Read Timugon Murut IMAMAT 24 Bible Online

IMAMAT 24 - Timugon Murut bible

IMAMAT 24

¹Nambala' TUHAN ri Musa

²maa' raginio mapasaboi ra susuban ragitilo ra ulun ru Israil: Pagibit no ra umau jaitun ra kopoyo ondo' moonsoi kaga' tayar ru lampung giu' ralalom Kim ru TUHAN, maa' raginio masikitan lampung no am marayus mapaang.

³Moonong rondom musiti' i Arun mansikit ra lampung no am polosoon ginio mapaang saboi ra susuab ti. Musiti' lampung no pabantaan giu' ra saang ru TUHAN, giu' ra liwar ru tabir ondo' giu' ra saang ru Kaban Nabantuan giu' ra Lamin Matulai Kaga'. Musiti' susuban ragitio gagayaan ra sabubuoi no.

⁴Musiti' i Arun magalung ra lampung-lampung no ondo' pinatampak ra rasawat ru tampakan ra lampung ondo' binaal intor ra mas kopoyo, maa' raginio ngaangai' no magulayun mapaang giu' ra saang ru TUHAN.

⁵Alapo' noyo ruo ngoopor am apat ngakilogram tapung ondo' moonsoi kaga' am pambaal no ra mopor am ruo ngantaun ruti'; rondo' ruti' baalon intor ra ruo ngakilogram tapung ondo' moonsoi kaga'.

⁶Pabantaa' ruti'-ruti' no ra ruo ngatinting, onom ruti' ra moonong tinting, giu' ra rasawat ru mija' ondo' inangkupan ra mas kopoyo, ondo' pinabanta' giu' ralalom Kim ru TUHAN.

⁷Anii' noyo ra kaminyan kopoyo ra moonong tinting ru ruti'. Baal ragitio tatandu' ra ruti' no taak akanon tayar ru TUHAN.

⁸Koson ra sabubuoi no, paat ra moonong orou Sabat, musiti' ruti' no pabantaan giu' ralalom Kim ru TUHAN. Gitio noyo imayaan ru ulun ru Israil ra sabubuoi no.

⁹Ruti' no tayar ri Arun am papag nano. Musiti' nilo akanon ruti' no giu' ra intok mapasau, sabap ra ruti' no tayar ondo' mapasau kaga' intor ra taak akanon ondo' pataakon ra TUHAN ra tayar ru imam-imam.

¹⁰Giu' ra pangkiman ru ulun ru Israil, mokoondo' sangulun ungkuyon. Ama' nano ulun ru Misir am ina' nano ulun ru Israil ondo' inggalan no Silomit anak ri Dibri intor ra bansa' ru Dan. Paat ra sangarawan nansangor ulun no ra sangulun Israil giu' ra pangkiman. Paat ra ilo nansangor, nagulas io ri Aki Kapuuno'. Ginio ra ibito' io ru ulun ru Israil paumaa' ri Musa,

¹²am inaput io ra buoi maginaa ra kapatasan ru TUHAN ra atan ondo' musiti' baalon ra ulun no.

¹³Indagu TUHAN ri Musa,

¹⁴“Ibito' noyo ulun no giu' ra liwar ru pangkiman. Polosoon noyo moonong ulun ondo' nakaining riso nagulas ri Aki Kapuuno', mapabanta' ra kalindu' ra tampak ru ulu ru ulun no ra mangani' ra kaintutunan ra makasala io. Mopongo raginio musiti' ngaangai' ulun ru Israil momobol riso saboi matoi.

¹⁵Mopongo raginio balai' noyo ulun ru Israil ra osoi ayuk magulas ri Aki Kapuuno' musiti' magantung ra kinibit no.

¹⁶Musiti' ulun no ukumin ra matoi. Osoi ayuk magulas ra TUHAN, iou ra ulun ru Israil am niayuk ulun bansa' ru bokon ondo' minayan ra pagun ru Israil, musiti' bobolon ru ngaangai' ulun ru Israil saboi matoi.

¹⁷Osoi ayuk mamatoi ra ulun musiti' ukumin ra matoi,

¹⁸am osoi ayuk mamatoi ra bibiag ru ulun bokon musiti' no aligin bibiag ru ulun no. Puun no painawo aligin ra painawo.

¹⁹Paat ra sasangulun mangkinibit ra ulun bokon mapilat, atan ayuk ondo' binaal nano musiti' baalon niayuk riso.

²⁰Amon ru mamandak io ra bungul ru ulun bokon, musiti' bungul nano pana pandakon. Amon ru mopokoolou io ra samataan ru ulun bokon, musiti' samataan nano niayuk bolowon. Amon ru mamandak io ra rondo' ripon ru ulun bokon, musiti' pandakon niayuk rondo' ra ripon nano. Atan ayuk baalon no saboi mapilat ulun ra bokon, musiti' niayuk balasin baalon riso.

²¹Osoi ayuk ondo' mamatoi ra bibiag musiti' aligin bibiag no, kaa' osoi ayuk ondo' mamatoi ra ulun musiti' ukumin ra matoi.

²²Matiu' kau ngaangai' ru ukum ragitio, iou ra ulun ru Israil am niayuk ulun bansa' ru bokon ondo' minayan ra tatanga' min, sabap ra Aku noyo TUHAN i Aki Kapuuno' min.”

²³Pakasaboi ri Musa bala' raginio ra ulun ru Israil, ibito' nilo ulun ondo' nagulas ri Aki Kapuuno' no giu' ra liwar pangkiman, am bobolo' io boo saboi minatoi. Koon raginio noyo ulun ru Israil nambaal ra atan ondo' nanusuban ru TUHAN ri Musa.