Read Timugon Murut YEHEZKIEL 23 Bible Online

YEHEZKIEL 23 - Timugon Murut bible

YEHEZKIEL 23

²“Okou ulun mapandai matoi, mokoondo' ruo ngaulun magaka' ra ruandu'.

³Paat ra lakat poyo mamulok, minayan ilo giu' ra Misir. Giu' no nairu' ralaa nilo am nasauk ra ruandu' mantalan ra inan.

⁴Ondo' maayo makainggalan ri Ogola[30] (io tatandu' ru Samaria), am ondo' boborok makainggalan ri Ogoliba[31] (io tatandu' ru Jirusalim). Inandu' Ku ilo ruo, am mokoondo' ra anak intor risilo.

⁵Kabalu' pana i Ogola nasauk ra andu' Kuno, io magulayun masauk ra ruandu' mantalan ra inan am guang malaai ra kubayau-kubayau nano intor ra Asyur.

⁶Ilo saujor ondo' nambayang sarampun matanggilung, ulun-ulun ru langkaya', am pagawai-pagawai maatang; ilo ngaangai' pulalai ru saujor mangkuda am mangaindon ilo.

⁷I Ogola nasauk ra ruandu' mantalan ra inan ra tayar ru ngaangai' pagawai ru pagun ru Asyur. Guang malaai nano nangkinibit riso nampajamol ra inan ra siminamba ra sinungkalalaing ru Asyur.

⁸Nararayus io mantalan ra inan koson ondo' binaal nano ragili giu' ra Misir, intok nairuan ru ralaa nano. Intor ra io mamulok, ungkuyon narulug riso am pinamakuan riso koson ra ruandu' mantalan ra inan.

⁹Ginio ra pinataak Ku io ra kubayau nano, ulun ru Asyur ondo' kalaayan nano kaga'.

¹⁰Linabasan nilo io, nampagaau ra anak ungkuyon am anak ruandu' nano, am namatoi riso ra ilang. Inggalan nano susunuron ru ruandu'-ruandu' giu' ra ati ayuk intok.

¹¹“Kabalu' pana boborok nano, i Ogoliba nakakito ra baal raginio, io galama' maayo guang poyo mantalan ra inan ka maayo nano.

¹²Io pana makaguang lumaai ra ulun langkaya' am pagawai saujor ru pagun Asyur — saujor ondo' nambayang ra sarampun batik ra pajamilak — am ra pulalai mangkuda, ngaangai' no ungkuyon mamulok ra mangaindon.

¹³Nakito Ku ra jajajou toojo i Ogoliba koson ra maayo nano.

¹⁴“Buoi ka buoi lumaat poyo i Ogoliba. Nabunduk guang nano ra gambar-gambar makabatik malia' pajamilak ondo' inukir ra timbok. Gambar raginio sangulun pagawai maatang ru saujor Babilonia nagabot am nansarban ondo' pinalaboi.

¹⁵

¹⁶Pakakito ayuk i Ogoliba ra gambar no, guang malaai nano liminanja' am pangator io ra ulun sinusub mongoi risilo giu' ra Babilonia.

¹⁷Ulun ru Babilonia pana minatong am rulug riso. Jinamol nilo io koson raginio saboi pupus no nasuraan io risilo.

¹⁸Nampakito io ra inan nano ondo' nagibaang ra ulun masuang saboi ngaangai' ulun nakapandai ra io sangulun mantalan ra inan. Nasuraan Aku riso, koson ra Aku nasuraan ra maayo nano.

¹⁹Gumaai-gaai boo io masalok mantalan ra inan. Paliso nano koson paat ra io mamulok giu' ra Misir.

²⁰Guang nano lumaai kaga' ra ungkuyon maikang koson ra kaladai kapoam kuda ungkuyon.” (

²¹Okou Ogoliba, gumogot kou rumuli' mambaal ra makauyuyu' muno paat ra okou mamulok giu' ra Misir. Giu' no ungkuyon mangkama' ra titi' muno am nariu' ralaa muno.)

²²“Ginio ra, okou Ogoliba, rongogo' ragu intor Raki', TUHAN Raja'. Najala' kou noyo ra kubayau-kubayau muno. Kaa' raino baalon Ku ilo sumangit rirun am magawang rirun.

²³Timungon Ku ngaangai' ulun ru Babilonia, ulun ru Kasdim, ungkuyon intor ra Pikod, Soa, Koa am ngaangai' ulun ru Asyur. Timungon Ku ngaangai' ungkuyon mamulok ra maindon intor ra ulun langkaya' am pagawai, am niayuk ngaangai' pagawai maatang am saujor pulalai mangkuda ondo' masawat pangkat.

²⁴Bulunsaron nilo okou intor ra ralayo ra saujor ondo' maayo, am ra kurita' kuda am tarila magibit ra lutu'. Mampaguut ra perisai am mantupi' basi', magawang ilo rirun. Pataakon Tokou risilo am mangakim ilo rirun sumugut ra ukum nilo galama'.

