Read Timugon Murut JIRIMIA 5 Bible Online

JIRIMIA 5 - Timugon Murut bible

JIRIMIA 5

¹Mamagun kau ru Jirusalim, ugar kano ra ralan-ralan giu' ra bandar min! Ilai' giu' ra liliut min! Ilai' galama'! Uyumo' giu' ra pasar-pasar! Mokoondo' kau kia nakatuum ra sangulun ondo' mabanis guang am ondo' mirot maa' raginio gumagaya' ri Aki Kapuuno'? Amon ru mokoondo', mangampun TUHAN ra Jirusalim.

²Kabalu' pana kamin sumamba kau ra TUHAN, sala' ka ginio guangon min.

³Sotopot no gogoton ru TUHAN gagaya'. Lambaan No akau, kaa' kalo lioon min. Popolon No akau, kaa' marara' kau mangapu ra pangilaan. Mokotog guang min am marara' tumalikur intor ra tula.

⁴Aku pana nangkara', “Ilo no ulun ayuk ondo' kolondo' napandayan ra atan pana. Sasala' baalon nilo; kalo makapandai ra gogoton ri Aki Kapuuno' nilo, am kasagaan ru TUHAN risilo.

⁵Mongoi aku ra tingganai-tingganai am mindagu risilo. Maaru' makapandai ilo ra gogoton ri Aki Kapuuno' nilo, am susuban ru TUHAN nilo.” Kaa' ilo ngaangai' nangimpai ra kakuasaan ru TUHAN am marara' gumagaya' Riso.

⁶Ginio sabap ra ilo pinatoi ru singa' intor ra kataunan; bibinsangon ilo ru taani intor ra tana' kaagisan, am ampunguon saugar-ugar giu' ra bandar-bandar nilo. Amon ru mingkual ulun, bibinsangon nilo, sabap ra tula nilo masuang kaga'; ruruli' ilo no nangiruan ri Aki Kapuuno'.

⁷Indagu TUHAN, “Kua kia musiti' Aku mangampun ra tula ru ulun Kuno? Nangiruan ilo Raki' am sumamba ra tuhan ondo' kalo motopot. Aniin Ku ulun Kuno ra akanon saboi ilo maasug, kaa' nansawa' ilo am minongoi ra baloi ru ulun mantalan ra inan.

⁸Koson ilo ra kuda gawayan ondo' molomok am maikang mampaa'; sigagama' lumaai ra andu' ru ulun bokon.

⁹Kalo kia matanda' ra Aku mangukum ra bansa' koson raginio am mambalos ra binaal nilono?

¹⁰Mangator Aku ra pantula' koson mampaluyak ra umo ru anggur ru ulun Kuno, kaa' sala' ka koson mamuso ra malingon. Manusub Aku ra pantula' mangindaan ra bulisang ru puun ru anggur, sabap ra bulisang-bulisang no sala' ka Aku tatangan.

¹¹Mamagun ru Israil am Jiuda totopot nanumbalik Raki'. Aku, TUHAN nakaindagu noyo.”

¹²Ulun ru TUHAN mindagu ra baal ondo' kalo motopot intor ra TUHAN. Konilo, “Kolondo' atan pana baalon Nano.[4] Kalo malumpa' takau ra karaat; kalo boo makaili' takau ra pangayawan kapoam bitilan.”

¹³Minindagu ilo ra nabi-nabi no magabau ayuk sabap ra kolondo' ilo ra tanou intor ra TUHAN. TUHAN i Aki Kapuuno' Ondo' Maayo Kaga' Kuasa' minindagu raki', “Okou Jirimia, sabap ra ngaangai' ru ulun ti minindagu koon raginio, saukon Ku ragu Kuno koson ra apui giu' ralalom kabang muno. Bansa' ragitio masauk koson ra tataun, am apui no monolob risilo.”

¹⁵Ulun kau ru Israil, tatanga' TUHAN mamparatong ra rondo' bansa' intor ra pagun maalur koson mamulunsar ramuyun. Bansa' no maikang kaga' am soroi noyo intor ra galing i poyo. Kalo maratian min ragu nilono.

¹⁶Ulun-ulun mamanah nilo saujor ondo' baani; mampatoi ilo ra kalo makaasi'.

¹⁷Mangai' ilo ra ampos ru tana' am akanon min; mampatoi ilo ra anak min, ungkuyon am niayuk ruandu'. Simbaluyon nilo sapi' am domba min; pusoon nilo puun ru anggur am puun ru ara min. Bandar-bandar ra makakubu ondo' lansanin min puuton ru saujor nilo.

¹⁸Indagu TUHAN, “Kaa' paat raginio pana kalo mamuso Aku ra ulun Kuno ra malingon.

¹⁹Paat ra ilo mangkuot ra sasaban Kuno nambaal raginio ngaangai', balai' ilo Jirimia, ra koson ra ilo nangiruan Raki' giu' ra pagun nilo galama' am nangandoi ayuk ra dewa-dewa ru bansa' bokon, koson raginio niayuk ilo mangandoi ayuk ra bansa' bokon giu' ra tana' ondo' sala' ka pagun nilo.”

²⁰Indagu TUHAN, “Balai' papag ri Jakub ondo' minayan giu' ra Jiuda:

²¹Rongog no, ulun kau ra sasambungon am iisan! Makamato kau kaa' kalo makakito; makatalingo kaa' kalo rumongog!

²²Aku no TUHAN; kua pai' kau kalaa' Raki'? Kua pai' kau ponontol ra saang Kuno? Saukon Ku nagas koson ra balitan ru raat ondo' kalo masailan ra sabuoi-buoi no. Raat pana makakinulun am kinulun rumulun ra manggayo, kaa' kalo makasail ra balitan no.

²³Kaa' mokotog guang min am maanggal-anggal; timinalansiang kau am nangiruan Raki'.

²⁴Kalo igondo' min karaa' koson mangurumat Raki', alika Aku noyo nangator ra rasam bulintok raun matutu' am bulintok mambusak. Nangani' Aku niayuk ramuyun ra bulintok mangkumos ra moonong bilor.

²⁵Kaa' tula min nongompong ra ngaangai' baal moonsoi no saboi ra akau kalo makasia' raginio.

²⁶Ulun malaat minayan ra gino ngai' ru ulun Kuno. Koson ilo ra ulun ondo' maginaa ra landak pinasaau koson mamparakop ra susuit, sabap ra pinasaau nilo landak koson mamparakop ra ulun.

²⁷Koson ilo ra ulun mamparakop ra susuit ondo' nanuang ra bulansat no ra susuit, sabap ra nanuang ilo ra baloi no ra kuliamos ondo' noowot ra namparuung. Koon raginio noyo nasauk ra ilo makakuasa' am liminangkaya',

²⁸am niayuk molomok am moonsoi bayag. Kalaatan nilo kolondo' polos. Kalo mangindangan ilo ra anak nailusan ra matuo, am kalo matimpok ra ulun inimbolo'.

²⁹Kaa' Aku, TUHAN mangukum risilo sabap ra ngaangai' baal raginio; balasin Ku binaal ru bansa' ragitio.

³⁰Rondo' baal ondo' makalalaa' am malaat masauk ra pagun ti:

³¹ngaangai' ondo' rinagu ru nabi-nabi abau ayuk; imam-imam mamarinta maya' ra susuban ru nabi-nabi no, am ulun Kuno masaga' ra baal raginio. Kaa' atan kia ondo' baalon nilo ra pupus no?”