Read Timugon Murut JIRIMIA 50 Bible Online

JIRIMIA 50 - Timugon Murut bible

JIRIMIA 50

¹Gitio noyo ragu ru TUHAN ondo' pinasaboi Nano raki' intor ra bandar Babil am mamagun nano:

²“Pabalaa' noyo tanou raginio ra bansa'-bansa'! Potonowo' noyo tanou no! Pabilaro' noyo bandira' am potonowo' tanou no! Pai' sibunio' tanou no! Naratu' noyo bandar Babil! Mirodak, dewa nano inumok noyo! Sinungkalalaing ru Babil tinauyu' noyo, sinungkalalaing nano ondo' majamol no inumok noyo!

³“Rondo' bansa' intor ra ralayo minatong noyo koson mamulunsar ra Babilonia am nampasauk ra pagun no ra tana' kaagisan. Ulun am bibiag magiru', am kolondo' boo mayan ra giu' no.”

⁴Indagu TUHAN, “Masaboi paat no, mamagun ru Israil am Jiuda matong mababaya' liliwa' mantangi' am maguyum Raki', i Aki Kapuuno' nilo.

⁵Mangkuot ilo ra ralan mongoi ra Sion, am sumuku' ra giu' no. Mambaal ilo ra rondo' nabantuan mantilayun Raki', am kalo lumungkang raginio saboi ra sabubuoi no.

⁶“Ulun Kuno koson ra sampanon ru domba ondo' pinoloso makalayau giu' ra gunung-gunung ru ulun-ulun magagalung nilo. Koson ilo ra domba ondo' timinanggau intor ra gunung mongoi ra gunung, am nakalilian noyo ra intok inayanan nilai.

⁷Binulunsar ilo ru osoi ayuk ondo' nakakito risilo. Indagu pantula' nilo, ‘Ulun ragitio makatula noyo ra TUHAN. Ginio ra atan ondo' baalon takau kolondo' sala. Kinamatuaan nilai mangintopot ra TUHAN, am musiti' no ilo pana gumagaya' ayuk Riso.’

⁸“Ulun kau ru Israil, pagiru' no ra Babilonia! Iruani' pagun raginio! Akau musiti' magulu mangiruan ra pagun no!

⁹Susubon Ku kukula' bansa' ondo' maikang intor ra ralayo, am mangkinibit risilo mamulunsar ra Babilonia. Banison nilo barisan ru saujor koson mangayou ra Babilonia, am mangala riso no. Ilo mampalula' ra matasik. Paat ra ilo mamanah, totopot panah nilo makatiu' ra tuma' no.

¹⁰Gaawin Babilonia, am ulun mampagaau no mangalap ra atan ayuk ondo' kasagaan nilo. Aku, TUHAN, nakaindagu noyo.”

¹¹Indagu TUHAN, “Mamagun kau ru Babilonia, ginaawan min ulun Kuno. Maansukan kau am magilakup, tumindak-tindak koson ra sapi' ondo' mangagik ra gandum kapoam koson ra kuda ondo' mampagala',

¹²kaa' bandar min galama' ondo' maayo no asabin am tauyuon. Babilonia masauk ra pamarintaan ondo' kalo toojo maatang intor ra ngaangai' pamarintaan. Babilonia masauk ra tana' kaagisan ondo' mapua' am kolondo' tutuu'.

¹³Sabap ra sangit Kuno, kolondo' osoi pana mayan giu' ra Babil. Babil no masauk ra malunsai, am ngaangai' ulun ondo' mansail ra giu' no makatigog am mangimuag.

¹⁴“Pulalai kau ru mamanah, pabaniso' barisan ru saujor am pagawangi' Babil. Patumaa' ngaangai' panah min ra Babil, sabap ra Babil makatula noyo Raki', TUHAN.

¹⁵Golok no ra lakis ru mangayou giu' ra liliut ru bandar no! Raino Babil nakirakop noyo. Timbok pangampin nano sinubol am ginaba' noyo. Tatanga' Aku mansuli' ra ulun ru Babilonia. Ginio ra pansuli' kano, am baalo' ilo koson ra pinamakuan nilo ra ulun bokon.

