Read Timugon Murut JIRIMIA 14 Bible Online

JIRIMIA 14 - Timugon Murut bible

JIRIMIA 14

¹Koon raginio ragu ru TUHAN raki' intor ra bulintok tampio,

²“Mangiluk guang ru Jiuda; mamagun ru bandar nano mamaar matoi. Liminuya' ilo ra tana' am mampalaa; gumolok Jirusalim makiindangan.

³Nanusub ulun langkaya' ra ulipon-ulipon maguyum ra timug; minongoi ilo ra tulubong-tulubong kaa' kolondo' boo timug; siminaguli' ilo ra rarapu' kolondo' suang. Mabaya' ra nasindualan guang am kolondo' kalansanan nauyu' ilo am sinilian bulos.

⁴Sabap ra kalo riminatu' rasam tana' mapua' kaga'; ulun-ulun magitanom nasindualan guang, nauyu' ilo am sinilian bulos.

⁵Indung ru tambang giu' ra padang nangiruan ra anak nano ondo' bagu inanak sabap ra kolondo' boo sakot.

⁶Minigor kaladai masigo giu' ra tampak ru bulur, ikab-ikab koson ra uku' ru kataunan. Mato ru kaladai masigo masauk ra malaut sabap ra kolondo' akanon.

⁷Mompogolok ulun Kuno Raki', ‘Kabalu' pana tula mai mononsol ramon, iou TUHAN, indangano' akai sumugut ra bantu' Muno. Ruruli' akai no nangiruan Rirun; makatula akai Rirun.

⁸Okou no rorondo' kalansanan ru Israil, ondo' namayag ramon intor ra karaat. Kua kia koson Okou ra ulun bansa' ru bokon giu' ra pagun mai, am koson ra ulun lalayau ondo' minapit sorondom am mugar?

⁹Kua kia koson Okou ra ulun naubong, koson ra ulun tutumula' ondo' kalo makatanggang mangindangan? Maaru' maya' Kou ramon, iou TUHAN! Akai ulun Muno, pai' pangiruan ramon!’ ”

¹⁰Koon raginio noyo ragu ru TUHAN intor ra ulun raginio, “Masaga' ilo magiru' intor Raki' am marara' ilo magalung ra inan. Ginio ra kalo maansayan Aku risilo. Karaan ku kasalaan nilo, am mangukum risilo sabap ra tula nilo.”

¹¹Minindagu TUHAN raki', “Pai' noyo kitaako' Aku mangindangan ra ulun raginio.

¹²Kabalu' pana mampali ilo, marara' Aku mampalio ra golok nilo ra makiindangan; am kabalu' pana mampataak ilo ra taak simbalui koson mapabansuk ra guang Kuno[14] am taak simbalui koson paringkuanangan[15] Raki', kalo maansayan Aku risilo. Kaa' pusoon Ku ilo ra pangayawan, bitilan am maruol tumapik.”

¹³Aku pana mindagu, “Iou TUHAN Raja', nakapandai Kou ra nabi-nabi nambala' ra mamagun ra kolondo' pangayawan kapoam bitilan, sabap ra nambantu' Kou ra giti ra pagun ti masalok makakaansayan.”

¹⁴Kaa' taam TUHAN, “Nabi-nabi raginio nagabau ralalom ru inggalan Kuno; Kalo sinusub Ku ilo, am kalo niayuk nanusub kapoam minindagu risilo. Pinaintalang ondo' tinunung nilono sala' ka intor Raki'. Manala' ilo ra baal-baal ra kolondo' onong, ondo' binaal-baal nilo galama'.

¹⁵Nabi-nabi minindagu ralalom inggalan Kuno ra pagun ti kalo malumpa' ru pangayawan kapoam bitilan, sotopot no kalo nanusub Aku risilo mindagu raginio. Aku, TUHAN nambala' rirun, atan ondo' baalon Kuno ra nabi-nabi no. Potoyon Ku ilo ra pangayawan am bitilan.

¹⁶Ulun ondo' nangapu ra ragu inala' nilono pana potoyon ra ralan mogondo'. Baangkai nilono papatiron giu' ra ralan-ralan ra Jirusalim; kolondo' ulun mompolobong ra baangkai nilono. Koon raginio noyo pupus nilo ngaangai', makaaya' andu', anak ungkuyon am ruandu' nilo. Mangkinibit Aku risilo mansaan ra kinibit ru kalaatan nilono.”

¹⁷Nanusub TUHAN raki' mambala' ra kangilukan kuno ra ulun Nano. Musiti' ku raguon koson ragitio, “Polosoon aku mantangi' ra kalo tumulou, orou am rondom lomou tumulisan, sabap ra bansa' kuno napilatan toojo am naimbolo' kaga'.

¹⁸Paat ra aku minongoi ra padang, nakakito aku ra baangkai pinatoi ra pangayawan. Paat ra aku minongoi ra bandar, nakakito aku ra ulun matikapatoi ra naitilan. Nabi am imam nampaugar ra kandoi ra kalo mangarati' ra atan ondo' baalon.”[16]

¹⁹Iou TUHAN, inimpayan Mu noyo kia toojo Jiuda? Masisang Kou kia ra mamagun ru Sion? Kua lambaa' Mu akai ra najanjayan kaga' saboi kalo boo mapali' akai? Papalo mai ayuk maguyum ra kaansayan; malansan akai ra kapalian, kaa' ondo' soroi kalaatan ayuk.

²⁰Iou TUHAN, ra Okou no ayuk akai makatula. Mangiou akai ra tula mai am tula ru kinamatuaan maili.

²¹Karaa' noyo bantu' Muli, pai' akai no asabi'; pai' no luguto' nabantuan Muno ramon. Pai' no asabi' Jirusalim, intok panturungan Muno ondo' matulai.

²²Kolondo' dewa ru bansa'-bansa' makapamparatu' ra rasam; limbowon pana kalo makapamparatu' ra rasam. Iou TUHAN, i Aki Kapuuno' mai, Okou no rorondo' ayuk kalansanan mai, sabap ra Okou no ondo' nangkinibit ra ngaangai' no nasauk.