Read Timugon Murut SULABOI 2 Bible Online

SULABOI 2 - Timugon Murut bible

SULABOI 2

¹Ralalom ru sangit, linibungan ru TUHAN Sion ra kalandaman. Kinulau No kinaayo ru Israil ondo' masawat koson ra limbowon nasauk nalunsai. Paat ra Io sumangit, Baloi Nano pana iruanin.

²Pinuso ru Tuhan ngaangai' kampung giu' ra Jiuda ra kolondo' guang makaasi', linunsai No kubu-kubu ondo' nasauk ra pangampin ru pagun. Nanauyu' Io ra pamarintaan am ulun nanguasa' nano.

³Ralalom ru sangit namuso Io ra kaikangan ru Israil; marara' Io mangindangan ritakau paat ra pantula' matong. Sangit Nano ritakau bibilak koson ra apui mangumpo ra ngaangai'.

⁴Patumaan no panah ra tampilon takau ilain koson itakau ti pantula' Nano; Potoyon No ngaangai' ulun ondo' nasauk ra kasagaan am mapabansuk ra guang takau. Giu' ra bandar Jirusalim makaliman takau ra apui ru sangit Nano.

⁵Koson ra pantula', namuso noyo TUHAN ra Israil; namuso Io ra ngaangai' kubu am istana nano. Namparuang Io ra kangilukan ru mamagun ru Jiuda.

⁶Nanutuk Io ra Baloi ru TUHAN intok takau sumamba Riso; iniru' No ngaangai' pangiantakan am orou Sabat. Raja' am imam ngaangai' no naimbolo' kinibit ru sangit Nano.

⁷Inimpayan ru TUHAN altar Nano am nangiruan ra Baloi Nano ondo' matulai; pinoloso No pantula' nampalunsai ra timbok nano. Nangindii pantula' sabap ra namanang giu' ra intok sambayang takau ra maantak ragili.

⁸Namatas noyo TUHAN koson lunsayon timbok ru Sion; Tukuon No timbok no maa' raginio ngaangai' no umokon No. Manara am timbok raino ti nasauk ra totopot nalunsai.

⁹Kulobon-kulobon garabang nalunsai napumpunan ru ondo' nalunsai, am tataun ru umpok nano nangapandak. Raja' am tingganai-tingganai raino giu' ra pagun pamatiran. Ukum ru TUHAN kalo boo pailaan, am nabi-nabi kalo boo mangapu ra pinaintalang intor ra TUHAN.

¹⁰Ulun matutuo giu' ra Jirusalim nanturung mongkoror ra tana', kaau pinatauk ra ulu am nambayang ra konoon karung. Ralaa-ralaa nampakuku' ra ulu saboi ra tana'.

¹¹Minangkut mato kuno sabap ra nantangi' ra kalo lumonggo'; saliguor kuno totopot naupus. Natutuk guang kuno nakakito ra kapusaan ru bansa' kuno, nakakito ra lalaing am lalagang nalausan giu' ra ralan ru bandar.

¹²Liminakis ilo ra matuo nilo sabap ra naitilan am pinaason; naratu' ilo giu' ra tanga' ru ralan ilain koson napilatan, am minatoi ra sapau ru ina' nilo.

¹³Okou Jirusalim, bandar ru Sion ondo' tagamin kaga', atan kia paraguon kuno? Kalo makapangansuk aku rirun. Osoi pana kalo poyo igondo' naimbolo' koson rirun. Karaat maayo koson ra raat malangka' am malandom lumumpa' rirun; kolondo' boo kalansanan ra tayar muno.

¹⁴Nabi-nabi muno mapandai ayuk magabau; namparuung ilo rirun ra kalo nambala' ra tula muno. Nambaal ilo rirun mangkara' ra okou kalo pana tumalikur intor ra tula.

¹⁵Ngaangai' ulun ondo' nansail ra bandar muno magasab rirun. Ulu nilo pisik-pisik am makakurit magilong ra Jirusalim nalunsai. Nangkuot ilo, “Gitio kia bandar ondo' sabiton ra moonsoi kaga' am nasauk ra kalimbawan nilo?”

¹⁶Ngaangai' ru pantula' muno mangiis rirun am magilong rirun ra masisang. Manjabiu bibil nilo liliwa' magasab, “Pinuso mai noyo okou! Gitio noyo orou ondo' inaanin mai!”

¹⁷Pupus no nambaal TUHAN ra atan ondo' inatang Nano; Pusoon No itakau ra kolondo' guang makaasi' koson ra ondo' pinakara' Nano ritakau ragili. Pinamanang No ra pantula' takau, am maansukan ilo sabap ra naratuan takau.

¹⁸Okou Jirusalim, polosoon timbok muno gumolok ra Tuhan![4] Polosoon lomou muno tumilisan koson ra sungoi tumilis ra orou am rondom. Rayus no pantangi' am pangiluk saboi kou maagui.

¹⁹Ruruli' no tumirong ra mosorondom, am piawo' noyo Tuhan; pabalaa' ngai' suang ru guang muno am pakimasi' no koson ra anak-anak muno, anak-anak ondo' tatanga' maitilan giu' ra moonong lisangon ru ralan.

²⁰Ilai' noyo, iou TUHAN! Ilai' ilo ondo' inimbolo' Muno! Ruandu'-ruandu' mangakan ra anak-anak ondo' tagamin nilo! Imam-imam am nabi-nabi pinatoi giu' ra ralalom Baloi ru TUHAN!

²¹Ulun matutuo am mamulok ngaangai' no minatoi giu' ra ralan-ralan, kamulakan ungkuyon am ruandu' pinatoi ra ilang ru pantula'. Pinatoi Mu ilo ra kolondo' guang makaasi' paat ra orou Okou sumangit.

²²Piniau Mu pantula' kuno mambaal ra bunsag ru kalaatan ra libung kuno; kolondo' sangulun pana makapamayag ra inan paat ra orou Okou sumangit. Pinatoi nilo anak-anak kuno ondo' inalungan am tinagaman kuno.