Read Timugon Murut BARUK 3 Bible Online

BARUK 3 - Timugon Murut bible

BARUK 3

¹Iou Tuhan Ondo' Maayo Kaga' Kuasa', i Aki Kapuuno' ru Israil, ra guang ondo' natutuk mampiau akai Rirun.

²Rongogo' noyo iou Tuhan, am pakaasi' no ramon, sabap ra akai ti makatula Rirun.

³Mantilayun Kou mamarinta koson ra raja', am akai ti matoi am lumiot koson ra sabuoi-buoi no.

⁴Iou Tuhan Ondo' Maayo Kaga' Kuasa', i Aki Kapuuno' ru Israil, rongogo' noyo pakiasian mai ondo' mamaar matoi ti. Kinamatuaan mai makatula Rirun, Tuhan, i Aki Kapuuno' nilo. Marara' ilo gumagaya' Rirun, ginio ra akai ti raino mansaan ra karaat-karaat.

⁵Pai' no karaa' kalaatan ru kinamatuaan mai, kaa' bulintok koson ragitio karaa' ayuk kuasa' Muno am kinaayo ru inggalan Muno,

⁶ginio sabap ra Okou no Tuhan, i Aki Kapuuno' mai, am mongompor akai Rirun.

⁷Pinasauk Mu akai ra motopot maa' raginio makiasi' akai Rirun. Ralalom pagun ru namatiran ti mongompor akai Rirun sabap mangiruan akai ra ngaangai' tula ru kinamatuaan mai.

⁸Pinatiran am pinatutuliar Mu noyo akai ra ngai' ru bansa'-bansa' ru bokon, am nampasauk ra akai ti inasaban am inulas nilo. Gitio noyo ukuman ramon sabap ra tula-tula ru kinamatuaan mai ondo' timinalikur intor Rirun, iou Tuhan i Aki Kapuuno' mai.”

⁹Okou Israil, rongogo' noyo ngaangai' parinta ondo' nangani' ra kaayagan, am ilai' noyo ngaangai' no maa' raginio masauk kau ra ulun mapintar.

¹⁰Akau Israil, kua minayan kau ra pagun ru pantula'? Kua nasauk kau ra ulun matutuo ralalom pagun ru bokon?

¹¹Kua jamali' min inan mino ra ondo' minatoi, am simpung ralalom ru ulun minatoi?

¹²Baal raginio nasauk sabap ra nangiruan kau noyo ra puun ru kapintaran!

¹³Amon maya' kau ra kasagaan ri Aki Kapuuno', maaru' kaayagan mino moonsoi koson sabuoi-buoi no.

¹⁴Igigila' noyo ra ati ayuk mokoondo' ra kapintaran, kaikangan, am pangaratian, am akau pana makatanda' ra ati mokoondo' maawar painawo am kaansayan, sinda silau ru kaayagan, am kaansayan.

¹⁵Osoi kia ondo' nakatuum ra intok ru kapintaran kapoam siminubol ralalom ru intok pambulian ra kuliamos nano?

¹⁶Ati kia ngaangai' tingganai ru bansa'-bansa' am ulun ondo' mampalula' ra bibiag am namparakop susuit koson alapon ra kaansukan?

¹⁷Ati kia ilo ondo' nampabujuk ra mas am pirok i, rapu' ondo' inintopot nilo? Ati boo nua' ulun ondo' nompolonggom no ra kolondo' polos?

¹⁸Ati kia ilo ondo' natimpok toojo nambaal ra pirok am tinulisan nilono kalo maalap aration?

¹⁹Ngaangai' ilo liminiot noyo am timinuun ra intok ru ulun minatoi, am ulun ru bokon minujak koson mamalit risilo.

²⁰Anak-anak bagu pana inanak ondo' minayan ra tana' ti. Kaa' ilo kalo nakatuum kapoam makarati' ra ralan ru kapandayan, am lalaing akupu nilo nakalayau ra maalur poyo kaga'.

²²Kapintaran kolondo' ra ulun ru Kanaan am niayuk ra ulun ru Idom.

²³Papag ri Agar ti pana kalo nakatuum raginio, kabalu' pana naguyum ilo ra kapandayan ra tana' ti. Nogondo' baal nano ra ngaangai' ulun mantalan intor ra Miran am Timan, am niayuk ulun mantunung am ulun ondo' maguyum ra pangaratian.

²⁴Akau Israil, mapara' piboo indon ru intok inayanan ri Aki Kapuuno'! Mapara' piboo gayo ru libung longgom Nano.

²⁵Ngaangai' no maayo am kolondo' polos, kalo maalap tukuon gayo am sawat nano.

²⁶Galing i, ra giu' no inanak masuang maayo ulun ondo' nauligan toojo; ilo mangaikang kaga' am mapandai kaga' ralalom pangayawan.

²⁷Kaa' sala' ka ilo ondo' pinili' ri Aki Kapuuno'; sala' ka ilo ondo' inanian ra ralan kapandayan.

²⁸Nangapuso noyo ilo am natutuk sabap ra ilo kolondo' kapintaran am pangaratian.

²⁹Kolondo' poyo nakaili' nakasuku' ra suruga' koson mangalap ra kapintaran am mampatuun intor ra gaun-gaun.

³⁰Kolondo' sangulun pana ondo' makasandaup ra raat am makaalap ra kapintaran, kapoam pinabali no ra mas ondo' pinili'.

³¹Kolondo' sangulun pana makapandai ra ralan ati koson mokoowot raginio kapoam makatanda' ra ralan mongoi riso.

³²Kaa' rondo' ondo' makapandai ra kapintaran, rondo' ayuk i Aki Kapuuno' Ondo' Makapandai Kaga', ondo' mokoowot ra pangaratian Nano. Io nomposoroi ra tana' ti koson sabuoi-buoi no am sinuangan no ra ngaangai' salinut ru bibiag.

³³Nampiau Io ra sinda, am sinda no pana minatong ra monontol. Nanusub Io riso, am sinda no pana riminongog Riso, am ugar.

³⁴Butitin-butitin simininda ra mapaang, napanu' ra kaansukan ra intok-intok nano.

³⁵Paat ra Tuhan nampiau, butitin-butitin i mataki' timinaam Riso; sinda nano pipiat, am iniou ru Io Namangun nano.

³⁶Io noyo i Aki Kapuuno' takau, am kolondo' sangulun pana koson Riso.

³⁷Io no nampatuum ra ngaangai' ralan mongoi ra kapandayan am pinataak no ra Israil, ulipon ondo' katagaman Nano.

³⁸Intor raginio kapintaran makito ralalom ru tana' ti am siminoroi ra ngaangai' ulun.