Read Timugon Murut YEHEZKIEL 24 Bible Online

YEHEZKIEL 24 - Timugon Murut bible

YEHEZKIEL 24

¹Paat ra orou koopor, sila' koopor, bilor kasiam paat ra akai ralalom ru pamatiran, indagu TUHAN raki',

²“Okou ulun mapandai matoi, tulisi' orou bulan ra orou raiti', sabap ra orou raiti' noyo raja' ru Babilonia tumalimpuun magawang ra Jirusalim.

³Aku, TUHAN Raja' mokoondo' ra pagabigan koson posoboyon ra ulun Kuno ondo' masaga' gumuor: Parakano' pagangan ra rasawat ru apui, am totopo' pagangan ra timug.

⁴Pasuboo' kual ondo' moonsoi kaga' ra ralalom nano: kual ru limbawo am kual ru paa, am bungul-bungul ondo' masuang utok nano.

⁵Alap ra kual ru domba ondo' moonsoi kaga', am pantuumo' luton[32] giu' ra saau ru pagangan. Polosoo' timug nano rumiri', tonoko' kual am bungul-bungul no.”

⁶Gitio noyo ragu ru TUHAN Raja', “Aibui boo ra bandar ondo' nososok ra ulun mamatoi! Baal nano koson ra pagangan nontogol ondo' kalo igondo' liniungan. Kual ondo' pinasubo ra ralalom no iningkual saputul am saputul, saboi ngaangai' no nakai'.

⁷Pamatayan nasauk giu' ra ralalom ru bandar, am raraa' pinasasar ra rasawat ru batu. Raraa' no kalo pinasasar ra tana' maa' raginio matauban ru tana'.

⁸Raraa' no polosoon Ku ra giu' no, maa' raginio makito ru ulun am gumogot mambalos.”

⁹Gitio noyo ragu ru TUHAN Raja', “Aibui boo ra bandar ondo' nososok ra ulun mamatoi! Aku galama' mansuru.

¹⁰Ruangin poyo luton! Uyupi' apui! Ansako' kual no! Ansako' saboi malasak ruu' nano. Solobo' bungul-bungul no!

¹¹Iruani' boo pagangan gangsa' ondo' kolondo' suang giu' ra rasawat ru apui saboi malia' kaga'. Mopongo togol nano mosolob, pagangan no mapasau saguli' sumugut ra kaulayan ru ugama.

¹²Kaa' kalo ngaangai' togol nano mairu' ra mosolob ru apui.[33]

¹³Okou Jirusalim, jinamol kou ru binaal muno ra mantalan ra inan. Kabalu' pana kuminam Aku mampapasau rirun, kaa' magulayun kou majamol. Kalo mapasau kou saguli' saboi ra okou makaliman ra ngaangai' kinoporos ru sangit Kuno.

¹⁴Aku, TUHAN Raja' nakaindagu noyo. Nasaboi paat nano ra Aku mimbuor. Kalo malilianan Ku tula muno kapoam makaasi' rirun. Ukumin kou sabap ra binaal Muno.” TUHAN Raja' nakaindagu noyo.

¹⁵Indagu TUHAN raki',

¹⁶“Okou ulun mapandai matoi, pulali' Ku mangalap ra ulun ondo' tagamin muno kaga', kaa' kalo makapanulaboi kou, kapoam mantangi', kapoam mompoloso ra lomou muno rumatu'.

¹⁷Pai' polosoo' ulun mokorongog ra sikok muno. Pai' pantana' ra kalo sigalon ulu kapoam mangkasut koson tatandu' mangulir. Pai' silii' bulos kapoam mangakan ra akanon mangulir.”

¹⁸Paat ra susuab ti mindagu aku ra ulun no am paat ra rondom ti matoi andu' kuno. Suabon no nambaal aku ra atan ondo' nanusuban raki'.

¹⁹Mangkuot ulun raki', “Kua kia baalo' mu ginio?”

²⁰Taam aku koson ragitio, “Minindagu TUHAN raki' am nanusub raki'

²¹nampasaboi ra tanou ti ramuyun, ulun ru Israil: Lumimbau kau ra kinapiot ru Baloi ru TUHAN. Masaga' kau magilong am mongoi ilong, kaa' jamalin ginio ru TUHAN. Ulun ru sasambaloi min ondo' lakat poyo mamulok, ondo' minayan giu' ra Jirusalim potoyon ralalom ru pangayawan.

²²Kopongo raginio baalon min atan ondo' baalon ku raino. Siliin min bulos kapoam mangakan ra akanon mangulir.

²³Kalo mugar kau ra kolondo' sigal ru ulu, kapoam kasut. Kalo manulaboi kau kapoam mantangi'. Gumaai kagas min sabap ra tula min, am mampalaa kau ra rondo' am bokon.

²⁴Paat raginio masauk aku ra tatandu' ra tayar min. Baalon min atan ondo' baalon ku raino. Mindagu TUHAN ra paat masauk baal raginio, makapandai kau ra Io noyo TUHAN Raja'.”

²⁵Indagu TUHAN, “Okou ulun mapandai matoi, alapon Ku Baloi Kuno ondo' mapiot no intor risilo, Baloi ondo' linimbawan am kasagain nilo, am ondo' ilain am angayin nilo ra guang maansukan. Aku pana mangalap niayuk ra anak-anak nilo.

²⁶Paat ra orou Aku mambaal raginio, sangulun ondo' maayag intor ra karaat no matong mambala' rirun ra baal raginio.

²⁷Paat ra orou raginio niayuk makaindagu kou saguli', am mindagu kou riso. Koon raginio noyo okou masauk ra tatandu' ra tayar ru ulun, am makapandai ilo ra Aku noyo TUHAN.”