Read Timugon Murut JIRIMIA 39 Bible Online

JIRIMIA 39 - Timugon Murut bible

JIRIMIA 39

¹Paat ra sila' koopor, bilor kasiam ra pamarintaan ru Raja' Jidikia giu' ra Jiuda, Raja' Nibukadnijar intor ra Babilonia minatong namulunsar ra Jirusalim nabaya' ra ngaangai' saujor nano.

²Paat ra orou kasiam, sila' kaapat, bilor koopor am rondo' ra pamarintaan ru Raja' Jidikia, nakasugut pantula' nampalunsai ra timbok ru bandar. (

³Paat ra Jirusalim ginaau,[43] ngaangai' pagawai masawat ru raja' ru Babilonia minatong am nanturung giu' ra Kulobon Garabang Tanga'. Ilo iono Nirgal-Sarijir, Samgar-Nibo, Sarsikim, ulun manalingapu ra istana, am i Nirgal-Sarijir Rabmag.)

⁴Paat ra Raja' Jidikia am ngaangai' ru saujor nano nakakito ra kasaukan no, nangkinam ilo nagiru' intor ra bandar no paat ra rondom. Miningkual ilo nansail ra taman ru istana am kulobon garabang nantuuman ru karuruo timbok giu' ra intok raginio, am pagiru' mongoi ra tampilon ru Limayak Jordan.

⁵Kaa' saujor ru Babilonia nangilou risilo am namparakop ra Raja' Jidikia giu' ra pipit mamaar ra Jiriko. Inibit nilo io minuma' ra Raja' Nibukadnijar ondo' paat raginio soroi giu' ra bandar Ribla giu' ra libung Gamat. Giu' no nangukuman ru Raja' Nibukadnijar riso.

⁶Giu' ra bandar Ribla niayuk anak ungkuyon ru Raja' Jidikia pinatoi giu' ra saang ru Raja' Jidikia galama', am ngaangai' pagawai pamarintaan ru Jiuda pana pinatoi.

⁷Kopongo raginio mato ru Raja' Jidikia kinuol, io pana rinantai am inibit ra Babilonia.

⁸Liliwa' raginio ulun ru Babilonia nonolob ra istana ru raja' am baloi ru mamagun, am niayuk nampalunsai ra timbok ru Jirusalim.

⁹Pupus no, i Nibujaradan, panglima saujor no, nagibit ra mamagun ondo' lakat poyo giu' ra bandar minongoi ra Babilonia koson ra ulun rinakop. Nagibit io niayuk ra ngaangai' ulun ondo' minaya' riso, minongoi ra Babilonia.

¹⁰Tinatang no kukula' ngaulun ondo' musikin kaga' giu' ra Jiuda, ilo ondo' kolondo' linonggom ra atan pana, am inanian no ilo ra umo ru anggur am umo.

¹¹Nanusub Raja' Nibukadnijar ri Nibujaradan, panglima saujor no, napaingkual ra susuban raginio,

¹²“Ongoi noyo uyumo' i Jirimia am alungi' io toojo. Pai' io jamari', kaa' iowo' noyo atan ayuk kitaakon nano.”

¹³Ginio ra i Nibujaradan, nababaya' ra pagawai masawat ondo' ininggalanan ri Nibusyajban am i Nirgal-Sarijir, am niayuk ngaangai' pagawai ru raja' ru Babilonia,

¹⁴nangalap raki' intor ra liliut ru istana. Pinataak nilo aku ra paalungin ri Gidalia anak ri Agikam, akupu ri Sapan, ondo' musiti' mangator raki' muli' ra maayag. Ginio ra minayan aku ra giu' no nababaya' ra mamagun.

¹⁵Paat ra aku lakat poyo inaput giu' ra liliut ru istana ragili, nanusub TUHAN raki'

¹⁶mambala' ri Ibid-Milik, ulun ru Itiopia[44] no, ra TUHAN Ondo' Maayo Kaga' Kuasa', i Aki Kapuuno' ru Israil, minindagu koon ragitio, “Koson ra rinagu Ku ragili, mamparatong Aku ra kapusaan am sala' ka kaansayan ra bandar ti. Paat ra baal raginio masauk ra maagu no, soroi kou ragiti koson tumainu raginio.

¹⁷Kaa' Aku, TUHAN manindung rirun, am kalo pataakon kou ra ulun ondo' kalaanin muno.

¹⁸Okou bayagon Ku, am kalo potoyon kou. Maayag kou sabap ra mangintopot kou Raki'. Aku, TUHAN, nakaindagu noyo.”