¹⁶Pai' polosoo' ulun magitanom kapoam mangkumos giu' ra pagun no. Ngaangai' ulun ru bansa' ra bokon ondo' minayan ra giu' no malaa' ra saujor ondo' mamulunsar risilo, am muli' ra pagun ru sigagama'.”

¹⁷Indagu TUHAN, “Ulun ru Israil koson ra sampanon ru domba ondo' inilou am pinantutuliar ru singa'. Binulunsar ilo galing ru raja' ru Asyur, kalupus raginio Raja' Nibukadnijar intor ra Babilonia, mangaliit ra bungul nilo.

¹⁸Sabap no ginio, Aku TUHAN Ondo' Maayo Kaga' Kuasa', i Aki Kapuuno' ru Israil, mangukum ra Raja' Nibukadnijar am pagun nano, koson ra Aku nangukum ra raja' ru Asyur.

¹⁹Pasagulion Ku ulun ru Israil ra intok namagunan nilo. Mangakan ilo intor ra ampos ru tinanom ondo' timinuu' giu' ra Gunung Karmil am giu' ra libung Basan. Mangakan ilo maya' ra kasagaan nilo intor ra ampos ru tinanom ondo' timinuu' giu' ra wilayah Ipraim am Giliad.

²⁰Paat raginio, tula kolondo' boo giu' ra Israil, am kalaatan pana kolondo' boo giu' ra Jiuda, sabap ra mangampun Aku ra ulun ondo' binayag Kuno. Aku, TUHAN, nakaindagu noyo.”

²¹Indagu TUHAN ra pantula' ru Babilonia, “Bulunsaro' mamagun ru Mirataim am Pikod. Potoyo' am pusoo' ilo. Baalo' noyo ngaangai' susuban Kuno. Aku, TUHAN, nakaindagu noyo.

²²Bolos ru pangayawan morongog giu' ra pagun no, am katutukan nasauk noyo.

²³Ragili Babilonia nangamar ra titikop ru tana' ti saboi natutuk, kaa' raino amar nano nopopol noyo. Ngaangai' bansa' nakatigog nakakito ra atan ondo' nasauk ra pagun no.

²⁴Okou Babilonia, minanggal kou Raki' am siminulung kou ra jajaling ondo' pinakaang Kuno rirun, kabalu' pana kalo nalimanan mu.

²⁵Inukaban Ku intok pambulian Kuno ra kinandoi Kuno. Ralalom ru sangit Kuno, iningkual Ku kinandoi Kuno, sabap ra Aku, TUHAN Raja' Ondo' Maayo Kaga' Kuasa', musiti' mampaugar ra kandoi giu' ra Babilonia.

²⁶Bulunsaro' noyo pagun no intor ra ngaangai' intok, am musiti' kau sumubol ra ralalom ru ngaangai' intok pambulian ra gandum! Pabujuko' kuliamos ginaau koson ra gandum pinabujuk! Pusoo' pagun no! Pai' tatango' atan pana!

²⁷Potoyo' ngaangai' saujor nilo! Simbaluyo' ilo ngaangai'! Aibui boo ra mamagun ru Babilonia! Nasaboi paat no ra ilo ukumin!” (

²⁸Ulun nagigiru' intor ra Babilonia am minatong ra Jirusalim; tinunung nilo ati kulaan ra TUHAN, i Aki Kapuuno' takau nambalos ra binaal ru ulun Babilonia ra Baloi ru TUHAN.)

²⁹“Susubo' pulalai mamanah mamulunsar ra Babil. Susubo' moonong ulun ondo' mapandai mamakai ra busur am panah. Pagawangi' bandar no am pai' polosoo' sangulun pana makapagiru'. Balasi' ngaangai' binaal ru Babil; baalo' Babil koson ra ati kulaan pinamakuan ru Babil ra ulun bokon, sabap ra Babil liminimbau Raki', Ondo' Matulai Kaga', i Aki Kapuuno' ru Israil.

³⁰Ginio sabap ra ungkuyon mamulok ru Babil potoyon giu' ra ralan-ralan ru bandar, am ngaangai' saujor nano pusoon ra orou raginio. Aku, TUHAN, nakaindagu noyo.

