Read Timugon Murut YEHEZKIEL 26 Bible Online

YEHEZKIEL 26 - Timugon Murut bible

YEHEZKIEL 26

¹Paat ra orou kasaa', sila'[36] …, bilor koopor am rondo' paat ra akai ra pamatiran, indagu TUHAN raki',

²“Okou ulun mapandai matoi, rongogo' golos magilakup ru ulun ru Tirus. Golok ilo, ‘Jirusalim natutuk noyo! Kaikangan ru pantalanan nano nairu' noyo! Jirusalim kalo boo nasauk ra gumula' ritakau!’ ”

³Indagu TUHAN Raja', “Aku pantula' muno, okou Tirus. Magibit Aku ra masuang bansa' koson mamulunsar rirun. Matong ilo koson ra kinulun ru raat.

⁴Pusoon nilo timbok-timbok ru bandar muno am mampalunsai ra manara-manara muno. Mopongo raginio alusin Ku ngaangai' kaau saboi rondo' batu ayuk boo soroi.

⁵Ulun mangimpait manuug ra ralo nilo giu' ra tampak ru batu ondo' giu' ra tanga' ru raat no. Aku, TUHAN Raja' minindagu noyo. Bansa'-bansa' ra bokon mantakou ra Tirus,

⁶am ra manangilang, mamatoi ilo ra mamagun giu' ra bandar-bandar giu' ra tana' marata' ru Tirus. Makapandai boo Tirus ra Aku noyo TUHAN.”

⁷Indagu TUHAN Raja', “Mangkinibit Aku ra Raja' Nibukadnijar intor ra Babilonia mamulunsar ra Tirus. Raja' ra maikang kaga' no matong intor ra ralayo mabaya' ra pulalai saujor ondo' maayo kaga', am masuang kuda, kurita' kuda am pulalai mangkuda.

⁸Mamagun ru bandar-bandar giu' ra tana' marata' potoyon ralalom pangayawan. Pantula' mangkali ra parit, mambaal ra timbok pagawangan, am manampos ra perisai koson ra kubu ondo' mapiot koson manggal rirun.

⁹Popolon nilo timbok-timbok muno ra tataun tukul, am momopol ra manara-manara muno ra basi' maawar.

¹⁰Kuda nilo masuang kaga' saboi mangkinibit ra kaau kukulampun am lumibung rirun. Kurutuk ru kalayam intor ra pulalai mangkuda am kurita' kuda manguyog ra timbok ru bandar muno paat ra ilo mansail giu' ra kulobon garabang am sumubol ra bandar ondo' nalunsai no.

¹¹Pulalai mangkuda no mampajanjang ra ralan-ralan muno, liliwa' mamatoi ra mamagun muno ra ilang. Batu-batu pangkaraan muno ondo' maayo no gabaan.

¹²Gaawon ru pantula' kalangkayaan am kuliamos talanon muno. Gabaan nilo timbok-timbok am manutuk ra baloi moonsoi muno. Patirin nilo ngaangai' batu, tataun am natuyas ra batu ra ralalom ru raat.

¹³Langgain Ku rimbai muno am miujik jitor muno.

¹⁴Tatangon Ku rondo' batu ayuk ra tayar ru ulun mangimpait manuug ra ralo. Bandar no kalo boo baalon. Aku TUHAN Raja' nakaindagu noyo.”

¹⁵Indagu TUHAN Raja' ra bandar Tirus, “Paat ra okou kuasaan ra maagu no, ulun ondo' soroi giu' ra gawar ru nagas malaa' sabap ra nokorongog ra golok ru ulun ondo' pinatoi.

¹⁶Ngaangai' raja' ru bansa'-bansa' giu' ra kiing ru nagas tumuun intor ra kurisi' turungan nilo. Aluson nilo sukub am bayang mokoondo' ra sulam am manturung ra monontol giu' ra tana'. Malaa' ilo kaga' magilong ra pupus muno saboi kalo lumonggo' ilo monontol.

¹⁷Rimbayon nilo boo rimbai sulaboi ragitio ramuyun: Bandar maayo no napuso noyo! Kapal-kapal nano inalusan[37] intor ra raat. Ragili mamagun nano nanguasa' ra raat, am nampalalaa' ra ngaangai' mamagun ru raat.

¹⁸Kaa' raino naratu' kou noyo, mamagun ru pulu'-pulu' monontol; nakatigog ilo nokorongog ra nalunsayan muno.”

¹⁹Indagu TUHAN Raja', “Saukon Tokou ra masiluk koson ra bandar ondo' kolondo' mamagun. Taubin Tokou ra timug intor ra raat.

²⁰Atarin Tokou ra intok ru ulun minatoi maa' raginio mayan kou masimpung ra ulun ra galing i. Polosoon Tokou lumayun ra intok ru ulun minatoi, giu' ra tanga' ru nalunsai ondo' mantilayun, mabaya' ra ulun minatoi. Tana' muno pana kalo boo ayanin ru ulun, am kalo makasimpung kou ra gino ngai' ru ulun maayag.

²¹Saukon kou ra tiluan ondo' makalalaa', am koon raginio noyo pupus ru bayag muno. Maaru' ulun maguyum rirun, kaa' kalo matuum kou.” TUHAN Raja' nakaindagu noyo.