Read Timugon Murut SURAT RU NABI JIRIMIA 1 Bible Online

SURAT RU NABI JIRIMIA 1 - Timugon Murut bible

SURAT RU NABI JIRIMIA 1

¹Sabap ra tula-tula min ri Aki Kapuuno', inaut kau koson ra ulun rinakop mongoi ra Babilonia ru Raja' Nibukadnijar, raja' ru ulun ru Babilonia.

²Mayan kou ra giu' no ra mabuoi kaga' saboi ra papag katulu'. Kopongo raginio atarin kau ri Aki Kapuuno' muli' intor ra Babilonia ra maayag.

³Giu' ra Babilonia, makakito kau ra sinungkalalaing ondo' binaal intor ra tataun, pirok am mas ondo' saanin ra rasawat ru limbawo am kalaanin kaga' ru ulun ondo' kalo makaulig ri Aki Kapuuno'.

⁴Kaa' ilalain noyo. Pai' igogondo' tilu ra ulun bansa' bokon no am pai' kalaa' ra sinungkalalaing nilo.

⁵Suai raginio, amon makakito kau ra ulun masuang mugar ondo' sumamba ra sinungkalalaing raginio, indagu no ralalom ru guang, “Okou ayuk, iou Tuhan, ondo' sotopot no sambaan.”

⁶Sabap ra malaikat ri Aki Kapuuno' mabaya' ramuyun am mantamung ramuyun.

⁷Sinungkalalaing no inangkupan ra mas am pirok, am rila' nano rinaut ru sangulun manukang. Kaa' sinungkalalaing no tuhan ra kalo motopot am kalo mapandai mindagu.

⁸Ulun nambaal ra karaun ru mas am pinatampak ra rasawat ulu ru sinungkalalaing no koson ra sangulun ralaa ondo' masaga' ra limpor moonsoi. Sanganuan imam-imam no nantakou ra mas am pirok intor ra sinungkalalaing nilo koson kaatangan nilo galama'.

⁹

¹⁰Mulu' poyo santayaran intor ra mas am pirok no pinataak nilo ra ulun-ulun mantalan ra inan giu' ra kuil-kuil. Sinungkalalaing ondo' binaal intor ra tataun, pirok, am mas no pinambayang ra moonsoi koson boo ra ulun sinungkalalaing no.

¹¹Sinungkalalaing no sakubungon ra konoon matanggilung molondom koson raja'-raja', kaa' kalo makapagiru' ra togol am anai.

¹²Paat makatauk kaau ru kuil no, bulos ru sinungkalalaing no musiti' piirin.

¹³Sinungkalalaing no nampaguut ra jujuga' ru pamarintaan koson panguasa' ru tana' ti, kaa' kalo makapamatoi ra osoi pana ondo' makasala ra sinungkalalaing.

¹⁴Mokoondo' ondo' inanian ra karis kapoam panaa' ra longon nano, kaa' sinungkalalaing no kalo makasaung ra inan galama' ralalom ru pangayawan kapoam amon takawin. Ngaangai' no nampainono' ra sinungkalalaing no sala' ka tuhan. Ginio ra pai' kalaa' ra sinungkalalaing.

¹⁵Sinungkalalaing giu' ra kuil-kuil nilo koson ra mangkuk naabak ondo' kolondo' onong. Mato ru sinungkalalaing no nototop ra kaau ondo' kukulampun paat ra ulun sumubol.

¹⁶

¹⁷Piniot ru imam-imam kuil-kuil no ra kulobon ondo' inanian ra alor am kinaputan maa' raginio sinungkalalaing no kalo alapon ru ulun mantakou. Koson raginio noyo sinungkalalaing no inaput koson ra ulun rinakop ondo' inukum ra matoi sabap makasala ra raja'.

¹⁸Nampaang imam-imam ra lampung masuang poyo koson manilau ra sinungkalalaing no intor risilo galama'. Kaa' sinungkalalaing no kalo makakito ra rondo' lampung pana.

¹⁹Tampilon ralalom nano nakai' inakan ru anai koson ra lugu'-lugu' tataun ru kuil no, am bayang nano nakai' inakan ru bubuk, kaa' sinungkalalaing no kalo makapandai.

²⁰Bulos ru sinungkalalaing masait sabap ra lisun giu' ra kuil no.

²¹Pungit, tuntuwayan, am susuit-susuit ru bokon no sasisiab ra rasawat ru sinungkalalaing. Using pana timinampak ra rasawat nano.

²²Ngaangai' no mampainono' ra sinungkalalaing no sala' ka tuhan. Ginio ra pai' kalaa' ra sinungkalalaing.

²³Sinungkalalaing no inangkupan ra mas maa' raginio masauk moonsoi. Kaa' amon kalo isasin, sinungkalalaing no kalo malunau. Paat ra sinasaran, sinungkalalaing no kalo makaliman ra atan-atan.

²⁴Kula' pana logo ru sinungkalalaing no binali, kalo niayuk maminawo.

