Read Timugon Murut YEHEZKIEL 14 Bible Online

YEHEZKIEL 14 - Timugon Murut bible

YEHEZKIEL 14

¹Kukula' ngaulun tingganai ru ulun ru Israil minatong nangkuot raki' intor ra kasagaan ru TUHAN.

²Indagu boo TUHAN raki',

³“Okou ulun mapandai matoi, ngaangai' ru ulun ti nangintopot noyo ra sinungkalalaing saboi ilo naratu' ralalom ru tula. Indoson nilo kia ra tumaam Aku ra pangkuatan nilo?

⁴“Balai' ilo ra Aku, TUHAN Raja' mindagu, ‘Ulun ru Israil ondo' mangintopot ra sinungkalalaing saboi naratu' ralalom ru tula, am matong poyo boo makibilin intor ra sangulun nabi, makaapu ra taam intor Raki' — taaman ondo' nogondo' ra tula nilono.

⁵Ngaangai' sinungkalalaing no nampainggalur ra ulun ru Israil intor Raki', kaa' taam Kuno malansan Aku manimayo risilo sumaguli' Raki'.’

⁶“Ginio ra balai' ulun ru Israil ra Aku, TUHAN Raja' mindagu, ‘Talikur kano intor ra tula, am iruani' noyo sinungkalalaing mino ondo' makauyuyu' no.’

⁷“Paat ra sangulun Israil kapoam sangulun bansa' ra bokon ondo' minayan ra gino ngai' ru ulun ru Israil, timinalikur intor Raki' am siminamba ra sinungkalalaing, am makibilin boo intor ra sangulun nabi, Aku TUHAN tumaam riso!

⁸Anggalon Ku io, am saukon io koson ra pampakaraan. Patirin Ku io intor ra gino ngai' ru ulun Kuno, maa' raginio makapandai kau ra Aku noyo TUHAN.

⁹“Amon ru sangulun nabi ruungon saboi mindagu ra ondo' kalo motopot, Aku, TUHAN ondo' namparuung riso. Patirin Ku io intor ra ulun Kuno Israil.

¹⁰Nabi no pana galama', am niayuk ulun ondo' makibilin riso mangapu ra ukuman ra nogondo'.

¹¹Baalon Ku baal raginio koson manginga' ra ulun ru Israil mangiruan Raki' am mampajamol ra inan nilo ra tula. Koon raginio ilo masauk ra ulun Kuno am Aku masauk ri Aki Kapuuno' nilo.” Koon raginio noyo ragu ru TUHAN Raja'.

¹²Indagu TUHAN raki',

¹³“Okou ulun mapandai matoi, amon rondo' bansa' makatula am kalo gumagaya' Raki', ukumin Ku ilo am mamuso ra lutu' ru akanon nilo. Porotongon Ku bitilan am mamatoi ra ulun am niayuk bibiag.

¹⁴Kabalu' pana i Nuu, i Danil[19] am i Ayup, talu ngaulun no minayan ra giu' no, kinoonsoi nilo makapamayag ayuk risilo galama'.” Koon raginio noyo ragu ru TUHAN Raja'.

¹⁵“Kapoam maaru' lair porotongon Ku bibiag masigo koson mamatoi ra ulun saboi pagun no nasauk ra makalalaa' kaga' am ulun kalo makasail ra giu'.

¹⁶Sabap ra Aku, TUHAN Raja', i Aki Kapuuno' ondo' maayag, inda' pana i Nuu, i am i Ayup minayan ra giu', kalo makapamayag ilo ra anak nilo galama'. Ilo galama' ayuk ondo' maayag. Pagun ti masauk boo ra tana' kaagisan.

¹⁷“Kapoam maaru' lair porotongon Ku pangayawan ra pagun ti am mangator ra kinandoi koson mamuso ra ulun am poyo bibiag.

¹⁸Sabap ra Aku, TUHAN Raja', i Aki Kapuuno' ondo' maayag, inda' pana ru katalu-talu ngaulun no minayan ra giu', kalo makapamayag ilo ra anak nilo galama'. Ilo galama' ayuk ondo' maayag.

¹⁹Amon ru porotongon Ku maruol tumapik ra pagun ti, ulun am poyo bibiag matoi sabap ra Aku sumangit.

²⁰Sabap ra Aku, TUHAN Raja', i Aki Kapuuno' ondo' maayag, inda' pana i Nuu, i am i Ayup minayan ra giu', kalo makapamayag ilo ra anak nilo galama'. Kinoonsoi nilo makapamayag ayuk ra inan nilo galama'.”

²¹Gitio noyo ragu ru TUHAN Raja', “Porotongon Ku apat ukuman ondo' moporos kaga' ra Jirusalim koson mamuso ra ulun am poyo bibiag. Ukuman no pangayawan, bitilan, bibiag masigo am maruol tumapik.

²²Amon ru mokoondo' osoi ayuk ondo' makalabus intor ra ukuman no am niayuk makasugut mamayag ra anak-anak nano, ilai' noyo ilo paat ra ilo matong rirun. Ilai' mapara' boo laat nilono am pangintopot no ra ukuman Kuno ra Jirusalim matimpok.

²³Bagu no makapandai kou ra ngaangai' baalon Kuno mokoondo' ra sasaban ondo' motopot.” TUHAN Raja' nakaindagu noyo.