³¹“Alii rirun Babilonia, malilimbau kou kaga'. Ginio sabap ra Aku, TUHAN Raja' Ondo' Maayo Kaga' Kuasa', manggal rirun! Nasaboi paat no ra mangukum Aku rirun.

³²Bansa' muno ondo' malilimbau no makasaru am maratu'. Kolondo' sangulun pana mangindangan rirun migor. Monolob Aku ra bandar-bandar min, am ngaangai' ondo' giu' ra liliut no mapuso.”

³³Indagu TUHAN Ondo' Maayo Kaga' Kuasa', “Ulun ru Israil am Jiuda inimbolo'. Ngaangai' ondo' namparakop risilo nagalung toojo risilo am marara' mampalabus risilo.

³⁴Kaa' Io ondo' mamayag risilo no maikang; inggalan Nano iono TUHAN Ondo' Maayo Kaga' Kuasa'. Io galama' mirot toojo mangampin ra baal nilo, am magibit ra kaansayan ra tana' ti, kaa' mamparatong ra kapaganan ra ulun ru Babilonia.”

³⁵Indagu TUHAN, “Mapuso noyo Babilonia! Mapuso noyo mamagun nano, tingganai-tingganai nano am ulun-ulun nano ondo' mangapintar.

³⁶Mapuso noyo nabi-nabi nano ondo' magabau — sasambungon ilo kaga'! Mapuso noyo saujor-saujor nano — mapara' piboo laa' nilo!

³⁷Pusoon noyo ngaangai' kuda am kurita' kuda no! Mapuso noyo saujor ra ginajian no — mapara' piboo lawo nilo! Pusoon noyo kalangkayaan nano; Bayuto' am gaawo' noyo.

³⁸Polosoon noyo tana' no masauk ra mapua', am sungoi-sungoi nano malasakan. Nososok Babilonia ra sinungkalalaing ondo' makalalaa', sinungkalalaing ondo' mangkinibit ra ulun sumamba riso no masauk ra mantuyang.

³⁹“Ginio ra Babil masauk ra intok ru simintolong am ambiluo malaat[55] am niayuk susuit-susuit majamol. Ulun kalo boo mayan ra giu' no saboi ra sabubuoi no.

⁴⁰Koson ra Aku namuso ra Sodom am Gomora nababaya' ra pekan-pekan giu' ra liliut no, koson raginio niayuk Aku mamuso ra Babil. Kolondo' sangulun pana mayan ra giu' no. Aku, TUHAN, nakaindagu noyo.

⁴¹“Ulun tatanga' matong intor ra ralayo, rondo' bansa' ondo' maikang intor ra pagun maalur; masuang raja' tatanga' tumampos koson mangayou.

⁴²Nanampanah am nanangilang ilo; malaat am masangit ilo. Bolos kinurikap ru kuda koson ra raat mangkinulun, paat ra ilo mangura' ra kuda. Nakatampos ilo no mamulunsar ra Babilonia.

⁴³Raja' ru Babilonia nokorongog ra tanou no, am liminawo. Magalabo guang nano, am maimbolo' koson ra ruandu' ondo' tatanga' maganak.

⁴⁴“Koson ra singa' miningkual intor ra kataunan gimbaan giu' ra kiing ru Sungoi Jordan, am nagaloi ra padang masakot ondo' masansam, koon raginio niayuk ra Aku, TUHAN, matong am mangkinibit ra ulun ru Babilonia magiru' ra mamulali' intor ra bandar nilo. Tingganai ondo' pilion Kuno pana ondo' mamarinta boo ra pagun no. Osoi kia ondo' mokogondo' Raki'? Osoi kia ondo' baani manggal Raki'? Panguasa' ra ati kia ondo' makakau' manggal Raki'?

⁴⁵Ginio ra rongogo' inatangan Kuno koson manggal ra bandar Babil, am atan ondo' masaga' Kuno baalon ra mamagun nano. Anak-anak nilo pana ralaaton ra mugar, am ngaangai' ulun mangalaa'.

⁴⁶Paat ra Babil maratu', bolos no mosongou kaga' saboi titikop ru tana' ti mogonggon, am tangi' ru mamagun nano morongog ru bansa'-bansa' ra bokon.”