²⁵Sotopot no sinungkalalaing kolondo' onong ra ulun sabap kalo makaugar galama', am musiti' bandasin. Ulun pana ondo' sumamba ra sinungkalalaing mauyu'

²⁶paat ra mokoondo' sinungkalalaing ondo' naratu' musiti' patirongon saguli'. Amon binulian ra rondo' intok, sinungkalalaing no mailo manding. Amon makataiging, sinungkalalaing no mailo tumirong inan nano galama'. Taak-taak ondo' pinabanta' ra saang ru sinungkalalaing no nogondo' ayuk ra taak koson ulun minatoi.

²⁷Atan ondo' pinataak ra sinungkalalaing no tinalan ru imam-imam no am ruit no ilo nampakai. Koson raginio niayuk ra andu'-andu' nilo mampasuai santayar intor ra kual pinataak am ginio kalo tinayar ra ulun musikin am ulun kalo makalulu'.

²⁸Mulu' piboo ra ruandu'-ruandu' ondo' makaliuran kapoam ondo' bagu ayuk naganak nampaguut ra taak no. Ngaangai' no mampainono' ra sinungkalalaing no sala' ka tuhan. Ginio ra pai' kalaa' ra sinungkalalaing.

²⁹Atan koson ra sinungkalalaing sabiton ra tuhan? Sabap ra ngaangai' ruandu' iowon magibit ra taak ra sinungkalalaing-sinungkalalaing intor ra tataun, pirok am mas no.

³⁰Ngaangai' imam nano ondo' tatanga' mangiluk guang nanturung ralalom ru kuil mambayang ondo' naririlak, ulu am jangut kinaur ra kolondo' rundung.

³¹Nompoloong ilo am ginumolok ra saang ru sinungkalalaing nilo koson ralalom ru pagakanan tayar ru ulun minatoi.

³²Alapo' nilo bayang ru sinungkalalaing no am pinataak nilo ra lalaing am andu' nilo.

³³Paat ra sinungkalalaing no makaimong ra baal moonsoi kapoam malaat, mailo ilo mambalos. Mailo ilo mampakakat ra sasangulun masauk ra raja' kapoam mampatuun ra raja' intor ra panturungan nano.

³⁴Sinungkalalaing kalo makapangani' ra kalangkayaan kapoam ruit. Amon ulun mambantu' ra sinungkalalaing am liminungkang, sinungkalalaing no mailo mansika' riso.

³⁵Sinungkalalaing no mailo mampalabus ra sangulun pana intor ra kapatayan kapoam sumaung ra ondo' kalo makalulu' intor ra ginonggom ru ulun maikang.

³⁶Sinungkalalaing no mailo mambaal ra ulun nobolou makakito am mailo mangindangan ra ulun mapagon.

³⁷Sinungkalalaing no mailo makaasi' kapoam mangindangan ra ngaangai' napuor am anak nailusan ra matuo.

³⁸Tataun ondo' inangkupan ra mas am pirok no koson ra batu ondo' inalap intor ra kagunungan, am ulun ondo' nangandoi ayuk ra sinungkalalaing no tauyuon.

³⁹Ginio ra ati koson ra ulun mangkara' kapoam manabit ra sinungkalalaing no tuhan?

⁴⁰Ulun ru Babilonia galama' magasab ra sinungkalalaing nilo. Amon mokoondo' ulun bobou, ibiton nilo mongoi ra sinungkalalaing Bel am makitaak ra sinungkalalaing no maa' raginio mangani' ra katandaan mindagu, ilain koson makarati' i Bel ra ngaangai'.

⁴¹Ilo no sasambungon am kalo mangarati' saboi kalo mairuanan nilo sinungkalalaing nilo.

⁴²Ruandu'-ruandu' ondo' nagabot ra awak nanturung ra igig ru ralan am monsolob ra mumuk am mampataak ra inan nilo koson talanon.

⁴³Paat ra sangulun risilo inibit ru sangulun ungkuyon koson rulugon, am io pana nangiis ra rangan nano ondo' kalo inibit am kalo iniru' abot ra awak nano.

⁴⁴Ngaangai' ondo' nasauk ra sinungkalalaing no kalo noyo motopot. Ginio ra atan koson ulun mangkara' am manabit ra sinungkalalaing no tuhan?

⁴⁵Sinungkalalaing no binaal ru ulun manukang ra tataun am manukang ra mas, ginio ra sinungkalalaing kalo makasail poyo intor ra atan ondo' kuayan ru ulun-ulun manukang no.

⁴⁶Ulun ondo' mambaal ra sinungkalalaing no galama' kalo maawar painawo.

⁴⁷Ginio ra ati koson binaal nilo masauk ra tuhan? Ulun no nampatungkus ayuk ra pamparuungan am pagasaban ra papag nano.

⁴⁸Amon sinungkalalaing no nalumpa' ra pangayawan kapoam karaat, nansusunur imam-imam intor ru intok pansibunian nilo mabaya' ra sinungkalalaing nilo.

⁴⁹Kalo makarati' ilo ra sinungkalalaing ondo' kalo maikang ra pangayawan am karaat sala' ka tuhan.

