Read Timugon Murut JIRIMIA 30 Bible Online

JIRIMIA 30 - Timugon Murut bible

JIRIMIA 30

¹TUHAN, i Aki Kapuuno' ru Israil,

²minindagu raki', “Tulisi' ra ralalom ru rondo' kitab ngaangai' ondo' rinagu Kuno rirun,

³sabap ra paat no masaboi ra pulion Ku baal ru ulun Kuno, Israil am Jiuda. Ibiton Ku ilo sumaguli' ra pagun ondo' tinaakan Kuno ra kinamatuaan nilai. Molonggom nilo pagun no saguli'. Aku, TUHAN, nakaindagu noyo.”

⁴Minindagu TUHAN ra ulun ru Israil am Jiuda,

⁵“Nokorongog Aku ra golok ru ulun ondo' nonontol, golok ru ulun ondo' malaa', ondo' kolondo' kaansayan.

⁶Kinami' karaa' am imumuyi'! Makapaganak kia ungkuyon ra lalagang? Amon ru kalo, kua kakito Ku moonong ungkuyon mangabula' bulos am mampaguut ra tinai' nilo ra kalindu' koson ra ruandu' ondo' maganak?

⁷Orou makalalaa' masaboi, orou ondo' kolondo' pogondo' no. Tayar ru ulun Kuno, ginio noyo orou ondo' mampakalaa' risilo, kaa' bayagon ilo.”

⁸Indagu TUHAN Ondo' Maayo Kaga' Kuasa', “Paat ra masaboi orou raginio, kuk ondo' pinaatang ra impus min pandakon Ku, am pinabangkil ramuyun iruon Ku. Akau kalo boo masauk ra ulipon ru bansa' ra bokon.

⁹Mangandoi kau ayuk Raki', TUHAN, i Aki Kapuuno' min, am mangandoi ayuk ra sangulun papag ri Daut ondo' lantikon Ku ra raja'.

¹⁰Ulun Ku ngai', pai' kalaa'! Ulun kau ru Israil, pai' ponontol! Bayagon Takamin intor ra pagun ondo' maalur, intor ra pagun intok min rinakop ru pantula'. Muli' kau ra pagun min am maayag ra kaansayan. Maayag kau, am kolondo' ulun mampakalalaa' ramuyun.

¹¹Matong Aku am mamayag ramuyun. Pusoon Ku ngaangai' bansa' intok nampatutuliaran Kuno ramuyun, kaa' akau kalo pusoon Ku. Akau kalo palabuson Ku intor ra ukuman, kaa' matimpok Aku paat mangukum ramuyun. Aku, TUHAN, nakaindagu noyo.”

¹²Indagu TUHAN ra ulun Nano, “Pilat min masaran toojo, pilat min ra kolondo' tatapis no.

¹³Kolondo' sangulun pana masaga' mamabas ramuyun, kolondo' tatapis ru talipos min, kolondo' kalansanan min ra mapali'.

¹⁴Ngaangai' ambai min nakalilian noyo ramuyun; kalo boo mampalio ilo ramuyun. Koson ra pantula', mamulunsar Aku ramuyun, ukuman ondo' maagat nakalumpa' ramuyun sabap ra tula min masuang kaga' am kalaatan min najanjayan kaga'.

¹⁵Pai' boo pambutok intor ru pilat min, sabap ra kolondo' kalansanan min ra mapali'. Mangukum Aku ramuyun ra ralan raginio, sabap ra tula min masuang kaga' am kalaatan min najanjayan kaga'.

¹⁶Kaa' raino ngaangai' ondo' monolon ramuyun tolonon, am ngaangai' pantula' min ibiton mugar koson ra ulun rinakop. Ngaangai' ulun ondo' nangimbolo' ramuyun imboloon, am ngaangai' ulun ondo' nantakou ramuyun takawin.

¹⁷Kabalu' pana mindagu pantula' min, ‘Sion pinatiran noyo, am kolondo' mampalio riso,’ kaa' akau paligagon Ku saguli', am pilat min kapalion Ku.”

¹⁸Indagu TUHAN, “Pasagulion Ku ulun Kuno ra pagun nilo am makaasi' ra moonong sasambaloi; Jirusalim baalon poyo, am istana no punaan.

¹⁹Mamagun nano mongompor Raki' ra rimbai, am magilakup ra maansukan. Ra barakat Kuno sumuang ilo; barakat Kuno mamparatong ra urumat risilo.

²⁰Pasaukon Ku bansa' no makakuasa' koson ragili, am mangikang risilo saguli'. Ukumin Ku ngaangai' ulun ondo' mangimbolo' risilo.

²¹Ulun manguasa' risilo matong intor ra bansa' nilo, raja' nilo intor ra bansa' nilo. Muma' io Raki' paat ra Aku mampiau riso, sabap ra osoi kia ondo' baani muma' ra kalo piawon? Masauk ilo ra ulun Kuno am masauk Aku ri Aki Kapuuno' nilo. Aku, TUHAN nakaindagu noyo.”

²³Sangit ru TUHAN koson ra bagiu' mapuor kaga', koson ra bagiu' mapuor ondo' mapuor kaga' sumiab am makalumpa' ra ulun malaat, am kalo tuminas ra kalo poyo ngaangai' guangon Nano masugut. Ulun Nano makarati' ra baal raginio ra orou tauli no.