ondo' napilat, ondo' nampunana' pilat no, ondo' mantalipos, kapoam ondo' mangkagal. Pai' papataak ra bibiag koson ragitilo tayar ru taak akanon giu' ra rasawat ru altar.

²³Akau makapapataak ra bibiag ondo' kalo matanda' baal no koson ra taak simbalui ondo' pataakon ra kalo kibayarin, kaa' taak simbalui ti kalo apuon koson ra taak simbalui manugut ra nazar.

²⁴Pai' papataak ra TUHAN ra bibiag koson ragitilo: bibiag ondo' tali' no nalansit, kapoam pinutul, kapoam napilat, kapoam pinatiran. Baal ragitio kalo iowon giu' ra pagun mino.

²⁵Pai' papataak ra atan ayuk bibiag tayar ru taak akanon, amon ru bibiag no noowot intor ra ulun bansa' ru bokon. Karaan bibiag no ra najamaran am kalo apuon.

²⁶Sanginan anak ru sapi', kapoam anak ru domba, kapoam anak ru kambing ondo' bagu inanak, kalo patuliaron intor ra indung no buoi tulu' ngoorou. Mopongo raginio bagu no pataakon bibiag no tayar ru taak akanon.

²⁸Indung ru sapi' am anak no, kapoam indung ru domba am anak no, pai' pataako' ginio koson ra taak simbalui ra maginamot orou.

²⁹Paat ra akau mapataak ra taak simbalui koson paringkuanangan ra TUHAN, bayaa' noyo aturan no maa' raginio apuon taak simbalui mino.

³⁰Akano' noyo ngaangai' taak simbalui raginio ra orou raginio niayuk, am pai' panatang ra atan-atan polos ra suabon no.

³¹Indagu TUHAN, “Gagayaa' noyo ngaangai' susuban Kuno; Aku noyo TUHAN.

³²Pai' pagasab ra inggalan Kuno ondo' matulai. Musiti' ngaangai' ulun ru Israil sumamba Raki' koson Ondo' Matulai Kaga'. Aku noyo TUHAN am Aku mapapasau ramuyun.

³³Nagibit Aku ramuyun miningkual intor ra Misir maa' raginio masauk Aku ri Aki Kapuuno' min. Aku noyo TUHAN.”