Read Timugon Murut IMAMAT 9 Bible Online

IMAMAT 9 - Timugon Murut bible

IMAMAT 9

¹Paat ra orou kabalu', pampiau i Musa ri Arun am anak-anak nano am niayuk tingganai ru ulun ru Israil.

²Indagu i Musa ri Arun, “Alapo' sanginan sapi' gawayan ondo' mamulok am sanginan domba gawayan, am karuo-ruo no kalo najamaran no, pataako' boo karuo-ruo no koson taak simbalui ra TUHAN. Sapi' gawayan no tayar ru taak simbalui koson mangampun ra tula, am domba gawayan no tayar ru taak simbalui koson mapabansuk ra guang ru TUHAN.

³Susubo' boo ulun ru Israil mapataak sanginan kambing gawayan tayar ru taak simbalui koson mangampun ra tula, sanginan anak sapi' am sanginan anak domba ondo' umur ru karuruo no sambilor am kalo najamaran no, tayar ru taak simbalui koson mapabansuk ra guang ru TUHAN.

⁴Papataak niayuk ra sanginan sapi' gawayan am sanginan domba gawayan tayar ru taak simbalui koson makibarakat ra TUHAN. Musiti' ilo mapataak ra karuruo bibiag no ra TUHAN mabaya' ra taak simbalui koson paringkuanangan, iono taak ondo' latakin ra umau. Musiti' nilo baalon ngaangai' no sabap ra paat ra orou raiti' mintalang TUHAN risilo.”

⁵Pagibit ilo ra ngaangai' ondo' nanusuban noyo ri Musa mongoi ra saang ru Kim ru TUHAN, am ngaangai' ru ulun no tumimung ra giu' no koson sumamba ra TUHAN.

⁶Indagu i Musa, “Nanusub TUHAN ramuyun koson mambaal ra ngaangai' ti maa' raginio makakito kau ra sinda ratangan ru TUHAN.”

⁷Indagu i Musa ri Arun, “Ongoi no ra altar am papataak ra taak simbalui koson mangampun ra tula am taak simbalui koson mapabansuk ra guang ru TUHAN, maa' raginio ampunon tula muno am tula ru ngaangai' ulun ti ru TUHAN. Baalo' gitio koson ra nanusuban ru TUHAN.”

⁸Ongoi boo i Arun giu' ra altar no am panimbalui ra sapi' gawayan mamulok ondo' paluntukon tayar ru taak simbalui koson mangampun ra tula nano galama'.

⁹Anak-anak ri Arun nagibit ra raraa' ru sapi' no riso, pososopo' ri Arun bubua' ru kalindu' nano ra raraa' no, pakupilo' boo raraa' no ra sangau giu' ra pisuk ru altar. Pawaso' no suwo ru raraa' no giu' ra tampilon ragana' ru altar.

¹⁰Solobo' no boo lomok ru sapi' gawayan no, angkawa' am paat ra moonsoi kaga' intor ra angkayau ru sapi' no giu' rasawat ru altar, koson ra nanusuban ru TUHAN ri Musa.

¹¹Kaa' solobo' ri Arun kual ru sapi' gawayan no am kungkung no giu' ra liwar ru pangkiman.

¹²Kopongo raginio simbaluyo' ri Arun bibiag no tayar ru taak simbalui koson mapabansuk ra guang ru TUHAN, tayar riso galama'. Inibitan io ru anak-anak nano ra raraa' ru bibiag no am pawaso' boo ri Arun ra kaapat-apat sapapa' ru altar.

¹³Pataako' ru anak-anak ri Arun no riso ulu am tayar ra bokon ru bibiag no, am solobo' ri Arun ginio giu' ra rasawat ru altar.

¹⁴Bagui' no boo kalabuat am paa ru bibiag no, solobo' boo ginio giu' ra altar, ralimbou ru ngaangai' taak simbalui ra bokon, iono taak simbalui koson mapabansuk ra guang ru TUHAN.

¹⁵Papataak boo i Arun ra taak simbalui koson mangampun ra tula ru ulun ru Israil. Alap io ra kambing ondo' pataakon, simbaluyo' no am pataako' kambing no koson ra ondo' binaal no ra taak simbalui koson mangampun ra tula nano galama'.

¹⁶Pagibit io niayuk ra bibiag tayar ru taak simbalui koson mapabansuk ra guang ru TUHAN, am pataako' no ginio sumugut ra aturan.

¹⁷Pataako' no taak simbalui koson paringkuanangan, am alap ra sogonggom tapung am solobo' no ginio giu' ra rasawat ru altar. Taak simbalui ti iono paruangon ra taak simbalui koson mapabansuk ra guang ru TUHAN, ondo' pataakon ra moonong orou.

¹⁸Panimbalui i Arun ra sanginan sapi' gawayan am sanginan domba gawayan koson ra taak simbalui koson makibarakat ra TUHAN tayar ru ulun ru Israil. Anak-anak ri Arun no nagibit ra raraa' no riso am pawaso' ri Arun ginio ra kaapat-apat sapapa' ru altar.

¹⁹Pabantaa' ri Arun tayar ra mokolomok intor ra sapi' am domba no

²⁰giu' ra rasawat ru kubab ru karuruo bibiag no, am ibito' boo ngaangai' no giu' ra altar. Solobo' ri Arun lomok no giu' ra rasawat ru altar.

²¹Pataako' no kubab am paa ru bibiag no koson taak lilion ra TUHAN. Tayar ragitio longgom ru imam, koson ra nanusuban ri Musa.

²²Pakataak ri Arun ngaangai' taak simbalui no, potoroyo' no kalindu' nano ra rasawat ru ulun raginio am pambarakat risilo, am tuun io.

²³Umpos i Musa am i Arun ralalom Kim ru TUHAN. Paat ra ilo miningkual, pambarakat ilo ra ulun raginio am sinda ratangan ru TUHAN makito ra moonong ulun.

²⁴Pulali' ru TUHAN papatuun ra apui, am nonolob ra ngaangai' taak simbalui koson mapabansuk ra guang ru TUHAN, am niayuk tayar ra mokolomok ondo' soroi giu' ra rasawat ru altar. Pakakito ulun ru Israil raginio, panganggak ilo am igulatur samba ra TUHAN.