Read Timugon Murut JIRIMIA 23 Bible Online

JIRIMIA 23 - Timugon Murut bible

JIRIMIA 23

¹Mapara' boo makalalaa' ukuman ru TUHAN risilo panguasa' ondo' namuso am nampatutuliar ra ulun Nano!

²Gitio noyo ondo' pinaragu ru TUHAN, i Aki Kapuuno' ru Israil, intor ra ilo panguasa' ondo' sotopot no magalung ra ulun Nano, “Kalo inalungan min ulun Kuno; pinantutuliar min boo am pinagiru' min ilo. Raino ukumin Takamin sabap ra kalaatan min.

³Timungon Ku ulun Kuno ra bokon intor ra pagun-pagun intok Kuno nampatutuliar risilo. Ibiton Ku ilo saguli' ra namagunan nilo. Mokoondo' ilo ra masuang papag am lumanja' suang nilo.

⁴Lantikon Ku panguasa' koson magalung risilo. Ulun Kuno kalo boo malaa' kapoam monontol; Aku pana kalo boo mangukum risilo.[24] Aku, TUHAN nakaindagu noyo.”

⁵Indagu TUHAN, “Masaboi paat no ra mampalantik Aku ra sangulun raja' ondo' matimpok intor ra papag ri Daut. Mamarinta raja' no ra matanda', am mambaal ra atan ondo' matimpok am motopot giu' ra titikop pagun.

⁶Paat ra io masauk ra raja', ulun ru Jiuda maayag, am ulun ru Israil maayag ra moonsoi. Raja' no sabiton ra ‘TUHAN Mamamayag Ritakau’.

⁷“Masaboi paat no ra ulun kalo boo magibot ralalom ru inggalan Kuno, i Aki Kapuuno' ondo' maayag, ondo' nagibit ra ulun ru Israil miningkual intor ra Misir.

⁸Kaa' magibot ilo ralalom ru inggalan Kuno, i Aki Kapuuno' ondo' maayag, ondo' nagibit ra ulun ru Israil miningkual intor ra rondo' pagun giu' ra ralayo, am intor ra ngaangai' pagun ra bokon intok Kuno nampatuliar risilo. Ilo pana mayan boo ra namagunan nilo galama'.”

⁹Guang kuno natutuk am monontol aku. TUHAN am ragu Nano ondo' matulai mampasauk raki' koson ra ulun nagauk, ulun ondo' nanginum ra masuang kaga' wain.

¹⁰Pagun nososok ra ulun ondo' kalo gumagaya' ra TUHAN. Bayag nilo malaat am sinala'-sala' nilo kuasa'. Sakot giu' ra padang nasauk ra mapua' am titikop ru pagun mangulir, sabap ra inulas ru TUHAN.

¹¹Indagu TUHAN, “Nabi am imam marara' gumagaya' Raki'. Napandayan Ku nambaal ilo ra malaat am niayuk poyo giu' ra Baloi Kuno.

¹²Ginio ra, ralan ondo' binayaan nilo malamog am molondom; mangkinibit Aku risilo makasaru am maratu'. Mamparatong Aku ra karaat risilo, ra masaboi paat no koson mangukum risilo. Aku, TUHAN, nakaindagu noyo.

¹³Nakakito Aku ra tula ru nabi-nabi ru Samaria. Minindagu ilo ralalom inggalan ru Baal, am nampalayau ra ulun Kuno Israil.

¹⁴Kaa' giu' ra Jirusalim, nakakito Aku ra nabi-nabi nambaal ra baal ondo' malaat poyo kaga'. Nagabau am nansawa' ilo, am niayuk siminaung ra ulun ondo' nambaal ra malaat, saboi kolondo' sangulun pana masaga' tumalikur intor ra tula. Koson Raki', ngaangai' ilo malaat koson ra mamagun ru Sodom am Gomora.”

¹⁵Gitio noyo ragu ru TUHAN Ondo' Maayo Kaga' Kuasa' intor ra nabi-nabi giu' ra Jirusalim, “Aniin Ku ilo ra tatanom mapait koson ra akanon am tuwo koson ra inumon, sabap ra nangkinibit ilo ra ulun giu' ra titikop pagun kalo gumagaya' Raki'.”

¹⁶Indagu TUHAN Ondo' Maayo Kaga' Kuasa' ra mamagun ru Jirusalim, “Pai' rongogo' nabi-nabi ondo' magail mangani' ra kalansanan ondo' abau ayuk. Mampasaboi ilo ayuk ra pangkaraan galama' am sala' ka tanou intor Raki'.

¹⁷Masalok ilo mindagu ra ulun ondo' marara' rumongog ra ragu Kuno, ‘Maayag kau.’ Konilo ra moonong ulun ondo' bambalingatan, ‘Kalo malumpa' kau ru karaat.’ ”

¹⁸Indagu aku, “Kolondo' sangulun pana intor ra nabi-nabi makapandai ra atan ondo' soroi ralalom pangkaraan ru TUHAN. Kolondo' sangulun pana risilo ondo' igondo' pokorongog am pakarati' ra inatangan Nano; kolondo' niayuk ondo' mangining kapoam mampalio ra ragu Nano.

