Read Timugon Murut JIRIMIA 37 Bible Online

JIRIMIA 37 - Timugon Murut bible

JIRIMIA 37

¹Raja' Nibukadnijar intor ra Babilonia, nampalantik ra Raja' Jidikia anak ungkuyon ru Raja' Josia nasauk ra raja' ru Jiuda koson namalit ra Raja' Joyakin anak ungkuyon ru Raja' Joyakim.

²Kaa' Raja' Jidikia, pagawai-pagawai nano, am mamagun kalo giminagaya' ra tanou ru TUHAN ondo' pinataak Nali ondo' pinabala' galing raki'.

³Nanusub Raja' Jidikia ri Jukal anak ri Silimia, am Imam Jipanya anak ri Maasiya koson makitaak ra aku makiasi' ra TUHAN, i Aki Kapuuno' takau, tayar ru pagun takau.

⁴Paat raginio lakat poyo kalo inaput aku am lakat poyo makaugar-ugar ra gino ngai' ru mamagun.

⁵Saujor ru Babilonia tatanga' nagawang ra Jirusalim. Kaa' paat ra ilo nokorongog ra saujor ru Misir nakaingkual noyo intor ra Misir koson mangayou, liminugut ilo.

⁶Kopongo raginio TUHAN, i Aki Kapuuno' ru Israil, nanusub raki'

⁷mindagu ra Raja' Jidikia, “Saujor ru Misir tatanga' matong mangindangan rirun, kaa' muli' ilo.

⁸Mopongo raginio matong poyo saujor ru Babilonia am mamulunsar ra bandar ti; gaawon am solobon nilo ginio.

⁹Aku, TUHAN nampakara' ramuyun maa' raginio pai' min ruungo' inan galama' ra mangkara' ra saujor ru Babilonia kalo rumuli'. Maaru' rumuli' ilo.

¹⁰Amon ru makasugut kau mangala ra ngaangai' saujor ru Babilonia, saboi ondo' soroi ayuk am ulun ondo' nangapilatan giu' ra ralalom ru kim-kim, kaa' tumirong ilo am monolob ra bandar ti saboi makai'.”

¹¹Iniruanan ru saujor Babilonia Jirusalim sabap ra saujor ru Misir riminibok minongoi ra bandar no.

¹²Ginio ra iniruanan ku Jirusalim am minongoi ra wilayah Binjamin koson mangapu ra tinungkus kuno intor ra matuo kuno.

¹³Kaa' paat ra aku nakasaboi giu' ra Kulobon Garabang Binjamin, sangulun pagawai ru saujor ondo' nangandoi ra giu' no, ondo' ininggalanan ri Jiria anak ri Silimia am akupu ri Gananya, nonombot raki' am indagu, “Masaga' kou magiru' ra bala ru ulun Babilonia!”

¹⁴Indagu aku, “Kalo! Sala' ka kuayan kuno magiru' ra bala ru pantula'.” Kaa' kalo mangintopot i Jiria. Rinakop no aku am inibit aku paumaa' ra pagawai-pagawai ru saujor.

¹⁵Siminangit ilo raki' am nanusub ra lambaan am aputon aku giu' ra baloi ri Jonatan, mamamatik ru pagun. Paat raginio baloi nano sinauk noyo ra pangaputan.

¹⁶Pinaumpos aku ra rondo' lamin giu' ra gana' ru tana', am nabuoi aku inaput ra giu' no.

¹⁷Kopongo raginio nampiau Raja' Jidikia raki' muma' riso giu' ra istana. Giu' no sininok ru raja' nangkuot raki', “Mokoondo' kia ra tanou intor ra TUHAN?” Taam aku, “Mokoondo', okou raja' pataakon ra raja' ru Babilonia.”

¹⁸Pangkuot aku boo riso, “Atan kia kasalaan kuno rirun raja', pagawai-pagawai muno, am mamagun, saboi pinasubol mu aku ra ralalom ru pangaputan?

¹⁹Ati kia nabi-nabi muli ondo' nanala' ra raja' ru Babilonia kalo mamulunsar rirun am pagun ti?

²⁰Raino, kasaga' no rumongog raki' am mangiou ra kitaakon kuno. Pai' aku no boo pasubolo' ra baloi ri Jonatan, sabap ra matoi aku ra giu' no.”

²¹Ginio ra nanusub Raja' Jidikia ra aputon aku giu' ra liliut ru istana. Minayan aku ra giu', am moonong orou aniin aku ra rondo' ruti' maayo intor ra intok ru ulun mambaal ra ruti', saboi ra bandar no nakayaan ra ruti'.