Read Timugon Murut YEHEZKIEL 27 Bible Online

YEHEZKIEL 27 - Timugon Murut bible

YEHEZKIEL 27

¹Indagu TUHAN raki',

²“Okou ulun mapandai matoi, parimbai no ra rimbai sulaboi ra tayar ru Tirus,

³bandar giu' ra kiing ru nagas ondo' mantalan ra mamagun ru ngaangai' nagas. Pabalaa' noyo ragu ru TUHAN Raja': Okou Tirus, ra limbau muno mindagu, ‘Totopot kou moonsoi kaga'.’

⁴Raat koson ra baloi ra tayar muno. Ulun nambaal rirun no nangindon rirun koson ra kapal moonsoi.

⁵Rinding muno intor ra tataun sipris intor ra Gunung Girmon, lugu' muno intor ra tataun sidar intor ra Libanon.

⁶Kakabil-kakabil muno binaal intor ra puun tataun oak intor ra Basan. Sulig muno binaal intor ra tataun pain intor ra Siprus, am limpor muno binaal intor ra gading.

⁷Konoon layar ondo' nasauk ra tatandu' muno binaal intor ra linon binaal ra Misir, am mansalinut sulaman. Konoon ru kim muno binaal intor ra konoon malilis, konoon ondo' batik nano matanggilung intor ra Siprus.

⁸Ulun mangkabil muno intor ra Sidon am Arwad. Ulun-ulun muno galama' ulun masundoi ra raat ondo' mapandai kaga'.

⁹Ulun manukang ra tataun ondo' nambaal ra kapal muno ulun manukang ondo' mapandai kaga' intor ra Gibal. Ulun masundoi ra raat intor ra moonong kapal matong mongoi ra kadai-kadai muno koson mantalan.

¹⁰“Saujor intor ra Pirsia, Lidia am Libia mangandoi ralalom ru pulalai mangayou muno. Pinatair nilo perisai am tupi' basi' nilo ra timbok-timbok ru bandar muno. Sinauk nilo okou ra mauligan kaga'.

¹¹Saujor intor ra Arwad nagalung ra timbok muno, am ulun intor ra Gamad magalung ra manara muno. Tinair nilo perisai nilo ra timbok muno, am nangukop ra kinoonsoi muno.

¹²“Mantalan kou giu' ra Sipanyol am nangapu ra pirok, basi', timah mapulak am timah maitom koson ra pangalig ra bayaran ru kuliamos muno ondo' masuang no.

¹³Mantalan kou giu' ra Junani, Tubal am Misik, am nokoowot ra ulipon am kuliamos gangsa' koson ra pangalig ra kuliamos muno.

¹⁴Nakaapu kou niayuk ra kurita' kuda, kuda ra kurain, am baghal intor ra Bit-Togarma koson ra pangalig ra kuliamos muno.

¹⁵Ulun ru Rodis[38] pana mantalan ramuyun; mamagun giu' ra masuang intok tampilon ra nagas nambali ra kuliamos muno am nambayar ra gading am tataun maitom.

¹⁶Ulun ru Siria nambali ra kuliamos muno am nambayar ra batu jamrud, konoon matanggilung, konoon mokoondo' ra sulam, konoon linon malilis, batu karang am batu dalima'.

¹⁷Jiuda am Israil nambali ra kuliamos muno am binayaran ra gandum,[39] ruu' maningot, umau jaitun am apa' pampagamis ra akanon.

¹⁸Mamagun ru Damsyik nambali ra kuliamos tinalan am ampos-ampos muno am binayaran ra wain intor ra Gilbon, bulu ru domba intor ra Sagar,[40] am apa' pampagamis ra akanon.

²⁰Mamagun ru Didan nambayar ra kuliamos muno ra konoon apin ru palana.

²¹Ulun ru Arab am ulun manguasa' ra Kidar nambayar ra kuliamos muno ra kambing, domba gawayan am anak ru domba.

²²Ulun mantalan intor ra Syiba am Raima nambayar ra kuliamos muno ra intan, mas am apa' pampagamis ra akanon ondo' moonsoi kaga'.

²³Bandar-bandar Aran, Kani, Idin, ulun mantalan intor ra Syiba, bandar-bandar Asyur am Kilmad, ngaangai' no mantalan ramuyun.

²⁴Nantalan ilo ra konoon moonsoi kaga', konoon matanggilung, konoon mokoondo' ra sulam, permaidani ondo' mansalinut batik, am kalat-kalat ra maikang.

²⁵Kuliamos talanon muno inibit ru kapal-kapal ondo' maayo kaga'. Okou koson ra kapal giu' ra raat, nososok ra kuliamos maagat.

²⁶Paat ra kakabil muno magibit rirun masundoi, angin sirangon lumumpa' rirun giu' ra tanga' ru raat.

²⁷Ngaangai' kuliamos talanon muno, ngaangai' ulun masundoi ra raat am ulun-ulun muno, ulun manukang ra tataun am ilo ulun mantalan muno, am moonong saujor ralalom ru kapal muno, ngaangai' no natatak ra nolosor paat ra kapal muno nakalom.

²⁸Golok ru ulun masundoi ra raat ondo' nakalom norongog saboi ra nagas.

²⁹“Raino moonong kapal iruanin, moonong ulun masundoi ra raat masak ra lantur.

³⁰Manulaboi ilo rirun ra malumpus, pinatauk nilo kaau ra ulu am liminuir ra ralalom ru kaau sabap ra mangiluk guang.

³¹Binulutan nilo abuk sabap ra akau, am nambayang ra konoon karung tatandu' mangiluk guang. Manulaboi ilo ra guang mangiluk.

³²Marimbai ilo ra rimbai sulaboi rirun, ‘Tirus, osoi kia mokogondo' rirun? Tirus, giu' ra raat raino mongkoror kou.

³³Paat ra ulun-ulun mantalan muno masundoi mongoi ra sandaup ru raat, Inukapan mu ngaangai' bansa' ra pakuan nilo. Raja'-raja' lumangkaya' sabap ra kuliamos muno ondo' mokologo.

³⁴Kaa' raino natutuk kano, am nolosor ra lonor ru raat. Kuliamos muno am ngaangai' ulun muno natatak nabaya' rirun giu' ra raat.’

³⁵“Ngaangai' ulun ondo' minayan giu' ra gawar ru nagas no nakatigog nokorongog ra pupus muno. Raja'-raja' nilo pana totopot nalaa'; laa' makito ra bulos nilo.

³⁶Natatak kou am liminiot ra sabubuoi no. Ulun mantalan giu' ra titikop ru tana' malaa' amon ru ilo niayuk matiu' koson rirun.”