Read Timugon Murut BARUK 1 Bible Online

BARUK 1 - Timugon Murut bible

BARUK 1

¹Gitio noyo kitab ondo' tinulisan ri Baruk lalaing ri Niria akupu ri Magsiya, papag ri Jidikia, Asadia, am Ilkia. Kitab ragitio tinulisan giu' ra Babil,

²Paat orou katulu' sila' raginio[1] ralalom bilor kalimo kalupus ulun ru Babilonia nanguasa' am nonolob ra bandar Jirusalim.

³Kitab i binasa' galama' ri Baruk ra saang ru Raja' Jikonya, anak ru Raja' Joyakim, raja' Jiuda am giu' ra saang ru ngaangai' mamagun ondo' minayan giu' ra Babil mamaar ra Sungoi Sud. Ilo ngaangai' minatong koson mangkirongog ra pambasaan ru kitab i: ulun nauligan kaga', pabukat-pabukat ru raja', ulun tuu' lair; ontoson ragu ngaangai' ulun intor ra ngaangai' bansa'.

⁵Kopongo kitab i binasa', nantangi' ilo, nampali, am nakiasi' ra Tuhan.

⁶Am sigagama' nangani' ra taak maya' ra mataakan nano,

⁷am ruit ondo' pinataak i inataran ra Jirusalim intok ru Tingganai Maayo Imam Joyakim anak ri Ilkia, akupu ri Syalom am ra imam-imam ra bokon mabaya' ra ngaangai' ulun ondo' mabaya' ra Tingganai Maayo Imam giu' ra Jirusalim.

⁸Paat orou koopor ra sila' Siwan,[2] nangalap i Baruk ra kuliamos ondo' tinakou intor ra Baloi ru Tuhan am pinasaguli' no ra pagun ru Jiuda. Ginio noyo kuliamos pirok ondo' binaal ri Jidikia, anak ru Raja' Josia intor ra Jiuda,

⁹kalupus i Jikonya, ngaangai' tingganai, ulun-ulun manukang,[3] ulun mauligan toojo ralalom ru mamagun am ulun kaindalaman inibit intor ra Jirusalim mongoi ra pamatiran giu' ra Babil maya' ra susuban ri Nibukadnijar, raja' ru Babilonia.

¹⁰Gitio noyo surat intor ra ulun ru Jaudi giu' ra Babil posoboyon ra Tingganai Maayo Imam am ulun giu' ra Jirusalim. “Kasaga' no mamakai ra ruit ondo' inataran maiti koson mambali ra bibiag tinambiag tayar ru taak simbalui koson mapabansuk ra guang ru Tuhan[4] am niayuk taak simbalui koson mangampun ra tula am koson mambali ra kaminyan am niayuk gandum tayar ru taak simbalui koson paringkuanangan ra Tuhan.[5] Pataako' noyo ngaangai' taak simbalui no giu' ra rasawat ru altar ru Tuhan, i Aki Kapuuno' takau.

¹¹Kasaga' no makiasi' ra tayar ru Raja' Nibukadnijar, raja' ru Babilonia am Biltsajar anak nano. Gama' ru ilo ruo maayag mamimio ra sabubuoi no.

¹²Gama' ru Tuhan mampaikang am mangila' ramon maa' raginio maayag ralalom panindungan ru Raja' Nibukadnijar, raja' ru Babilonia, am Biltsajar anak nano, am gumagaya' risilo buoi ru kaayagan mai, suku' akai ti iowon nilo ruo.

¹³Pabukat kau ngai', pakiasi' kano ra Tuhan i Aki Kapuuno' koson ramon sabap akai ti makatula' Riso, am saboi raino kasangitan Nano ondo' maayo kaga' lakat poyo lumumpa' ramon.

¹⁴Basaa' noyo kitab ondo' inataran ti ra saang ru ngaangai' ulun ralalom Baloi ru Tuhan paat ra Pangiantakan Mangkalukub ra Raun am paat ra orou-orou sambayang.”

¹⁵Ngaangai' pabukat musiti' mangiou koson ragitio, “Tuhan, i Aki Kapuuno' takau ti matimpok, kaa' akai ti lakat poyo liniputan ru guang mauyu'. Ngaangai' mai, ulun ru Jiuda, mamagun ru Jirusalim,

¹⁶Raja'-raja' mai, ngaangai' tingganai, ngaangai' imam, ngaangai' nabi, am kinamatuaan mai tinauyu',

¹⁷sabap akai ti makatula' ra Tuhan, i Aki Kapuuno' mai

¹⁸am kalo gumagaya' Riso. Akai kalo mangkirongog Riso am kalo maayag sumugut ra susuban-susuban Nano.

¹⁹Intor ra Tuhan nagibit ra kinamatuaan mai miningkual intor ra Misir saboi orou raiti', kalo giminagaya' akai Riso. Akai kalo mampalio Riso am kalo minaya' ra susuban Nano.

²⁰Ginio ra saboi raino natiu' akai ra karaat am usung ondo' sinusub ru Tuhan ramon ondo' pinabala' galing ri Musa ulipon Nano, paat ra Tuhan nagibit ra kinamatuaan mai miningkual intor ra Misir koson mangani' ramon ra rondo' pagun ondo' langkaya' am malabung.

²¹Akai kalo masaga' mangkirongog ra bilin ru Tuhan ondo' pinasaboi ramon ondo' pinabala' galing ra nabi-nabi.

²²Limpatui ru ginio minaya' akai ra gogoton malaat ru guang mai ra sumamba ra dewa-dewa am mambaal ra baal-baal ondo' kasisangin ru Tuhan, i Aki Kapuuno' mai.