Read Timugon Murut JIRIMIA 21 Bible Online

JIRIMIA 21 - Timugon Murut bible

JIRIMIA 21

¹Raja' Jidikia intor ra Jiuda, nanusub ra Imam Pasyur anak ri Malkia am Imam Jipanya anak ri Maasiya, mongoi raki'. Nanusub raja' risilo mampasaboi ra kitaakon ti raki',

²“Pakitulu' no intor ra TUHAN koson ritakau, sabap ra Raja' Nibukadnijar intor ra Babilonia nabaya' ra pulalai nano, tatanga' magawang ra bandar takau. Maaru' lair TUHAN mambaal ra kaimuagan koson ritakau, am mampajajal ra Raja' Nibukadnijar lumugut.”

³Kopongo raginio indagu TUHAN raki', am panusub aku ra karuruo ngaulun sinusub no maa' raginio

⁴mambala' ra Raja' Jidikia ra TUHAN, i Aki Kapuuno' ru Israil, minindagu koson ragitio, “Jidikia, kalaan Ku pulalai muno ondo' tatanga' mangayou mampatoi ra raja' ru Babilonia am pulalai nano. Patunturon Ku ngaangai' kinandoi ru saujor muno giu' ra tatanga' ru bandar.

⁵Mangayou Aku ramuyun ra sototopot ru ikang am sangit ondo' lumuab-luab.

⁶Potoyon Ku mamagun ru bandar ti; ulun am niayuk bibiag matoi sabap ra maruol tumapik ondo' makalalaa'.

⁷Okou am pagawai-pagawai muno am niayuk ngaangai' ulun ondo' naayag intor ra pangayawan, bitilan am maruol tumapik, polosoon Ku rokopon ru Raja' Nibukadnijar am pantula' ondo' masaga' mamatoi ramuyun. Mamatoi Raja' Nibukadnijar ramuyun ngaangai' ra kalo mangampun kapoam makaasi'. Aku, TUHAN nakaindagu noyo.”

⁸TUHAN pana nanusub boo raki' mindagu ra ulun Nano, “Rongogo' noyo! Aku, TUHAN, mangani' ramuyun ra pilion: ralan mongoi ra kaayagan, kapoam ralan ondo' mongoi ra kapatayan.

⁹Moonong ulun ondo' mayan giu' ra ralalom ru bandar matoi sabap ra pangayawan kapoam bitilan kapoam maruol tumapik. Kaa' mingkual ilo koson makirakop ra ulun Babilonia ondo' tatanga' mamulunsar ra bandar ti maayag am kalo potoyon.

¹⁰Namatas Aku noyo koson manutuk ra bandar ti, am kalo malubatan. Bandar ragitio pataakon ra raja' ru Babilonia, am solobon ru raja' no ginio saboi makai'. Aku, TUHAN nakaindagu noyo.”

¹¹Nanusub TUHAN raki' mampasaboi ra tanou ti ra sasambaloi ru raja' ru Jiuda, papag ru Raja' Daut, “Rongogo' atan ondo' paraguon Kuno, TUHAN. Pirot no maa' raginio katimpakan baalon ra moonong orou. Palabuso' noyo ulun ondo' rinuung intor ra kuasa' ru ulun namparuung riso. Amon ru kalo, kalaatan ondo' baalon min mampasauk ra sangit Kuno mapaang koson ra apui ondo' kalo malasaan.”

¹³Kopongo raginio indagu TUHAN ra Jirusalim, “Okou Jirusalim! Intok muno masawat poyo intor ra limayak ra liliut muno. Koson kou ra bulur batu masawat giu' ra tana' marata', kaa' anggalon Tokou. Minindagu kou ra kolondo' sangulun pana makapamulunsar rirun kapoam makasubol ra kubu-kubu muno.

¹⁴Kaa' mangukum Aku rirun sabap ra binaal muno. Solobon Ku istana muno, am ngaangai' ra liliut nano mosolob niayuk. Aku, TUHAN nakaindagu noyo.”