Read Timugon Murut JIRIMIA 3 Bible Online

JIRIMIA 3 - Timugon Murut bible

JIRIMIA 3

¹Indagu TUHAN, “Paat ra sangulun ralaki mangali ra andu' nano, am ruandu' no pana nasauk ra andu' ru ulun bokon, ralaki lair nano pana kalo makapamuli' saguli' riso koson ra andu', sabap ra baal raginio makajaka' ra titikop pagun ti. Okou Israil, mokoondo' noyo ra masuang kaga' ambai, am raino masaga' kou piboo sumaguli' Raki'!

²Kinami' ilai' rasawat no, giu' ra tampak ru bulur! Ati ra intok ondo' kalo poyo igondo' kou ratong koson mantalan ra inan? Nanturung kou giu' ra kiing ru ralan maginaa ra ulun ondo' masaga' mansilar; okou koson ra ulun ru Arab ondo' magawang ra ulun ipaan giu' ra tana' kaagisan. Jinaka' mu pagun ti ra pansasawaan am kalaatan muno.

³Ginio sabap ra rasam kalo rumatu', am rasam paat ra mambusak kalo matong. Nansalu kou ra ulun mantalan ra inan; mailo kou ra mauyu'.

⁴Kaa' raino mindagu kou Raki', ‘Okou noyo ama' kuno. Motogom Kou raki' intor ra aku boborok.

⁵Kalo sumangit Kou ayuk raki'; kalo mantilayun sangit Muno raki'.’ Okou Israil, ginio noyo ondo' raguon muno kaa' binaal mu niayuk ngaangai' kalaatan no.”

⁶Paat ra pamarintaan ru Raja' Josia, indagu TUHAN raki', “Nakito mu noyo kia binaal ru Israil, ruandu' ondo' kalo gumagaya' no? Nangiruan io Raki' am nantalan ra inan giu' ra rasawat ru moonong bulur masawat am giu' ra saau ru moonong puun tataun masansam.

⁷Guang Kuli ru mabaal no ngaangai' no, sumaguli' io Raki'. Kaa' kalo siminaguli' io, am i Jiuda, pabukat nano ondo' kalo gumagaya', nakakito ra ngaangai' binaal nano.

⁸Nakakito niayuk ri Jiuda ra inali am pinaugar Ku Israil, sabap ra nangiruan io Raki' am nasauk ra mantalan ra inan. Kaa' i Jiuda ondo' kalo gumagaya', pabukat ri Israil no, kalo malaa'. I Jiuda pana minaya' nasauk ra mantalan ra inan

⁹am kalo toojo mauyu'. Jinaka' no pagun am nansawa' sabap ra sumamba ra batu am puun tataun.

¹⁰Kabaal ngaangai' no, i Jiuda ondo' kalo gumagaya' no babaalon ayuk siminaguli' Raki', sabap ra guang nano kalo mabanis. Aku, TUHAN nakaindagu noyo.”

¹¹Nambala' boo TUHAN raki' ra kabalu' pana nangiruan i Israil Riso, moonsoi poyo i Israil intor ri Jiuda ondo' kalo gumagaya' no.

¹²Nanusub TUHAN raki' mongoi pampasaboi ra baal ragitio ri Israil, “Israil ondo' kalo gumagaya', saguli' no Raki'. Makaasi' Aku kaga' am kalo sumangit; kalo sumangit Aku rirun ra sabuoi-buoi no.

¹³Pangiou ayuk ra okou makasala am giminuor ra TUHAN, i Aki Kapuuno' muno. Pangiou no ra giu' ra moonong saau ru puun tataun masansam pinataak mu togom muno ra tuhan-tuhan ru bansa' bokon, am kalo giminagaya' ra susuban Kuno. Aku, TUHAN nakaindagu noyo.”

¹⁴“Ulun kau ra kalo gumagaya', saguli' kano Raki'; akau longgom Kuno. Mangalap Aku ramuyun, sangulun intor ra moonong bandar, am ruo ngaulun intor ra moonong bansa', am Aku pana magibit ramuyun sumaguli' ra Bulur Sion.

¹⁵Mangani' Aku ramuyun ra tingganai-tingganai ondo' gumagaya' Raki'. Maningganai ilo ramuyun ra kapintaran am pangaratian.

¹⁶Kopongo raginio paat ra akau lumanja' suang ra pagun ti, ulun kalo boo mindagu intor ra Kaban Nabantuan Kuno. Kalo boo guangon kapoam karaan nilo ginio; ilo pana kalo boo makapakuan raginio kapoam mambaal ra Kaban Nabantuan ra bokon.

¹⁷Paat raginio bandar Jirusalim sabiton ra ‘Kurisi' ru TUHAN’, am ngaangai' bansa' tumimung ra bandar no koson sumamba Raki'. Kalo boo maya' ilo ra saga' ru guang nilo ondo' mokotog am malaat no.

¹⁸Magamung Israil am Jiuda, mabaya' boo matong intor ra pagun namatiran giu' ra tampilon ralayo. Sumaguli' ilo ra pagun ondo' tinaakan Kuno koson ra tana' tungkuson ra kinamatuaan min.”

¹⁹Indagu TUHAN, “Israil, moogot Aku mangapu rirun koson ra anak Kuno, am mangani' rirun ra pagun ondo' makabansuk ra guang, pagun ondo' moonsoi kaga' ra titikop ru tana'. Moogot Aku rirun mampiau Raki' ‘Ama' kuno’, am kalo noyo boo tumalikur intor Raki'.

²⁰Kaa' koson ra andu' ondo' kalo gumagaya', okou pana kalo gumagaya' Raki'. Aku, TUHAN nakaindagu noyo.”

²¹Morongog bolos giu' ra tampak-tampak ru bulur; bolos ru ulun ru Israil ondo' mantangi' am makimasi', sabap ra makatula ilo noyo, am nakalilian ra TUHAN, i Aki Kapuuno' nilo.

²²Saguli' no, akau ngaangai' ondo' nangiruan noyo ra TUHAN; mamabas Io ramuyun am mampasauk ramuyun ra gumagaya'. Kamin, “Raino matong akai ra TUHAN sabap ra Io i Aki Kapuuno' mai.

²³Banangan ayuk akai sumamba ra sinungkalalaing giu' ra tampak-tampak ru bulur! Pangindangan ra Israil matong ayuk intor ra TUHAN, i Aki Kapuuno' mai.

²⁴Kaa' sumamba ra Baal, sinungkalalaing ondo' makauyuyu' no, nangkinibit ramon natatakan ra anak, ungkuyon am niayuk ruandu', am niayuk tinambiag ra sapi' am domba, iono ngaangai' no ondo' piniratan ru kinamatuaan maili intor ra galing i.

²⁵Ginio ra, polosoon akai mansaan ra uyu' am polosoon akai asasabin. Akai am kinamatuaan maili masalok makatula ra TUHAN, i Aki Kapuuno' mai; kalo igondo' akai gagaya' ra susuban Nano.”