Read Timugon Murut YEHEZKIEL 36 Bible Online

YEHEZKIEL 36 - Timugon Murut bible

YEHEZKIEL 36

¹Indagu TUHAN, “Okou ulun mapandai matoi, indagu no ra kagunungan Israil am susubo' kagunungan no rumongog ra tanou intor Raki',

²TUHAN Raja': Pantula' ru Israil magasab risilo am mindagu, ‘Raino bulur-bulur ra galing i longgom takau!’

³“Panala' no am potonowo' noyo atan ondo' paraguon Kuno, TUHAN Raja'. Paat ra bansa'-bansa' paginggaar mangala am mantakou ra kagunungan ru Israil, ilo ngaangai' magasab ra Israil.

⁴Ginio ra alii ramuyun gunung am bulur ru Israil, sungoi boborok am limayak, intok ra nalunsai-lunsai, am bandar ondo' iniruanan ru mamagun nano am niayuk tinakawan am inasaban ru bansa'-bansa' giu' ra libung no, rongogo' atan ondo' paraguon Kuno, TUHAN Raja' ramuyun.

⁵“Ralalom ru simbuluk ru sangit Kuno, TUHAN Raja' nagulas ra bansa'-bansa' paginggaar no, mulu' poyo ra Idom. Pinabaya' ra maansayan am paliso magasab, ginaau nilo pagun Kuno am padang sakot no.

⁶“Ginio ra indagu ra manala' ra pagun ru Israil. Posoboyo' atan ondo' paraguon Kuno, TUHAN Raja' ra totopot sumangit ra gunung, bulur, sungoi boborok, am niayuk limayak, sabap ra bansa'-bansa' no nagasab am manauyu' ra intok-intok raginio.

⁷Aku, TUHAN Raja' magibot ra bansa'-bansa' ra libung no asabin.

⁸Kaa' puun-puun tataun giu' ra kagunungan ru Israil makaraun am makakawa' saguli' ra tayar min, Israil kau, ulun Kuno. Kalo boo mabuoi makauli' kau.

⁹Manaung Aku ramuyun. Tutunon Takamin maa' raginio tana' min raduon am tanamin saguli' ra sampug.

¹⁰Ruangin Ku suang min. Mayan kau giu' ra bandar-bandar am manambaloi saguli' ra ngaangai' ondo' nalunsai.

¹¹Ruangin Ku suang ru mamagun am bibiag tinambiag min. Suang mino gumayo poyo intor ragili. Mokoondo' kau ra anak masuang. Iowon Takamin mayan ra giu' koson ragili, am palangkayaan Takamin koson ra kalo igondo' mino nailian. Bagu no makapandai kau ra Aku noyo TUHAN.

¹²Ibiton Takamin, Israil ulun Kuno muli' maa' raginio makaayan kau poyo ra pagun no. Pagun no masauk ra longgom min, am masalok mangani' ra ampos nano maa' raginio anak-anak mino kalo matoi ra maitilan.

¹³“Aku, TUHAN Raja' mindagu: Topot ragu ru ulun ra pagun ti mangakan ra ulun, am pagun ti mapasauk ra bansa' nano mailusan ra anak-anak nano.

¹⁴Kaa' intor raino pagun ti kalo boo mangakan ra ulun kapoam mapasauk ra bansa' nano mailusan ra anak-anak nano. Aku, TUHAN Raja' nakaindagu noyo.

¹⁵Pagun ti kalo boo asabin kapoam iison ru bansa'-bansa'. Pagun ti kalo boo mamuso ra mamagun nano. Aku, TUHAN Raja' nakaindagu noyo.”

¹⁶Indagu TUHAN raki',

¹⁷“Okou ulun mapandai matoi, paat ra ulun ru Israil minayan giu' ra pagun nilo, jinamol nilo pagun no ra baal ru kaayagan am paliso nilo. Karaan Ku paliso nilono majamol koson ra ruandu' ondo' tatanga' liuran.[57]

¹⁸Polosoon Ku ilo makaliman ra ngaangai' sangit Kuno sabap ra nambaal ilo ra masuang namatayan giu' ra pagun no, am jinamol ginio ra sinungkalalaing nilo.

¹⁹Ukumin Ku ilo nogondo' koson ra baal ru kaayagan nilo am paliso nilo, am pantutuliaron Ku boo ilo giu' ra pagun-pagun ra bokon.