²⁵Sabap ra sumangit Aku rirun, polosoon Ku ilo malaat pamakuan rirun. Binsilon nilo arung am talingo muno, am niayuk mamatoi ra anak-anak muno ra ungkuyon am ruandu'. Totopot ilo mamparakop am monolob ra anak-anak muno ra biag-biag.

²⁶Rilakon nilo bayang muno am gaawon limpor muno.

²⁷Langgain Ku guang malaai muno am kandoi mantalan ra inan ondo' binaal muno intor kou poyo giu' ra Misir. Kalo boo makakito kou ra sinungkalalaing kapoam mangkara' ra Misir.”

²⁸Koon ragitio noyo ragu ru TUHAN Raja', “Pataakon Tokou ra ulun ondo' masuraan kou am ondo' kasisangin muno.

²⁹Sabap ra ilo pana masisang rirun, gaawon nilo ngaangai' ampos ru kandoi muno, am mompoloso rirun magibaang koson ra ruandu' mantalan ra inan. Guang malaai am kandoi mantalan ra inan muno

³⁰nangkinibit ra baal ragitio nasauk rirun. Nasauk kou ra ruandu' mantalan ra inan tayar ra bansa'-bansa', am nampajamol ra inan muno ra sinungkalalaing nilo.

³¹Minaya' kou ra binaal ru maayo muno; ginio ra musiti' kou manginum intor ra sangkir ondo' sinuangan ra ukuman.”

³²Indagu TUHAN Raja', “Musiti' kou manginum intor ra sangkir ru maayo muno, sangkir ondo' maayo am malandom. Paat ra okou manginum intor ra sangkir ondo' nototop no, iison kou am asabin ru ngaangai' ulun.

³³Magauk kou am maimbolo' sabap ra sangkir no nototop ra malaa' am katutukan. Ginio noyo ukuman ondo' nakalumpa' ra Samaria, maayo muno.

³⁴Inumon mu ginio saboi makai'; am babakon mu sangkir no am pilaton kubab muno ra poto ru sangkir no. Aku, TUHAN Raja' nakaindagu noyo.”

³⁵Gitio noyo ragu ru TUHAN Raja', “Sabap ra nakalilian kono Raki' am niayuk nanalikur Raki', mansaan kou ra kaimbalaan kinibit ru guang malaai am kandoi mantalan ra inan muno.”

³⁶Indagu TUHAN raki', “Okou ulun mapandai matoi, nakatampos kono kia mangakim ri Ogola am Ogoliba? Sonsolo' ilo sabap ra nambaal ra ondo' makauyuyu'.

³⁷Nansawa' ilo am namatoi ra ulun. Nansawa' ilo ra sinungkalalaing am namatoi ra anak-anak Kuno ondo' inanak nilo. Pinataak nilo anak-anak Kuno koson ra taak simbalui ra sinungkalalaing nilo.

³⁸Sala' ka ginio ayuk. Jinamalan nilo Baloi Kuno am orou Sabat ondo' inaru' Ku noyo.

³⁹Namatoi ilo ra anak-anak Kuno koson pataakon koson ra taak simbalui ra sinungkalalaing, am paat ra orou raginio niayuk minatong ilo ra Baloi Kuno am jinamalan!

⁴⁰“Ilo pinai boo nangator ra ulun sinusub koson mangkimait ra ungkuyon intor ra intok maalur. Makaratong boo ungkuyon-ungkuyon, ruo ngaulun magaka' no mariu', kaitomon mato am malimpor.

⁴¹Manturung ilo giu' ra kurisi' maawar ondo' moonsoi, giu' ra saang ru mija' ondo' natikop ra akanon maamis, am kaminyan am niayuk umau jaitun ondo' pinataak Kuno risilo.

⁴²Ungkuyon ondo' kinimaitan intor ra tana' kaagisan natimung ra giu' no am morongog bolos nilo ra maansukan. Pinonggolong nilo kalindu' ru magaka' no, am pinangkaraun ondo' moonsoi ra ulu nilo.

⁴³Ilain Ku ra ngaangai' ulun no lakat poyo maayo guang malaai ra ruandu' ondo' malawo noyo sabap ra pansasawaan.

⁴⁴Ruruli' ilo matong ri Ogola am i Ogoliba, ruo ngaulun ruandu' ondo' kalo mapasau no.

⁴⁵Ulun moonsoi guang mindagu ra magaka' no makasala sabap ra pansasawaan am pamatayan. Nansawa' ilo am nampalayak ra raraa'.”

⁴⁶Indagu TUHAN Raja', “Piawo' santimungan ulun koson mampalalaa' am mantakou risilo.

⁴⁷Polosoo' santimungan ulun no momobol risilo am mamulunsar risilo ra ilang, mamatoi ra anak-anak nilo, am monolob ra baloi nilo.

⁴⁸Pupusin Ku baal mantalan ra inan ra titikop ru pagun. Baalon Kuno masauk ra pampakaraan ra ngaangai' ruandu' ra totopot pai' pansawa' koson ra karuo-ruo magaka' no.

⁴⁹Koson boo ra akau ruo, alii ra Ogola am Ogoliba, ukumin Ku sabap ra nantalan kau ra inan am siminamba ra sinungkalalaing. Bagu no makapandai kau ra Aku noyo TUHAN Raja'.”