Read Timugon Murut JIRIMIA 48 Bible Online

JIRIMIA 48 - Timugon Murut bible

JIRIMIA 48

¹Koon raginio noyo ragu ru TUHAN intor ra pagun Moab, “Pakaasi' no ra mamagun ru Nibo — napuso noyo bandar nilo! Ginaau noyo bandar Kiryataim, linunsai noyo kubu nano ra maikang, am mamagun nano tinauyu';

²katulayan ru Moab liminiot noyo. Ginaau noyo ru pantula' bandar Gisybon; pantula' naguguum koson mamuso ra bansa' ru Moab. Bandar Madmin masauk ra masiluk; saujor ru pantula' mamulunsar riso.

³Mamagun ru bandar Oronaim giminolok, ‘Kalaatan! Kapusaan!’

⁴“Pinuso noyo Moab; rongogo' tangi' ru lalaing-lalaing.

⁵Rongogo' ilo mantangi' ra sasusulikok giu' ra galur ru ralan magaloi mongoi ra bandar Lugit, nantangi' ilo sabap ra mangiluk guang, giu' ra galur ru ralan tumuun mongoi ra bandar Oronaim.

⁶‘Ribaki' noyo!’ konilo. ‘Pagiru' no am bayago' inan muno! Pagiru' no koson ra kaladai masigo giu' ra tana' kaagisan!’

⁷Okou Moab, malansan kou ra kaikangan am kalangkayaan muno, kaa' raino okou pana kalaan; i Kamos, dewa min, nabaya' ra imam-imam am pagawai ru pamarintaan patirin ra pagun ra bokon.

⁸Rondo' bandar pana kalo makalabus intor ra kapusaan, bulur am limayak pusoon! Aku, TUHAN nakaindagu noyo.

⁹Baali' kalalair ra batu tatandu' ra Moab no, pagun no mataki' pusoon. Bandar-bandar nano lunsayon, am kalo boo ayanin ru ulun.”

¹⁰Ulaso' noyo ulun ondo' kalo mambaal ra kandoi ru TUHAN ra sotopot ru guang! Ulaso' noyo ulun ondo' kalo mamutus ra ilang am mampatoi!

¹¹Indagu TUHAN, “Buoi ri Moab magail maayag ra mamimio, am kalo igondo' pinatiran ra pagun ra bokon. Moab koson ra wain ondo' pinaingkonor, ra kalo inangkuyau kapoam pinalingig intor ra rarapu' pinoongoi ra rarapu' ra bokon. Liman no lakat poyo maamis am owou no lakat poyo maamis.

¹²“Ginio ra raino nasaboi paat no manusub Aku ra ulun mampalingig ra Moab koson ra wain. Koyoon nilo suang ru rarapu' ru wain am babakon.

¹³Kopongo raginio ulun ru Moab sindualin ri Kamos, dewa nilo, koson ra ulun ru Israil sinindualan ri Bitil, dewa ondo' inintopot nilo.

¹⁴Mamagun kau ru pagun Moab, kua pangkara' kau ra inan koson ra ulun tutumula', am koson ra saujor maikang ondo' kininaman ralalom ru pangayawan?

¹⁵Moab am bandar-bandar nano pinuso noyo; ulun mamulok no ondo' moonsoi kaga' pinatoi. Aku noyo raja', TUHAN Ondo' Maayo Kaga' Kuasa', am Aku nakaindagu noyo.

¹⁶Karaat ra tayar ru Moab mamaar noyo sumuku', kalo boo mabuoi Moab mapuso.

¹⁷“Pangulir no ra tayar ru bansa' raginio, mamagun kau ondo' mamaar, akau ngaangai' nakaulig ra inggalan nano. Indagu kano, ‘Kuasa' ru pamarintaan nano tinutuk noyo; katulayan am kaikangan nano pana liminiot noyo.’

¹⁸Akau ondo' namagun giu' ra bandar Dibon, tuun no intor ra intok min ondo' naurumat, am turung no ra ralalom ru kaau ra tana'. Ulun mamuso ra Moab nakasaboi noyo, am nampalunsai ra ngaangai' kubu nano.

¹⁹Akau ondo' minayan giu' ra bandar Aroir, bigor no giu' ra kiing ru ralan am paginaa no; kuati' noyo ulun ondo' tatanga' magiru', intor ra baal ondo' nasauk.

²⁰Tumaam ilo, ‘Naratu' noyo Moab! Tinauyu' noyo Moab; tangii' noyo Moab. Potonowo' noyo giu' ra galur ru Sungoi Arnon ra napuso noyo Moab!’

²¹“Ukuman pinaratu' noyo ra bandar-bandar giu' ra intok tana' marata' masawat: giu' ra Golon, Jagas, Mipaat,

²²Dibon, Nibo, Bit-Diblataim,

²³Kiryataim, Bit-Gamul, Bit-Mion,

²⁴Kiriot, am Bojra. Ngaangai' bandar ra pagun ru Moab, maalur am mamaar, inukum noyo.

²⁵Kaikangan ru Moab tinutuk noyo; kuasa' nano pinandak noyo. Aku, TUHAN, nakaindagu noyo.”