²⁰Ati ayuk angayan nilo, jamalin nilo inggalan Kuno ondo' matulai sabap ra kon ru ulun, ‘Ilai', ilo ulun ru TUHAN, kaa' iniruanan nilo kalalaat pagun ondo' tinaakan Nano risilo.’

²¹Totopot Ku lioon inggalan Kuno ondo' matulai, ondo' jinamol ru ulun ru Israil ra ati ayuk angayan nilo.

²²“Ginio ra posoboyo' tanou intor Raki', TUHAN Raja' ra ulun ru Israil: Atan ondo' baalon Kuno sala' ka sabap no kaatangan min ulun ru Israil, kaa' sabap no kaatangan ru inggalan Kuno ondo' matulai, ondo' jinamol min giu' ra moonong pagun inangayan min.

²³Paat ra pakitonon Ku katulayan ru inggalan Kuno ondo' maayo no ra bansa'-bansa' — inggalan ondo' jinamol min ra akau po ngai' — bagu no makapandai bansa'-bansa' ra Aku noyo TUHAN. Aku, TUHAN Raja' nakaindagu noyo. Pakayon Takamin koson mampakito ra katulayan Kuno risilo.

²⁴Timungon Takamin intor ra moonong pagun am intor ra moonong bansa' am magibit ramuyun muli' ra pagun min galama'.

²⁵Takisin Takamin ra timug mapasau, am mampapasau ramuyun intor ra ngaangai' sinungkalalaing min am ngaangai' no ondo' nampajamol ramuyun.

²⁶Aniin Takamin ra guang am pangkaraan ondo' bagu. Aligin Ku guang mino ondo' mokotog ra guang ondo' gumagaya'.

²⁷Pasasaron Ku Ambiluo Kuno ralalom ru guang mino maa' raginio sumugut kau ra ukum Kuno am gumagaya' ra ngaangai' susuban ondo' tinaakan Ku noyo ramuyun.

²⁸Mayan kau boo ra pagun ondo' tinaakan Kuno ra kinamatuaan mini. Akau masauk ra ulun Kuno, am Aku masauk ri Aki Kapuuno' min.

²⁹Palabuson Takamin intor ra ngaangai' ondo' mampajamol ramuyun. Susubon Ku gandum maa' raginio tumuu' ra malabung saboi kalo boo makaili' kau ra bitilan.

³⁰Ruangin Ku ampos ru puun kinawa' am ampos ru umo mino, maa' raginio kolondo' boo bitilan ondo' mampauyu' ramuyun ra gino ngai' ru bansa'-bansa'.

³¹Makara' min paliso malaat am kasalaan ondo' binaal mino, am majamalan kau boo ra inan galama' sabap ra tula am binaal malaat mino.

³²Kaala' kano Israil, kalo binaal Ku ngaangai' no koson ra kaatangan min. Kaa' masaga' Aku ra akau mauyu' am asabin sabap ra binaal min. Aku TUHAN Raja' nakaindagu noyo.”

³³Indagu TUHAN Raja', “Mopongo Takamin maimpasawan intor ra ngaangai' tula mino, iowon Takamin mayan poyo giu' ra bandar-bandar mino, am mamuna' ra nangalunsai no.

³⁴Moonong ulun ondo' mansail giu' ra umo min makakito ra mapara' boo tana' no kolondo' tutuu', kaa' polosoon Takamin mangandoi poyo ra tana' no.

³⁵Moonong ulun mindagu boo ra tana' ondo' ragili kolondo' tutuu' nasauk boo koson ra Taman Idin, am bandar-bandar ondo' linunsai, tinakawan am pinoloso napuut, raino nasauk ra bandar mokoondo' ra kubu am inayanan ru ulun.

³⁶Bagu no makapandai bansa'-bansa' paginggaar ondo' lakat poyo maayag ra Aku, TUHAN nambaal saguli' ra bandar-bandar ondo' napuut am nangandoi saguli' ra tana' ondo' kolondo' tutuu'. Aku, TUHAN nambantu' mambaal raginio am maaru' baalon Ku ginio.”

³⁷Indagu TUHAN Raja', “Igondo' poyo iowon Ku ulun ru Israil makiindangan Raki', am ruangin Ku suang nilo koson ra sampanon ru domba.

³⁸Bandar-bandar ondo' raino napuut mososok ra ulun, koson ragili Jirusalim nososok ra domba ondo' pataakon paat ra orou pangiantakan. Bagu no makapandai ilo ra Aku noyo TUHAN.”