Read Timugon Murut JIRIMIA 28 Bible Online

JIRIMIA 28 - Timugon Murut bible

JIRIMIA 28

¹Paat ra bilor raginio niayuk,[31] paat ra sila' kalimo bilor kaapat ra pamarintaan ru Raja' Jidikia, i Gananya anak ri Ajur, sangulun nabi intor ra bandar Gibion, minindagu raki' giu' ra Baloi ru TUHAN. Nambala' io raki' giu' ra saang ru imam am mamagun

²ra TUHAN Ondo' Maayo Kaga' Kuasa', i Aki Kapuuno' ru Israil minindagu, “Pinandak Ku noyo kuasa' ru raja' ru Babilonia.

³Ralalom ru buoi ruo ngambilor ti pasagulion Ku ngaangai' kuliamos ru Baloi Kuno, ondo' inaut ru Raja' Nibukadnijar ra Babilonia.

⁴Ibiton Ku niayuk saguli' i Joyakin anak ungkuyon ru Raja' Joyakim, raja' ru Jiuda, mababaya' ra ngaangai' mamagun ru Jiuda ondo' inaut ra Babilonia. Sotopot no, pandakon Ku kuasa' ru Babilonia. Aku, TUHAN nakaindagu noyo.”

⁵Kopongo raginio giu' ra saang ru imam-imam am ngaangai' ulun ondo' minigor giu' ra Baloi ru TUHAN, indagu aku ri Gananya,

⁶“Moonsoi! Malansan aku ra TUHAN mambaal raginio! Gama' ru saukon No inala' muno ra totopot masauk, am ibiton No saguli' kuliamos ru Baloi ru TUHAN intor ra Babilonia mababaya' ra ngaangai' ulun ondo' pinatiran ra giu' no.

⁷Kaa' rongogo' noyo atan ondo' raguon kutu rirun am ra mamagun.

⁸Nabi-nabi bulintok ra galing i, kalo poyo bulintok takau, nanala' noyo ra pangayawan, bitilan am maruol tumapik lumumpa' ra masuang bansa' am pamarintaan ondo' maikang.

⁹Kaa' nabi ondo' nanala' ra kaansayan, maintopot ayuk koson ra nabi ondo' totopot sinusub ru TUHAN, paat ra inala' nano totopot masauk.”

¹⁰Kopongo raginio i Gananya nangalap ra kuk intor ra impus kutu, am pinandak no.

¹¹Giu' ra saang ru ngaangai' ulun ra giu' no, indagu io, “TUHAN minindagu ra gitio noyo baal ru Io mamandak ra kuk ondo' pinaatang ru Raja' Nibukadnijar ra impus ru ngaangai' bansa'; baalon ru TUHAN baal raginio ralalom ru buoi ruo ngambilor.” Kopongo raginio iruani' ku intok raginio.

¹²Kalo nabuoi kalupus kasaukan raginio, nanusub TUHAN raki'

¹³mongoi ri Gananya am indagu, “Minindagu TUHAN ra masaga' kou mamandak ra kuk tataun, kaa' aligin No ginio ra kuk basi'.

¹⁴TUHAN Ondo' Maayo Kaga' Kuasa', i Aki Kapuuno' ru Israil, minindagu ra paatangon no kuk basi' ra impus ru ngaangai' bansa' ragitio, am mangandoi ilo ayuk ra Raja' Nibukadnijar, raja' ru Babilonia. Minindagu niayuk TUHAN ra bibiag masigo pana pataakon No ra kuasa' ru Raja' Nibukadnijar.”

¹⁵Aku pana nampasaboi boo ra ragu raginio ri Gananya, am indagu aku poyo, “Rongogo' noyo, okou Gananya! Kalo nanusub TUHAN rirun; nangkinibit kou ra bansa' ragitio mangintopot ra abau.

¹⁶Ginio ra TUHAN galama' minindagu ra pusoon No okou. Bilor ragitio niayuk matoi kou, sabap ra nanusub kou noyo ra bansa' ragitio manggal ra TUHAN.”

¹⁷Paat ra bilor raginio niayuk, ra sila' katulu', i Gananya minatoi.