²⁶Indagu TUHAN, “Liminimbau Moab Raki', ginio ra gaukon io. Magiluluir Moab ra ralalom ru lua' nano galama', am kuritin boo ru ulun.

²⁷Okou Moab, nakara' mu kia ragili kinuritan mu ulun ru Israil am sinimbaalan ilo ra ragu ilain koson ra narakop ra narampatan nababaya' ra ulun mantakou?

²⁸“Mamagun kau ru Moab, iruani' bandar-bandar mino! Ongoi no ra bulur batu am ayan no ra giu' koson ra susuit asang ondo' nanabunsut giu' ra tobo ru lagam.

²⁹Lumimbau kaga' Moab! Nokorongog aku ra mapara' kinasumbung, kinasawat ru guang, kinalimbau ru mamagun ru Moab no! Mangkara' ilo kaga' ra inan galama'.

³⁰Aku, TUHAN nakapandai ra kinasumbung nilo! Masawat ragu nilo kolondo' ampos, am binaal nilo kolondo' onong!

³¹Ginio noyo sabap ra tangiin Ku ngaangai' mamagun ru pagun Moab am Kir-Giris.

³²Tangiin Ku mulu' poyo ra mamagun ru Sibma intor ra mamagun ru Jaijir. Okou bandar Sibma, okou koson ra puun ru anggur ondo' bulisang nano luminungkaap suku' ra sandaup ru Raat Matoi, koson ra galur ru bandar Jaijir. Kaa' raino kinawa' ru bulintok malasu' muno am kawa' ru anggur muno pinuso noyo.

³³Kaansukan am magilakup kalio boo intor ra tana' Moab ondo' malabung. Pinolonggo' Ku tilis ru wain intor ra mampalia' ra wain; kolondo' boo ulun ondo' mambaal ra wain am magilakup ra maansukan.

³⁴“Mamagun ru bandar Gisybon am Iliali mantangi' saboi tangi' nilo morongog giu' ra Jagas, am niayuk norongog ru ulun intor ra Joar saboi ra Oronaim am Iglat-Silisia. Sungoi Nimrim pana nalasakan noyo.

³⁵Polonggoon Ku mamagun ru Moab intor ra monolob ra taak simbalui giu' ra intok-intok sambaan nilo, am mopolonggo' risilo mampataak ra taak simbalui ra dewa-dewa nilo. Aku, TUHAN, nakaindagu noyo.

³⁶“Ngaangai' rapu' linonggom ru mamagun Kir-Giris am Moab kalio boo. Mangiluk aku magilong ra baal nilo; koson Aku ra ulun ondo' manamput ra tulali lalayuk ru rimbai panguliran.

³⁷Ilo ngaangai' nangaur ra abuk am jangut, namilat ra kalindu', am nambayang ra karung koson tatandu' mangiluk guang.

³⁸Giu' ra rasawat ru taap ru baloi am giu' ra ngaangai' padang giu' ra Moab kolondo' morongog atan-atan pana ondo' ak am sinulaboi, sabap ra tinutuk Ku noyo Moab koson ra rarapu' ondo' kalo kasagain ru ulun.

³⁹Tinutuk noyo Moab! Pantangi' no! Tinauyu' noyo Moab! Nalunsai noyo Moab. Ngaangai' pagun ra paginggaar nakakurit ra Moab. Aku, TUHAN, nakaindagu noyo.”

⁴⁰Binantu' noyo ru TUHAN ra rondo' bansa' manumbit ra Moab koson ra sanginan kanui ondo' nanumbit ra kawo no nabingkal.

⁴¹Bandar-bandar am kubu-kubu gaawon. Paat orou raginio saujor-saujor ru Moab mangalaa' koson ra ruandu' tatanga' maganak.

⁴²Mapuso Moab am sala' ka boo rondo' bansa', sabap ra Moab liminimbau Raki'.

⁴³Tontol, luang, am jajaling tatanga' maginaa ra mamagun ru Moab. TUHAN nakaindagu noyo.

⁴⁴Ulun ondo' mangkinam magiru' intor ra tontol raginio maratu' ra ralalom ru luang, am ulun ondo' mangkinam mingkual intor ra luang no makasubol ra ralalom ru jajaling, sabap ra TUHAN nangaru' noyo ra paat katutukan ru Moab.

⁴⁵Ulun nagigiru' ondo' kalo maikang kuminam sumindung giu' ra Gisybon, bandar ondo' igondo' kinuasa' ru Raja' Sigon, kaa' raino bandar no tatanga' nosolob. Apui nangumpo ra intok giu' ra balitan am giu' ra intok kagunungan ru Moab, pagun ru ulun ondo' masaga' mangayou.

⁴⁶Pakaasi' no ra ulun ru Moab! Bansa' ondo' sumamba ra Dewa Kamos napuso noyo; anak ungkuyon am anak ruandu' nilo rinakop noyo koson ra ulun rinakop.

⁴⁷Kaa' paat ra orou matong no, saukon ru TUHAN Moab ra langkaya' saguli'. Nakaindagu noyo TUHAN ra ngaangai' baal raginio masauk ra Moab.