Read Timugon Murut YEHEZKIEL 18 Bible Online

YEHEZKIEL 18 - Timugon Murut bible

YEHEZKIEL 18

¹Indagu TUHAN raki',

²“Atan kia panginuuyan ondo' sasabiton ru ulun giu' ra pagun ru Israil? ‘Ina' am ama' mangakan ra anggur mataris, kaa' anak ondo' maangil ripon.’ ”

³Indagu TUHAN Raja', “Sabap ra Aku, i Aki Kapuuno' ondo' maayag, panginuuyan no kalo boo raguon giu' ra Israil.

⁴Aku tangan ra painawo ru moonong ulun, painawo ru ama' am poyo painawo ru anak. Osoi ayuk makatula, io noyo ondo' matoi.

⁵“Amon ru mokoondo' lair sangulun ondo' totopot moonsoi, matimpok am mabanis guang.

⁶Kalo sumamba io ra sinungkalalaing ru ulun ru Israil, kapoam mangakan ra taak simbalui ondo' pinataak giu' ra intok-intok sambayangan. Kalo suminto io ra andu' ru ulun ra bokon, kapoam makimarulug ra ruandu' ondo' tatanga' liuran.

⁷Kalo mamparuung io kapoam mantakou. Pasagulion no kuliamos ondo' inapu nano koson ra jaminan ra irain. Mampaakan io ra ulun maitilan am mangani' ra bayang ra ulun kolondo' bayang.

⁸Kalo makitaak io ra bunga' paat mampaira' ra ruit. Kalo masaga' io mambaal ra malaat am mamatas io ra matimpok ralalom ru moonong pansangaran.

⁹Sumugut io ra susuban Kuno am gumagaya' ra ukum Kuno. Ulun koson raginio moonsoi am maayag.” Ginio noyo ragu ru TUHAN Raja'.

¹⁰“Insan ru ulun no mokoondo' sangulun anak ondo' mantakou, mamatoi am mambaal ra masuang kalaatan

¹¹ondo' kalo igondo' binaal ru ama' nano. Nangakan anak no ra taak simbalui ondo' pinataak giu' ra intok-intok sambayangan am suminto ra andu' ru ulun ra bokon.

¹²Mamparuung io ra ulun musikin, mantakou, am kalo mampasaguli' ra kuliamos ondo' inapu no koson ra jaminan ra irain. Mongoi io ra kuil-kuil am sumamba ra sinungkalalaing ondo' makauyuyu',

¹³am niayuk makitaak ra bunga' paat mampaira' ra ruit. Maayag kia ulun no? Maaru' kalo! Nambaal io ra ngaangai' baal ondo' makauyuyu' no, am ginio ra matoi io. Mangkinibit io ra patayan nano galama'.

¹⁴“Raino amon ru ulun ondo' nambaal ra masuang kalaatan ti mokoondo' sangulun anak ungkuyon, am anak no nakakito ra ngaangai' tula ru ama' nano kaa' kalo timinilu riso.

¹⁵Kalo sumamba io ra sinungkalalaing ru ulun ru Israil, kapoam mangakan ra taak simbalui ondo' pinataak giu' ra intok-intok sambayangan. Kalo suminto io ra andu' ru ulun bokon,

¹⁶kapoam mangimbolo' ra ulun kapoam mantakou ra osoi ayuk. Pasagulion no kuliamos ondo' inapu nano koson ra jaminan ra irain. Mampaakan io ra ulun maitilan am mangani' ra bayang ra ulun kolondo' bayang.

¹⁷Kalo masaga' io mambaal ra kalaatan[24] am kalo makitaak ra bunga' paat mampaira' ra ruit. Sumugut io ra susuban Kuno am gumagaya' ra ukum Kuno. Ulun no kalo matoi sabap ra tula ru ama' nano, kaa' maaru' maayag io.

¹⁸Kaa' ama' nano ondo' mamparuung, mantakou am masalok mambaal ra kalaatan ra ngaangai' ulun, matoi sabap ra tula ondo' binaal nano galama'.

¹⁹“Maaru' mangkuot kau kua ra anak no kalo nakinibitan intor ra tula ru ama' nano. Taaman nano iono anak no nambaal ra matimpok am moonsoi. Giminagaya' io ra ukum Kuno am binaal no ra matanda'. Ginio ra maaru' maayag io.

²⁰Ulun ondo' makatula matoi. Sangulun anak kalo pana makinibitan ra tula ru ama' nano. Koon niayuk ra sangulun ama' kalo pana makinibitan ra tula ru anak nano. Sangulun ondo' moonsoi makapangapu ra balos moonsoi sabap ra kinoonsoi nano, am sangulun ondo' malaat makinibitan ru kalaatan nano.

²¹“Amon ru sangulun malaat lumonggo' mambaal ra tula, am tumalimpuun gumagaya' ra ukum Kuno, am niayuk mambaal ra ondo' motopot am moonsoi, kalo matoi io. Maaru' maayag io.

²²Ngaangai' tula nano ampunon, am maayag io sabap nambaal io ra motopot.

²³Indoson min kia ra masaga' Aku magilong ra ulun malaat matoi?” ragu ru TUHAN Raja'. “Kalo! Masaga' Aku io tumalikur ra tula am maayag.

²⁴“Kaa' amon ru sangulun moonsoi lumonggo' mambaal ra moonsoi, am tumalimpuun mambaal ra malaat am mambaal ra baal-baal ondo' binaal ru ulun malaat, maayag io ayuk kia? Kalo! Ngaangai' baal moonsoi ondo' igondo' binaal nano kalo karaan. Matoi io sabap ra kalo gumagaya' io Raki' am sabap ra makatula io noyo.

²⁵“Kaa' kamin, ‘Binaal ru TUHAN kalo matimpok.’ Rongog kano, akau ulun ru Israil. Indoson min ra kalo matimpok Aku? Akau no ondo' kalo matimpok.

²⁶Paat ra sangulun moonsoi lumonggo' mambaal ra moonsoi, mulu' poyo ra tumalimpuun io mambaal ra malaat am matoi ulun no, matoi io sabap ra binaal nano ra malaat no.

²⁷Paat ra sangulun malaat lumonggo' mambaal ra tula, am tumalimpuun mambaal ra matimpok am moonsoi, namayag ulun no ra kaayagan nano.

²⁸Nakaliman io ra kasalaan nano am longgo' nambaal ra tula. Ginio ra kalo matoi io kaa' maayag.

²⁹Akau pana ulun kau ru Israil mindagu, ‘Binaal ru TUHAN no kalo matimpok.’ Mangkara' kau ra kalo matimpok Aku, kaa' akau noyo ondo' kalo matimpok.

³⁰“Raino Aku, TUHAN Raja' mambala' ramuyun, ulun kau ru Israil, ra mangakim Aku ra moonong ulun sumugut ra binaal nano. Talikur no intor ra kalaatan ondo' tatanga' min baalon no, am pai' polosoo' tula min mamuso ramuyun.

³¹Tatango' ngaangai' kalaatan ondo' baalon min, am polosoo' pangkaraan am guang min masauk ra baguon. Kua kia ramuyun, ulun ru Israil masaga' ra matoi?

³²Kalo masaga' Aku ra osoi pana matoi,” Koon raginio noyo ragu ru TUHAN Raja'. “Talikur kano intor ra tula min maa' raginio maayag kau.”