Read Timugon Murut JIRIMIA 4 Bible Online

JIRIMIA 4 - Timugon Murut bible

JIRIMIA 4

¹Indagu TUHAN, “Ulun ru Israil, amon ru masaga' kau sumaguli', saguli' kano Raki'. Amon ru gumagaya' kau Raki' am mamatir ra sinungkalalaing ondo' kasisangin Kuno,

²makapagibot kau ra ralalom ru inggalan Kuno. Mopongo raginio[3] ngaangai' bansa' makibarakat ilo Raki', am mongompor ilo Raki'.”

³Indagu TUHAN ra mamagun ru Jiuda am Jirusalim, “Kondoyo' tana' mino ondo' kalo poyo nakandoi; pai' tiasi' ra sampug giu' ra intok ru tutuu' makaruui.

⁴Guuto' min nabantuan min am Aku, TUHAN min; patimpoko' inan min Raki', akau mamagun ru Jiuda am Jirusalim. Amon ru kalo, sangit Kuno sumolob koson ra apui ondo' kalo malasa' ru osoi pana, sabap ra ngaangai' binaal min ondo' malaat!”

⁵Samputi' noyo bujung giu' ra titikop pagun! Golok no ra mosongou am matalinaasan. Susubo' noyo mamagun ru Jiuda am Jirusalim magiru' ra bandar-bandar mokoondo' ra kubu.

⁶Panulu' no ra ralan mongoi ra Sion! Ribaki' bayago' inan! Pai' kalibut! Tatanga' TUHAN maparatong ra karaat am kapusaan maayo intor ra ralayo.

⁷Koson ra singa' mingkual intor ra pansibunian nano, koon raginio noyo ra i mampaluus ra bansa'-bansa' minintor noyo. Matong io koson mamuso ra Jiuda. Bandar-bandar Jiuda masauk ra intok nangapuut, am kalo ayanin ru ulun.

⁸Ginio ra pantangi' no am panulaboi no, pambayang no ra konoon karung tatandu' ra mangiluk guang, sabap ra sangit ru TUHAN ondo' bibilak ra Jiuda kalo poyo nakalinos.

⁹Indagu TUHAN, “Paat orou raginio raja'-raja' am pagawai-pagawai mangalawo guang; imam-imam makasioro' am nabi-nabi maliangan.”

¹⁰Kopongo raginio indagu aku, “Iou TUHAN Raja', totopot Kou namparuung ra mamagun ru Jirusalim! Minindagu Kou ra mokoondo' kaansayan, kaa' raino painawo nilono mololob.”

¹¹Masuku' paat no ra mamagun ru Jirusalim binalaan ra angin malasu' intor ra tana' kaagisan tatanga' sumiob mongoi risilo. Angin no sala' ka angin ondo' mapasiab ra apol,

¹²kaa' bagiu' mapuor ondo' matong ra susuban ru TUHAN. TUHAN galama' ondo' mangukum ra ulun Nano.

¹³Ilai' pantula' matong koson ra gaun. Kurita' kuda nano koson ra bagiu' puting beliung, am kuda nano maribok poyo intor ra susuit kanui. Nalumpa' takau ru karaat! Maluus takau!

¹⁴Okou Jirusalim, kapasawo' guang muno intor ra ngaangai' kalaatan maa' raginio bayagon kou. Saboi sanggilan kou mangkara' ra malaat?

¹⁵Ulun-ulun sinusub intor ra bandar Dan am niayuk kabuluran Ipraim matong koson mampatanou ra tanou malaat.

¹⁶Mampakara' ilo ra bansa'-bansa' am mambala' ra mamagun ru Jirusalim ra pantula' tatanga' matong intor ra pagun ondo' maalur. Pantula' gumolok koson manggal ra bandar-bandar Jiuda

¹⁷am magawang ra Jirusalim koson ra ulun magalung ra umo. Ngaangai' baal raginio masauk sabap ra mamagun ru Jiuda giminuor noyo ra TUHAN. Nakaindagu noyo TUHAN.

¹⁸Okou Jiuda, okou galama' namparatong ra karaat no rirun. Ralan ru kaayagan am binaal muno ondo' makatula nangkinibit ra ngaangai' ru kaimbalaan no, am nanusuk ra guang muno.

¹⁹Mapara' boo pari' ru guang kuno. Kalo boo moorot ku imbolo'. Guang kutu kobol-kobol, kalo mokororo' aku, sabap ra nokorongog aku ra bolos ru bujung, am golok ru pangayawan.

²⁰Karaat mansusunu' matong, titikop pagun mapuso. Pulali' ru kim mai linunsai, konoon-konoon no rinilak.

²¹Saboi sanggilan kia musiti' aku magilong ra kinoporos ru pangayawan, am rumongog ra bolos ru bujung ondo' makalanit ra talingo?

²²Indagu TUHAN, “Sasambungon ulun Kuno; kalo makaulig ilo Raki'. Koson ilo ra lalaing sasambungon, kolondo' karatian nilo. Mapandai ilo toojo mambaal ra malaat, kaa' mailo mambaal ra moonsoi.”

²³Tantangin ku tana' ti — makito ra kolondo' atan pana am mapua'. Tingaanon ku limbowon — kolondo' noyo sinda.

²⁴Tingaanon ku gunung-gunung — ngaangai' no nonontol, am bulur-bulur mangauyog.

²⁵Kolondo' nakito ku ra ulun; susuit pana ngaangai' nansiab.

²⁶Tana' malabung nasauk noyo ra tana' kaagisan; bandar-bandar nangapuut, sabap ra siminangit kaga' TUHAN. (

²⁷Minindagu TUHAN ra titikop ru tana' ti masauk ra tana' kaagisan, kaa' kalo pusoon No lingono'.)

²⁸Tana' ti mangulir; limbowon pana lumondom. Nakaindagu noyo TUHAN kalo kulawon inatangan. Namatas Io noyo am kalo kulawon guang.

²⁹Posongonsol pulalai mangkuda am mamanah, mangkinibit ra ulun magiru' intor ra ngaangai' bandar. Mokoondo' ulun nagiru' ra kataunan, ondo' bokon nagaloi ra bulur batu. Ngaangai' bandar iruanin, kolondo' ulun ondo' masaga' mayan ra giu' no.

³⁰Alii ra Jirusalim, malumpa' kou ru karaat! Kua pambayang kou ra malia'? Kua palimpor kou ra mas kapoam pirok, am niayuk manait ra mato? Banangan mu ayuk mampapakai! Ngaangai' ru kubayau muno ra galing i magasab rirun am niayuk masaga' ilo mamatoi rirun.

³¹Morongog ku bolos mampalaa koson ra ruandu' maganak; koson ra golok ru ruandu' ondo' naganak ra anak kasaa'. Koon raginio noyo tangi' ru Jirusalim ondo' inso-inso, am niayuk mapatunui ra kalindu' am mindagu, “Aibui boo raki'! Matong ilo mamatoi raki'!”