Read Timugon Murut JIRIMIA 26 Bible Online

JIRIMIA 26 - Timugon Murut bible

JIRIMIA 26

¹Kopongo ayuk i Joyakim anak ungkuyon ru Raja' Josia nasauk ra raja' ru Jiuda,

²indagu TUHAN raki', “Ongoi no bigor giu' ra liliut ru Baloi Kuno am indagu no ra ulun intor ra bandar-bandar ru Jiuda ondo' matong sumambayang ra giu' no. Potonowo' noyo ngaangai' ondo' nanusuban Kuno rirun. Pai' tatango' rondo' ragu pana.

³Maaru' bansa' no masaga' rumongog, am lumonggo' boo mambaal ra malaat. Amon ru koon raginio, kalo suguton Ku inatangan Kuno. Kalo pusoon Ku ilo sabap ra binaal malaat nilo.”

⁴Nanusub TUHAN raki' mindagu risilo, “Koon ragitio ragu ru TUHAN, ‘Aku, TUHAN, nanusub noyo maa' raginio musiti' kau gumagaya' Raki' am mambaal ra ukum ondo' tinaakan Ku noyo ramuyun.

⁵Musiti' kau niayuk rumongog ra atan ondo' rinagu ru ulipon Kuno, iono nabi-nabi ondo' kalo langgain Ku manusub poongoyon ramuyun. Kaa' kalo igondo' kau rongog risilo.

⁶Amon ru mansang kau ayuk, pamakuan Kuno ra Baloi Kutu koson ra pinamakuan Kuno ra Silo,[29] saboi ngaangai' bansa' ra tana' ti mamakai ra inggalan ru bandar Jirusalim koson ra pagulasan.’ ”

⁷Imam-imam, nabi-nabi am ngaangai' ru mamagun mokorongog ra ngaangai' ondo' raguon Kuno giu' ra Baloi ru TUHAN.

⁸Mataki' ra kopongo ayuk ra aku nampatanou ra ngaangai' tanou ru TUHAN koson ra nanusuban Nano, rinakop nilo aku liliwa' giminolok, “Musiti' kou potoyon!

⁹Kua baani kou mindagu ralalom inggalan ru TUHAN ra Baloi Nati masauk koson ra Silo, am ra bandar ti pusoon am masauk ra intok ondo' kalo boo ayanin?” Linimpuan aku boo ru ulun masuang.

¹⁰Paat ra tingganai-tingganai ru Jiuda nokorongog ra atan ondo' nasauk, nagindibok ilo miningkual intor ra istana am ongoi ra Baloi ru TUHAN, am panturung giu' ra Kulobon Garabang Bagu.

¹¹Imam-imam am nabi-nabi minindagu ra tingganai-tingganai am ra mamagun, “Ulun ragitio sotopot no ukumin ra matoi sabap ra minindagu io ra ondo' manggal ra bandar takau. Akau galama' nokorongog noyo.”

¹²Aku pana mindagu, “Nanusub TUHAN raki' mampatanou ra ngaangai' tanou ondo' manggal ra Baloi ru TUHAN am bandar ti koson ra ondo' norongog min noyo.

¹³Ginio ra musiti' kau mangulau ra kaayagan am binaal min; gagaya' kano ra TUHAN, i Aki Kapuuno' min, maa' raginio kalo suguton No inatangan Nano koson mampalumpa' ra karaat no ramuyun.

¹⁴Koson raki', ralalom aku ra kuasa' min! Baalo' noyo atan ayuk ondo' matimpok am motopot sumugut ra guangon min.

¹⁵Kaa' karaa' noyo, amon ru mamatoi kau raki', akau am mamagun ru bandar ti makatula sabap ra mamatoi ra ulun ondo' kolondo' sala. Nanusub TUHAN raki' koson mampakara' ramuyun.”

¹⁶Tingganai-tingganai am mamagun pana minindagu boo risilo imam am nabi no, “Ulun ragitio minindagu ra ralalom inggalan ru TUHAN, i Aki Kapuuno' takau; musiti' io ukumin ra matoi.”

¹⁷Kopongo raginio kukula' ngaulun ra gino ngai' ru tuu' lair ru bansa' no minongoi ra saang am indagu ra ngaangai' ulun ondo' timinimung ra giu' no,

¹⁸“Paat ra Raja' Gijkia nasauk ra raja' ru Jiuda, Nabi Mika intor ra Morisyit nambala' ra mamagun ra ragu ru TUHAN Ondo' Maayo Kaga' Kuasa', ‘Sion raduon koson ra umo, Jirusalim masauk ra tuntur ru nangalunsai, am bulur ru Baloi ru TUHAN masauk ra kataunan.’

¹⁹Raja' Gijkia am mamagun ru Jiuda kalo namatoi ri Mika. Sotopot no, Raja' Gijkia malaa' ra TUHAN am makimasi' Riso. Ginio ra kalo sinugut ru TUHAN inatangan Nano koson mampalumpa' ra karaat risilo. Raino ti, mamaar takau mamparatong ra karaat ondo' makalalaa' ra inan takau galama'.”

²⁰Sangulun ungkuyon ra bokon ondo' inggalan nano i Uria anak ri Simaya intor ra Kiryat-Jiarim, niayuk igondo' indagu ra ralalom inggalan ru TUHAN koson manggal ra bandar am bansa' ragitio, koson ra binaal ri Jirimia.

²¹Paat ra Raja' Joyakim nababaya' ra saujor-saujor am pagawai-pagawai nano nokorongog ra ragu ri Uria no, mirot raja' no mamatoi riso. Kaa' norongog i Uria baal raginio, io pana nagiru' ra nalaa' am ongoi ra Misir.

²²Kaa' nanusub Raja' Joyakim ri Ilnatan anak ri Akbor mababaya' ra kukula' ngaulun ra bokon mongoi ra Misir koson mamparakop ri Uria.

²³Inibit nilo io siminaguli' ra Raja' Joyakim. Raja' pana nanusub boo ra ulun namatoi riso, am baangkai nano pinatiran giu' ra tana' kalabangan ru ulun kasuangan.

²⁴Kaa' inindangan aku ri Agikam anak ri Sapan, ginio ra kalo pinataak aku ra mamagun koson potoyon.