Read Timugon Murut JIRIMIA 34 Bible Online

JIRIMIA 34 - Timugon Murut bible

JIRIMIA 34

¹Minindagu TUHAN raki' paat ra Raja' Nibukadnijar intor ra Babilonia am saujor nano namulunsar ra Jirusalim am bandar-bandar giu' ra liliut no. Raja' no pinatoi ru saujor ru pagun-pagun am bansa'-bansa' ondo' ralalom ru kuasa' nano.

²TUHAN, i Aki Kapuuno' ru Israil, nanusub raki' mampasaboi ra ragu Nano ra Raja' Jidikia intor ra Jiuda, “Aku, TUHAN, mampataak ra bandar ragitio ra raja' ru Babilonia am io monolob no.

³Kalo makapagiru' kou; rokopon am pataakon kou riso. Makauma' kou riso am okou galama' mindagu riso; okou pana mongoi ra Babilonia.

⁴Okou Jidikia, rongogo' ragu Kuno intor rirun. Kalo potoyon kou ralalom ru pangayawan.

⁵Matoi kou ra kaansayan, am koson ra ulun monolob ra kaminyan paat ra ilo mompolobong ra kinamatuaan muli, ioginio raja'-raja' ra kalo poyo bulintok muno, koson raginio niayuk ilo monolob ra kaminyan rirun. Mangulir ilo rirun am mindagu, ‘Minatoi noyo raja' takau!’ Aku, TUHAN, nakaindagu noyo.”

⁶Aku pana nampasaboi boo ru tanou no ra Raja' Jidikia giu' ra Jirusalim,

⁷paat ra saujor ru raja' ru Babilonia namulunsar ra bandar ru Jirusalim. Saujor ru Babilonia niayuk namulunsar ra Lakgis am Ajika, ruo bandar mokoondo' ra kubu ondo' lakat poyo soroi giu' ra Jiuda.

⁸Raja' Jidikia am mamagun ru Jirusalim nambaal ra nabantuan koson mampalabus ra

⁹ulun ru Ibrani ondo' nasauk ra ulipon nilo, ungkuyon am poyo ruandu', maa' raginio kolondo' sangulun pana intor ra bansa' ru Israil ondo' mangulipon ra gino ngai' ru bansa' nano.

¹⁰Ngaangai' ru mamagun am tingganai nilo nangiou koson mampalabus ra ulipon nilo, am kalo igogondo' boo mangulipon risilo. Koon raginio noyo binaal nilo.

¹¹Kaa' kalo nabuoi raginio, kinulau nilo pangkaraan. Inalap nilo saguli' ulipon-ulipon ondo' pinalabus no am jinajalan ilo masauk saguli' ra ulipon.

¹²Ginio ra TUHAN,

¹³i Aki Kapuuno' ru Israil, nanusub raki' minindagu ra ulun raginio, “Nakimabantu' Aku ra kinamatuaan min paat ra Aku nagibit risilo miningkual intor ra Misir am nampalabus risilo intor ra pangulipanan. Nambala' Aku risilo ra

¹⁴moonong tulu' ngambilor musiti' nilo palabuson osoi ayuk ulun ru Ibrani ondo' nasauk ra ulipon nilo buoi onom ngambilor. Kaa' kinamatuaan nilo kalo nampalio kapoam riminongog ra ragu Kuno.

¹⁵Kukula' ngoorou ra nakasail, nambaal kau ra baal ondo' mapabansuk ra guang Kuno. Akau ngaangai' nangiou koson mampalabus ra gino ngai' ru bansa' min ondo' nasauk ra ulipon. Nambaal kau ra nabantuan ra saang Kuno giu' ra Baloi Kuno, intok Aku sambaan.

¹⁶Kaa' akau pana nangulau ra pangkaraan am nagasab Raki'. Ulipon-ulipon ondo' pinalabus min sumugut ra kasagaan min, inalap min saguli' am jinajalan min nasauk saguli' ra ulipon.

¹⁷Ginio ra raino, Aku TUHAN, minindagu: Kalo giminagaya' kau Raki'; kalo linabusan min gino ngai' ru bansa' min ondo' nasauk ra ulipon. Amon ru ginio poyo, aniin Takamin ra kalabusan: kalabusan koson ra matoi sabap ra pangayawan, maruol tumapik am bitilan. Mangkinibit Aku ra moonong bansa' ra tana' ti malaa' magilong ra baal ondo' baalon Kuno ramuyun.

¹⁸Pagawai-pagawai ru pagun Jiuda am Jirusalim, mabaya' ra pagawai-pagawai ru istana, imam-imam, am ngaangai' ru mamagun nambaal ra nabantuan Raki'. Sinimbalui nilo sapi' gawayan am tinata' piniruo, am minugar ra pangkilolot ru sapi' no koson mangiou ra nabantuan no. Kaa' inanggal nilo nabantuan no am kalo sinugut ragu-ragu inaru' noyo. Ginio ra pamakuan Kuno risilo koson ra pinamakuan nilo ra sapi' gawayan no.

²⁰Pataakon Ku ilo ra pantula' ondo' masaga' mamatoi risilo. Baangkai nilo akanon ru susuit am bibiag masigo.

²¹Pataakon Ku niayuk Raja' Jidikia intor ra Jiuda, am pagawai-pagawai nano ra ulun ondo' masaga' mamatoi risilo. Pataakon Ku ilo ra saujor ru Babilonia, ondo' liminonggo' namulunsar ramuyun.

²²Manusub Aku, am ilo pana mamulunsar ra bandar ti saguli'. Gaawon nilo bandar ti am solobon. Saukon Ku bandar-bandar giu' ra Jiuda koson ra tana' kaagisan ondo' kalo ayanin ru ulun. Aku, TUHAN, nakaindagu noyo.”