Read Timugon Murut IMAMAT 6 Bible Online

IMAMAT 6 - Timugon Murut bible

IMAMAT 6

¹Nangani' TUHAN ri Musa ra aturan ragitio.

²Amon ru makatula sasangulun ra TUHAN sabap ra marara' mapasaguli' ra kuliamos ondo' pinabulian riso ru ulun gino ngai' ru Israil, kapoam sabap ra namparuung ra ulun, kapoam nantakou ra kuliamos ru ulun no, kapoam sabap ra nagibot ra kalo nakatuum ra kuliamos ondo' natatak, musiti' ulun no mapataak ra taak simbalui ra TUHAN.

⁴Musiti' ulun ondo' makatula no mambayar ra ngaangai' ondo' noowot nano ra kalo matanda'. Paat ra orou io narampatan ra makasala, musiti' io mambayar ra ngaangai' logo no ra tatangan no, ruangin poyo ruo ngoopor piatus.

⁶Musiti' ulun ondo' makasala no magibit ra imam ra sanginan domba gawayan kapoam sanginan kambing gawayan ondo' kalo najamaran no koson taak simbalui koson mambayar ra kalubatan ra TUHAN. Logo no musiti' untobon sumugut ra atan ondo' inaru' noyo giu' ra Kim ru TUHAN.

⁷Musiti' imam no mapataak ra taak simbalui koson mangampun ra tula ru ulun no, am ampunon boo ulun no ru TUHAN.

⁸Panusub TUHAN ri Musa

⁹maa' raginio manaak ri Arun am anak-anak nano ra aturan ragitio intor ra taak simbalui koson mapabansuk ra guang ru TUHAN. Taak raginio musiti' patatangon ra rasawat ru altar buoi sorondom, am apui no musiti' marayus ayuk mapaang.

¹⁰Musiti' boo imam ondo' nambayang ra sukub am nansaluar mariwa' intor ra linon no mangalap ra kaau mokolomok ondo' soroi giu' ra altar no, am pabantaan no ra kiing ru altar no.

¹¹Kopongo raginio musiti' imam no mangalig ra binayang nano am magibit ra kaau mongoi ra liwar ru pangkiman, giu' ra intok ondo' timpok ru kaau no.

¹²Apui giu' ra rasawat ru altar no musiti' mararayus mapaang am kalo malasa'. Moonong ra susuab ti imam musiti' mapatampak ra luton giu' ra rasawat ru altar, mapatampak ra taak simbalui koson mapabansuk ra guang ru TUHAN giu' ra rasawat ru altar, am monolob ra lomok intor ra taak simbalui koson makibarakat ra TUHAN.

¹³Apui no musiti' mararayus mapaang ra rasawat ru altar am kalo malasa'.

¹⁴Gitio noyo aturan intor ra taak simbalui koson paringkuanangan ra TUHAN. Musiti' sangulun imam papag ri Arun no mapataak ra taak simbalui no giu' ra saang ru altar.

¹⁵Musiti' imam no mangalap ra sogonggom tapung mabaya' ra umau, am ngaangai' kaminyan no, am solobon boo ngaangai' no ra rasawat ru altar koson tatandu' ra ngaangai' no pinataak noyo ra TUHAN. Owou ru taak simbalui no mapabansuk ra guang ru TUHAN.

¹⁶Suwo ru tapung no musiti' baalon ra ruti' kalo latakin ra ragi am akanon ru imam giu' ra intok mapasau, iono giu' ra liliut ru Kim ru TUHAN. Nanaak noyo TUHAN ra imam-imam ra ruti' no koson ra tayar nilo intor ra taak ra akanon. Taak simbalui ti matulai kaga', koson ra taak simbalui koson mangampun ra tula am taak simbalui koson mambayar ra kalubatan.

¹⁸Koson kalo boo lalanggain, moonong ungkuyon ra papag ri Arun makaakan raginio koson ra tayar nilo intor ra akanon ondo' pataakon ra TUHAN. Ulun ra bokon ondo' mangambong ra taak ra akanon mausung sabap ra kaikangan ru kapasawan ru ginio.

¹⁹Nangani' TUHAN ri Musa aturan ragitio

²⁰tayar ru patimpokon ra imam papag ri Arun. Paat ra orou ru sangulun imam patimpokon, musiti' io mapataak ra sakilogram tapung ondo' moonsoi kaga' (nogondo' suang no ra taak simbalui koson paringkuanangan, ondo' pataakon moonong orou) ra TUHAN, sampiruo no tampilon ra susuab ti am sampiruo no tampilon ra mai' ti.

²¹Tapung no musiti' latakin ra umau am ansakon ra pamanggangan, pipilangon am pataakon tayar ra taak simbalui koson paringkuanangan ra TUHAN. Owou ru taak simbalui no mapabansuk ra guang ru TUHAN.

²²Koson kalo boo lalanggain, taak simbalui ti musiti' pataakon ru moonong papag ri Arun ondo' masauk ra Tingganai Maayo Imam. Taak simbalui ti musiti' solobon ngaangai' koson taak ra TUHAN.

²³Sanganu pana intor ra taak simbalui koson paringkuanangan ra TUHAN, ondo' pataakon ru imam kalo maakan; musiti' solobon ngaangai' no.

²⁴Panusub TUHAN ri Musa

²⁵koson manaak ri Arun am anak-anak nano ra aturan ragitio intor ra taak simbalui koson mangampun ra tula. Bibiag ondo' tayar ru taak ragitio musiti' simbaluyon tampilon ralayo ru altar, giu' ra intok manimbalui ra taak simbalui koson mapabansuk ra guang ru TUHAN. Taak simbalui ti matulai kaga'.

²⁶Imam ondo' mapataak ra bibiag no musiti' mangakan raginio giu' ra intok ondo' mapasau, iono giu' ra liliut ru Kim ru TUHAN.

²⁷Sasangulun kapoam atan pana makatiu' ra kual ru bibiag no mausung sabap ra kaikangan ru kapasawan no. Bayang ondo' matakisan ru raraa' ru bibiag no musiti' pupuin ra intok ondo' mapasau.

²⁸Pagangan ru tana' ondo' nantanakan ra kual no musiti' popolon. Amon ru binaal pagangan no intor ra basi', musiti' pagangan no isasin am liungin ra timug.

²⁹Moonong ungkuyon intor ra sasambaloi ru imam paakanon ra taak simbalui ti; taak simbalui ti matulai kaga'.

³⁰Kaa' amon ru makararaa' ru bibiag no ondo' inumpasan ralalom ru Kim ru TUHAN pinakai boo koson upacara pangampunan ra tula, kual ru bibiag no kalo maakan; bibiag no musiti' solobon.