Read Timugon Murut BARUK 5 Bible Online

BARUK 5 - Timugon Murut bible

BARUK 5

¹Iruo' noyo bayang kangilukan ru guang am kaimbalaan muno, okou Jirusalim, am pakayo' noyo limpor ru katulayan ri Aki Kapuuno' ra sabuoi-buoi no.

²Sakubungo' noyo inan muno ra sukub katapatan ri Aki Kapuuno' am pakayo' noyo karaun katulayan ri Aki Kapuuno' ondo' mantilayun,

³sabap ri Aki Kapuuno' nampakito ra kaantakan muno ra ngaangai' bansa' ra tana' ti.

⁴I Aki Kapuuno' manginggalan rirun koson ra sabuoi-buoi no, “Kaansayan Ampos ru Gagaya' am Katulayan Ampos ru Sambayang”.

⁵Tirong no, okou Jirusalim, am bigor no ra tampak ru gunung. Pagilong no ra sirangon. Pagilong no koson ra susuban ri Aki Kapuuno' ondo' matulai, timinimung noyo ngaangai' anak muno intor ra sirangon am intor ra kalasaan. Ilo ngaangai' maansukan sabap ri Aki Kapuuno' mangkara' risilo.

⁶Galing i anak-anak muno binaya' mugar ru pantula'. Mantana' ilo koson mangiruan rirun. Raino inataran ilo ri Aki Kapuuno' siminaguli' rirun, am binandasan mabaya' ra urumat, koson binandasan rasawat bandasan ru pamarinta.

⁷Nanusub i Aki Kapuuno' maa' raginio gunung-gunung ondo' masawat am bulur-bulur ondo' kalo mantilayun parataan. Limayak-limayak musiti' pumpunin am tana' parataan maa' raginio ulun ru Israil makaugar mabaya' ra kaansayan ragana' panindungan ru katulayan ri Aki Kapuuno'.

⁸Mabaya' ra susuban ri Aki Kapuuno', timinuu' boo kataunan am puun-puun maamis owou koson manindung ra ulun ru Israil.

⁹Magibit i Aki Kapuuno' ra Israil muli' mabaya' ra kaansukan. Tiningganai ilo ru kaasian am gagaya' Nano, am sinilau ra sinda ru katulayan Nano.