Read Timugon Murut YEHEZKIEL 37 Bible Online

YEHEZKIEL 37 - Timugon Murut bible

YEHEZKIEL 37

¹Malimanan Ku kuasa' ru TUHAN, am Ambiluo Nano magibit raki' ra rondo' limayak ondo' nososok ra bungul.

²Nagibit TUHAN raki' liminiput ra limayak no, am nakakito aku ra bungul-bungul nakulipatak ondo' masuang kaga' am mapua' kaga'.

³Indagu Io raki', “Okou ulun mapandai matoi, maayag kia saguli' bungul-bungul no?” Taam aku, “Iou TUHAN Raja', Okou ayuk makapandai ra taaman nano!”

⁴Indagu Io, “Indagu no ra ragu manala' ra bungul-bungul no. Susubo' bungul-bungul no rumongog ra ragu ru TUHAN.

⁵Balai' bungul-bungul no ra Aku, TUHAN Raja' mindagu ra bungul mapua' no, ‘Pasampuyon Ku painawo ra ralalom mino maa' raginio maayag kau saguli'.

⁶Aniin Takamin ra uat am kual, am niayuk taubin kau ra kungkung. Aniin Takamin ra painawo maa' raginio maayag kau saguli'. Bagu no makapandai kau ra Aku noyo TUHAN.’ ”

⁷Ondo' aku, i Yehezkiel mindagu ra ragu manala' koson ra nanusuban raki'. Tatanga' aku manala', mokorongog aku ra bolos sakuripak, am bungul-bungul no pana tumalimpuun boo matunggul ra rondo' am bokon.

⁸Tatanga' aku magilong, bungul-bungul no tumalimpuun makauat am makakual, am taubi' ru kungkung, kaa' inan-inan no kalo poyo maminawo.

⁹Indagu i Aki Kapuuno' raki', “Okou ulun mapandai matoi, indagu ra ragu manala' ra angin.[58] Raguo' ra TUHAN Raja' manusub ra angin maa' raginio matong intor ra moonong intok koson pasampuyon painawo ra ralalom ru inan-inan ti saboi maayag saguli'.”

¹⁰Aku pana mindagu ra ragu manala' koson ra nanusuban raki'. Angin pana nanampui ra painawo ra ralalom ru inan-inan no saboi inan-inan no maayag am minigor. Masuang ilo kaga', maukop mambaal ra rondo' pulalai ru saujor ondo' maayo.

¹¹Indagu i Aki Kapuuno' raki', “Okou ulun mapandai matoi, ulun ru Israil nogondo' koson ra bungul-bungul no. Kon nilo ra mapua' ilo, ra kolondo' kalansanan am kolondo' orou tauli.

¹²Ginio ra indagu no ra ragu manala' ra ulun Kuno, Israil, am balai' ilo ra Aku, TUHAN Raja' mangukab ra lobong nilo. Ingkualon Ku ilo intor ra giu' no am magibit risilo muli' ra pagun ru Israil.

¹³Mabaal Ku ngaangai' baal raginio, makapandai ilo boo ra Aku noyo TUHAN.

¹⁴Pasampuyon Ku painawo Kuno ra ralalom nilo koson mamayag risilo saguli'. Aku pana mangiou risilo mayan poyo giu' ra pagun nilo galama'. Makapandai ilo boo ra Aku noyo TUHAN. Binantu' Ku mambaal raginio am maaru' baalon Ku. Aku, TUHAN minindagu noyo.”

¹⁵Indagu poyo TUHAN raki',

¹⁶“Okou ulun mapandai matoi, alapo' rondo' tataun am tulisi', ‘Pamarintaan ru Jiuda’. Alapo' boo rondo' tataun poyo am tulisi', ‘Pamarintaan ru Israil’.

¹⁷Guuton boo karuruo tataun no maa' raginio matunggul pompor nano am masauk ra rondo' tataun.

¹⁸Paat ra mangkuot bansa' muno ra arati' nano,

¹⁹balai' ilo ra Aku, TUHAN Raja', mangalap ra tataun ondo' makatatandu' ru Israil am patunggulon ginio ra tataun ondo' makatatandu' ru Jiuda. Guuton Ku karuruo tataun no maa' raginio masauk rondo' tataun ralalom ru kalindu' Kuno.

²⁰“Guuto' karuruo tataun no am polosoo' bansa' no magilong raginio.

²¹Pambala' boo risilo ra Aku, TUHAN Raja' manimung ra ngaangai' ulun Kuno intor ra pagun-pagun intok inangayan nilo. Ibiton Ku ilo muli' ra pagun nilo galama'.

²²Saukon Ku ilo rondo' bansa' giu' ra tana' raginio, giu' ra kagunungan ru Israil. Sangulun raja' mamarinta risilo am kalo boo mantuliar ra ruo bansa' kapoam ruo pamarintaan.

²³Kalo boo jamalin nilo inan nilo ra sumamba ra sinungkalalaing ondo' makauyuyu' kapoam mambaal ra tula. Palabuson Ku ilo intor ra ngaangai' ondo' mangkinibit risilo makatula am manumbalik Raki'. Kapasawon Ku ilo; masauk ilo boo ra ulun Kuno, am masauk Aku boo ri Aki Kapuuno' nilo.

²⁴Sangulun raja' koson ri Daut, ulipon Kuno, masauk ra raja' nilo. Pasimpungon Ku ilo ragana' ru sangulun manguasa' am totopot gumagaya' ilo ra ukum Kuno.

²⁵Mamagun ilo ra pagun ondo' tinaakan Kuno ri Jakub, ulipon Kuno, giu' ra pagun inayanan ru kinamatuaan nilo. Ilo am papag nilo mayan ra giu' ra sabubuoi no. Sangulun raja' koson ri Daut, ulipon Kuno mamarinta risilo ra sabubuoi no.

²⁶Mambaal Aku ra nabantuan risilo, am nabantuan no koson ra jamin ru pamayagan risilo ra sabubuoi no. Mambarakat Aku risilo am ruangin suang nilo. Mambaal Aku ra Baloi Kuno, ondo' magulayun giu' ra pagun nilo ra sabubuoi no.

²⁷Sumimpung Aku risilo. Masauk Aku boo ri Aki Kapuuno' nilo am masauk ilo boo ra ulun Kuno.

²⁸Paat ra paayanon Ku Baloi Kuno giu' ra tatanga' nilo ra sabubuoi no, makapandai ilo boo ra Aku, TUHAN nampili' ra Israil koson ra ulun Kuno galama'.”