Read Timugon Murut BARUK 2 Bible Online

BARUK 2 - Timugon Murut bible

BARUK 2

¹“Ginio ra Tuhan nampasauk ra lolob Nano ramon am ra akim-akim mai, raja'-raja', am ngaangai' tingganai mai am ra ulun ru Israil am Jiuda.

²Ra titikop ru tana' ti kalo poyo igondo' kasauk koson nasauk giu' ra Jirusalim, bulintok Tuhan nangukum ramon maaya' ra ondo' tinulisan ralalom ru Ukum ri Musa,

³saboi mangakan akai ra kual ru lalaing mai galama'.

⁴Bansa' mai pinatutuliar ru Tuhan am pinoloso akai ti kinuasa' ru bansa'-bansa' ra libung mai. Nagagasab ilo ramon am nampasauk ra pagun mai masiluk.

⁵Akai ti makatula' noyo ra Tuhan, i Aki Kapuuno' mai am kalo gumagaya' Riso. Ginio ra bansa' mai kalo mamanang, kaa' kinuasa'.

⁶“Topot ra Tuhan, i Aki Kapuuno' mai matimpok, kaa' akai am kinamatuaan mai mauyu' saboi raino.

⁷Nangukum Tuhan ramon maaya' ra lolob Nano.

⁸Kabalu' pana raginio kalo niayuk sumaguli' akai ra Tuhan am kalo poyo mangiruan ra guang mai ondo' malaat.

⁹Tuhan matimpok ralalom ngaangai' ondo' susuban Nano ramon. Ginio ra namparatong Io ramon ra karaat-karaat ondo' tinampos Nano.

¹⁰Kabalu' pana raginio akai kalo poyo nokorongog ra bolos Nano am maayag sumugut ra susuban Nano ondo' tinaakan Nano ramon.”

¹¹“Iou Tuhan, Okou i Aki Kapuuno' ru Israil ondo' nagibit ra ulun Muno miningkual intor ra Misir mabaya' ra tatandu', kaimuagan am kuasa' ondo' maayo, saboi Okou nasauk ra nauligan toojo suku' raino.

¹²Iou Tuhan, i Aki Kapuuno' mai, akai ti makatula am nambaal ra malaat. Akai ti kalo gumagaya' am minanggal ra susuban-susuban Muno.

¹³Pai' no boo sangit ramon, sabap ra kalo boo masuang akai ra gino ngai' ru bansa'-bansa' sabap ra Okou nampatutuliar ramon.

¹⁴Rongogo' noyo pakiasian maiti, iou Tuhan, am palabuso' akai no ralalom ru urumat Muno galama'. Imbuor no maa' raginio makaasi' ramon ulun ondo' namatir ramon no.

¹⁵Ginio ra titikop ru tana' ti nakapandai ra Okou no Tuhan, i Aki Kapuuno' mai, sabap ra Okou nampili' ra papag ri Jakub sumauk ra ulun Muno galama'.

¹⁶“Iou Tuhan, pagilong no ramon intor ra intok Muno ondo' matulai; karaa' akai no am rongogo' noyo pakiasian mai.

¹⁷Kasaga' no magilong am mangurio ramon, iou Tuhan. Ulun ondo' kalo makapaminawo noyo ra intok ru ulun minatoi kalo mokopongompor Rirun koson sotopot no.

¹⁸Ulun ondo' maayag ayuk mokopongompor Rirun ra sotopot no, iou Tuhan, kabalu' pana ilo naimbolo' toojo, kumuung ra mugar, kalo makalulu', mato kalo makakito am maitilan.

¹⁹“Iou Tuhan, i Aki Kapuuno' mai, makiasi' akai Rirun ra pakaasi' no ramon, kaa' sala' ka binaal moonsoi ru kinamatuaan mai kapoam raja'-raja' mai.

²⁰Okou nampalumpa' ramon ra sangit Muno ondo' makalalaa' kaga' koson ra rinagu Muli ondo' pinabala' galing ra ulipon-ulipon Muno iono ngaangai' nabi. Nakaindagu Kono,

²¹‘Akau musiti' makikuasa' am masauk ra ulipon ru raja' ru Babilonia, am akau pana makaayan ra pagun ondo' tinaakan Kuno ra kinamatuaan min.

²²Kaa' amon ru kalo mangkirongog kau ra susuban Kuno am kalo sumauk ra ulipon nano,

²³langgain Ku moonong kaansukan giu' ra bandar-bandar Jiuda am Jirusalim. Ralalom ru paguatan kolondo' boo rimbai-rimbai kaansukan. Titikop pagun masiluk am kolondo' ulun.'

²⁴“Kaa' kalo niayuk mangkirongog akai ra susuban Muno koson mangandoi ayuk ra raja' ru Babilonia. Ginio ra akai inukum maaya' ra lolob ondo' nanusuban Muli ondo' pinabala' galing ra ulipon Muno iono ngaangai' nabi. Nakaindagu Kono ra bungul-bungul ru ngaangai' raja' am kinamatuaan mai patirin intor ra kalabangan nilo.

²⁵Sotopot no, nagagai noyo ngaangai' saboi matiu' ra malasu' paat ra matawang am matiu' ra masimu' paat ra rondom ti. Minatoi noyo ilo ra naimbolo' sabap naitilan, pangayawan, am maruol ra tumapik.

²⁶Sabap ra kalaatan ru ulun ru Israil am ulun ru Jiuda, Baloi Muno galama' pinasauk ra nangalunsai saboi ra orou raiti'.

²⁷“Kabalu' pana raginio, pinamakuan Muno ramon molomoi maaya' ra guang makaasi' Muno ondo' maayo, iou Tuhan, i Aki Kapuuno' mai,

²⁸koson ondo' binantu' Muli ondo' pinabala' galing ri Musa ulipon Muno, paat ra Okou nanusub riso nanulis ra Ukum Muli giu' ra saang ru ulun ru Israil.

²⁹Mindagu Kou, ‘Amon ru kalo gumagaya' kau Raki', akau ondo' masuang kaga' iruruin Ku ra gino ngai' ru bansa'-bansa' giu' ra intok nampatutuliaran Kuno ramuyun.

³⁰Nakapandai Aku noyo ra akau kalo gumagaya' Raki', sabap ra akau bansa' ondo' mokotog ulu. Kaa' giu' ra pagun pamatiran, makaliman kau boo

³¹am makaliman ra Aku ti Tuhan, i Aki Kapuuno' min. Aniin Ku akau ra guang ondo' gumagaya' am masaga' mangkirongog Raki'.

³²Giu' ra pagun namatiran ramuyun, mangkara' kau Raki' am mongompor kau Raki'.

³³Akau kalo boo mokotog ulu kapoam mambaal ra malaat, sabap ra makara' min atan ondo' nakatiu' ra kinamatuaan min paat ra ilo makatula ri Aki Kapuuno'.

³⁴Akau pana ibiton Ku sumaguli' ra pagun ondo' binantu' Kuli pinabaya' ibot ra kinamatuaan min, i Abragam, Isak am i Jakub, am pagun i masauk ra longgom min saguli'. Labain Ku suang min am kalo boo iruruin Ku.

³⁵Makimabantu' Aku ramuyun ondo' mantilayun: Masauk Aku ri Aki Kapuuno' min am akau Israil masauk ra ulun Kuno. Kalo boo mangimpai Aku ramuyun intor ra pagun ondo' tinaakan Kuno ramuyun.'