⁵⁰Sinungkalalaing no sala' ka bokon intor ra tataun inangkupan ra pirok am mas. Paat ra orou matong mapandayan toojo ra sinungkalalaing no ruung ayuk toojo. Makaliman boo bansa'-bansa' am raja'-raja' ra sinungkalalaing no binaal ayuk ru ulun am kalo makapangandoi koson ra Tuhan.

⁵¹Moonong ulun makapandai ra sinungkalalaing no sala' ka tuhan.

⁵²Sinungkalalaing no mailo mampakakat ra sangulun pana masauk ra raja' am niayuk mailo mampatuun ra rasam.

⁵³Sinungkalalaing no mailo mangakim ra baal am mailo manaung ra ulun ondo' kalo matimpok pinamakuan, sabap ra ngaangai' sinungkalalaing no galama' mailo.

⁵⁴Ngaangai' sinungkalalaing no kolondo' onong koson ra bangkaak ondo' mansiab giu' ra rasawat. Amon rondo' kuil nosolob, imam-imam nano nagiru' koson mamayag ra inan nilo galama', kaa' ngaangai' sinungkalalaing nilo ondo' intor ra tataun inangkupan ra pirok am mas no nakai' nosolob koson rondo' balak.

⁵⁵Ngaangai' sinungkalalaing kalo makapangayou gumula' ra raja'-raja' kapoam pantula'.

⁵⁶Atan koson ulun makapangintopot ra sinungkalalaing no tuhan? Ngaangai' sinungkalalaing intor ra tataun ondo' inangkupan ra pirok am mas no kalo makapangampin ra inan nilo galama' intor ra ulun-ulun mantatakou

⁵⁷ondo' makapangalap ra mas, pirok, am bayang ru sinungkalalaing am ibiton nilo magiru' sabap ra ngaangai' sinungkalalaing no kalo makapangindangan ra inan galama'.

⁵⁸Moonsoi poyo sangulun raja' ondo' maikang baani kapoam rondo' balang ondo' mapakai intor ra tuhan ondo' kalo motopot. Rondo' kulobon ondo' manindung ra kuliamos-kuliamos ralalom ru baloi kapoam rondo' lugu' tataun giu' ralalom ru istana moonsoi poyo intor ra tuhan ondo' kalo motopot.

⁵⁹Mato ru orou, bulan, am butitin-butitin inanian ra kandoi koson mangani' ra sinda, am ngaangai' nilo giminagaya'.

⁶⁰Ginio niayuk ra piat ru ganit, sinda nano makito intor ra maalur. Angin pana sumiob ra ati-ati ayuk.

⁶¹Amon manusub i Aki Kapuuno' ra gaun-gaun koson mansiab-siab mongoi ra titikop ru tana' ti, ngaangai' no nampaugar ra atan ayuk panusuban.

⁶²Apui ondo' pinatuun intor rasawat koson monolob ra gunung-gunung am kataunan-kataunan, niayuk mambaal ra atan ondo' panusuban. Kaa' ngaangai' sinungkalalaing no kalo mokogondo' ra ngaangai' no, ralalom ru baal makito kapoam ralalom ru kaikangan nano.

⁶³Ginio ra pai' pangkara' kapoam sabito' sinungkalalaing no tuhan, sabap ra sinungkalalaing mailo mamatas ra baal kapoam mambaal ra baal moonsoi ritakau.

⁶⁴Makapandai kau ra sinungkalalaing no sala' ka tuhan, ginio ra pai' kalaa' ra sinungkalalaing.

⁶⁵Sinungkalalaing no mailo magulas kapoam mambarakat ra raja'-raja'.

⁶⁶Sinungkalalaing no mailo mambaal ra tatandu'-tatandu' giu' ra limbowon ra tayar ru bansa'-bansa', am mailo niayuk mampasinda koson ra mato ru orou kapoam bulan.

⁶⁷Bibiag masigo moonsoi poyo intor ra sinungkalalaing no, sabap ra bibiag lakat poyo makapagiru' intor ra makalalaa' am maguyum ra sindungan.

⁶⁸Naratian takau toojo ra sinungkalalaing no sala' ka tuhan, ginio ra pai' kalaa' ra sinungkalalaing.

⁶⁹Sinungkalalaing nilo, ondo' binaal intor ra tataun inangkupan ra pirok am mas kolondo' onong koson ra inulun-ulun giu' ra umo ondo' niayuk kalo mangani' ra sindungan.

⁷⁰Sinungkalalaing koson ra bulungkut makaruui giu' ra umo ondo' arapin ru atan ayuk susuit, kapoam koson baangkai ondo' pinatiran ralalom ru kalandaman.

⁷¹Intor ra bayang matanggilung am konoon linon[1] ru sinungkalalaing ondo' naapu', nakapandai kau ra ilo sala' ka tuhan. Pupus nano sinungkalalaing nakai' inakan ru anai am masauk ra pagasaban ralalom ru pagun.

⁷²Ginio ra moonsoi poyo sumauk ra ulun mabanis guang ondo' kolondo' linonggom ra sinungkalalaing; nakalabus ilo intor ra pagasaban.