¹⁹Sangit Nano koson ra bagiu' mapuor ondo' sumiab ra mapuor kaga' am makalumpa' ra ulun malaat.

²⁰Sangit Nano kalo luminos ra kalo poyo ngaangai' inatangan Nano masugut. Paat ra orou tauli no, ulun ru TUHAN makarati' ra baal raginio ra totopot.”

²¹Indagu TUHAN, “Kalo manusub Aku ra nabi-nabi no, kaa' minugar ilo niayuk. Kalo nangani' Aku ra tanou risilo, kaa' mindagu ilo ralalom ru inggalan Kuno.

²²Amon ru nakapandai ilo ra atan soroi ralalom ru pangkaraan Kuno, maaru' mampatanou ilo ra tanou Kuno ra ulun Kuno. Koon raginio ulun Kuno lumonggo' mambaal ra tula am mambaal ra ondo' malaat.

²³“Aku ti i Aki Kapuuno' ondo' soroi ra ati-ati, am sala' ka i Aki Kapuuno' ondo' sumaang ra rondo' intok ayuk.

²⁴Kolondo' sangulun pana makapansibuni intor ra pagilangan Kuno, sabap ra soroi Aku ra ati-ati, giu' ra suruga' am giu' ra tana'.

²⁵Nakapandai Aku ra ngaangai' ondo' rinagu ru nabi-nabi. Ralalom inggalan Kuno nagabau ilo ra tanou Kuno inapu nilo ralalom ru inupi.

²⁶Saboi sanggilan kia nabi-nabi mampalayau ra ulun Kuno ra abau ondo' binaal-baal nilo galama'?

²⁷Pangkaraan nilo ra inupi-inupi ondo' tinunung risilo no nangkinibit ra ulun Kuno nampalilian Raki' koson ra kinamatuaan nilo nampalilian Raki', am siminamba ra Baal.

²⁸Nabi ondo' naginupi musiti' no mindagu, ‘Ginio inupi ayuk.’ Kaa' nabi ondo' nangapu ra tanou intor Raki' musiti' mampasaboi ra tanou no ra sotopot no. Atan kia rami no amon ru pinogondo' ra gandum!

²⁹Ragu Kuno koson ra apui, am koson ra amar ondo' mokopomopol ra batu.

³⁰Inanggal Ku nabi-nabi ondo' nampasaboi ra tanou intor ra gino ngai' ilo, am minindagu ra tanou no intor Raki'.

³¹Inanggal Ku niayuk nabi-nabi ondo' nampasaboi ra ragu-ragu galama', am minindagu ra ragu-ragu no intor Raki'.

³²Aku, TUHAN minindagu; rongogo' noyo! Anggalon Ku nabi-nabi ondo' nampasaboi ra inupi ondo' nakai' ra abau. Nantunung ilo ra inupi-inupi am nampalayau ra ulun Kuno ra abau am ragu lumimbau nilo. Kalo nanusub kapoam nangani' ra susuban ra nabi-nabi no. Ilo topot-topot kolondo' onong ra ulun Kuno. Aku, TUHAN, nakaindagu noyo.”

³³Indagu TUHAN, “Okou Jirimia, paat ra sangulun intor ra ulun Kuno, kapoam sangulun nabi kapoam imam mangkuot rirun, ‘Atan tanou ru TUHAN?’ Musiti' kou tumaam, ‘Okou no saanin[25] ru TUHAN, sabap raginio patirin No okou.’

³⁴Amon ru sangulun intor ra ulun Kuno kapoam sangulun nabi kapoam sangulun imam nanabit ra ragu ‘saanin ru TUHAN’, ukumin Ku io am sasambaloi nano.

³⁵Sotopot no, moonong ulun musiti' mangkuot ra pabukat-pabukat nano, ‘Atan kia taam ru TUHAN? Atan kia ondo' rinagu ru TUHAN?’

³⁶Kalo boo paraguin risilo ragu ra ‘saanin ru TUHAN’. Amon ru mokoondo' ra ulun ondo' lakat poyo mindagu raginio, saukon Ku tanou Kuno topot-topot pasaanin riso. Jinajou noyo ru ulun ragu intor Raki', i Aki Kapuuno' nilo, i Aki Kapuuno' ondo' maayag, TUHAN Ondo' Maayo Kaga' Kuasa'.

³⁷Okou Jirimia, kuati' nabi-nabi no, ‘Atan kia taam ru TUHAN ramuyun? Atan kia ondo' rinagu ru TUHAN?’

³⁸Amon ru mokoondo' ra ulun ondo' kalo gumagaya' ra susuban Kuno, am lakat poyo mindagu ra ‘saanin ru TUHAN’,

³⁹anamon[26] Ku ilo, am patirin ilo ra maalur, ilo am poyo bandar ondo' tinaakan Ku risilo am kinamatuaan nilo.

⁴⁰Tauyuon am asabin Ku ilo ra sabubuoi no, am pupus nilo kalo malilianan ru ulun.”