Read Timugon Murut YEHEZKIEL 39 Bible Online

YEHEZKIEL 39 - Timugon Murut bible

YEHEZKIEL 39

¹Indagu TUHAN Raja', “Okou ulun mapandai matoi, ulaso' i Gog, ulun manguasa' kasaa' ru pagun Misik am Tubal, am balai' ilo ra Aku ti pantula' nano.

²Palimpuongon Ku io, am magibit riso mingkual intor ra intok maalur giu' ra ralayo saboi io ra kagunungan ru Israil.

³Mopongo raginio lambaan Ku panah nano saboi malabusan intor ra kalindu' ra kait nano, am mamparatu' ra anak panah intor ra kalindu' ra pamiris nano.

⁴I Gog am saujor nano, am niayuk saujor paguum nano matoi giu' ra kagunungan ru Israil. Polosoon Ku baangkai nilo akanon ru susuit am bibiag masigo.

⁵Maratu' ilo am matoi giu' ra padang. Aku, TUHAN Raja' nakaindagu noyo.

⁶Mampaang Aku ra apui giu' ra pagun Magog, am giu' ra gawar ru nagas intok ru ulun maayag ra kaansayan. Ngaangai' ulun makapandai boo ra Aku noyo TUHAN.

⁷Tutunon Ku Israil, ulun Kuno, makaulig ra inggalan Kuno ondo' matulai, am kalo polosoon Ku jamalin inggalan Kuno. Bansa'-bansa' makapandai boo ra Aku noyo TUHAN, i Aki Kapuuno' ru Israil, i Aki Kapuuno' ondo' matulai.”

⁸Indagu TUHAN Raja', “Orou ondo' sinabit Kuno maaru' sumaboi.

⁹Mamagun ru bandar-bandar giu' ra Israil mingkual am manimung ra kuliamos malarom ondo' tinatang, iono perisai, panah, anak panah, tutura', am tataun lalamba'. Pakayon nilo ngaangai' koson ra luton, am ngaangai' no maukop koson tulu' ngambilor.

¹⁰Ginio ra ilo kalo pana manimung ra luton giu' ra umo kapoam mantagar ra puun tataun giu' ra kataunan, sabap ra naukapan ilo ra luton intor ra kuliamos malarom ondo' tinatang no. Tinalingaau nilo am ginaau rapu' ru ulun ondo' ragili nanalingaau am niayuk nampagaau ra rapu' nilo.” TUHAN Raja' nakaindagu noyo.

¹¹Indagu TUHAN, “Paat ra ngaangai' no masauk ra tauli no, aniin Ku i Gog rondo' intok giu' ra Israil tayar ru pampalabangan riso, iono giu' ra Limayak Sandaupan tampilon ra sirangon ru Raat Matoi.[61] I Gog am ngaangai' saujor nano lobongon ra giu' no, am limayak no sabiton ra ‘Limayak ru Saujor ri Gog’.

¹²Buoi tulu' ngansila' ulun ru Israil koson mompolobong ra ngaangai' baangkai no maa' raginio pagun raginio kalo boo majamol.

¹³Moonong ulun giu' ra pagun no maya' mangindangan mompolobong ra baangkai, am aniin ilo ra urumat paat ra orou ru kamanangan Kuno. Aku, TUHAN Raja' nakaindagu noyo.

¹⁴Mopongo tulu' ngansila' no, kukula' ngaulun pilion koson mongoi liput ra pagun no am maguyum am niayuk mompolobong ra baangkai-baangkai[62] ondo' lakat poyo nokoloso, maa' raginio pagun no kalo boo majamol.

¹⁵Ralalom ru pangkiralanan no, moonong ra ilo makatuum ra bungul ru ulun, mambaal ilo rondo' tatandu' ra sapapa' ru bungul no, maa' raginio ulun mangkali ra lobong makakito am mompolobong ra bungul no giu' ra Limayak ru Saujor ri Gog.

¹⁶(Kalo maalur intor ra giu' no mokoondo' rondo' bandar ondo' makainggalan ondo' nogondo' ra inggalan ru saujor no.) Koon raginio noyo pagun no kapasawon intor ra majamol.”

¹⁷Indagu TUHAN Raja' raki', “Okou ulun mapandai matoi, piawo' ngaangai' susuit am bibiag intor ra ngaangai' intok koson mangakan ra kual sinimbalui ondo' pinongo Kuno. Mambaal Aku ra bunsag maayo giu' ra kagunungan ru Israil. Giu' no susuit am bibiag makaakan ra kual am manginum ra raraa'.

¹⁸Bibiag no musiti' mangakan ra baangkai ru saujor-saujor am manginum ra raraa' ru ulun manguasa' ra tana' ti, ondo' potoyon koson ra domba gawayan kapoam anak domba kapoam kambing gawayan kapoam sapi' gawayan ondo' molomok.

¹⁹Paat ra Aku mamatoi ra ngaangai' ulun no koson ra taak simbalui, susuit am bibiag musiti' mangakan ra ngaangai' lomok saboi maasug, am manginum ra raraa' saboi magauk.

²⁰Giu' ra mija' Kuno susuit am bibiag no mamasug ra tinai' ra mangakan ra kuda am ulun nangura' ra kuda, saujor am ulun tutumula'. Aku, TUHAN Raja', nakaindagu noyo.”

²¹Indagu TUHAN, “Mampakito Aku ra katulayan Kuno ra bansa'-bansa', am makakito ilo Raki' mamakai ra kuasa' Kuno koson manugut ra kapatasan Kuno ra matimpok.

²²Intor raginio boo Israil makapandai ra Aku noyo TUHAN, i Aki Kapuuno' nilo.

²³Bansa'-bansa' makapandai boo ra ulun ru Israil patirin sabap ra tula nilo Raki'. Iruanin Ku ilo, am polosoon ilo kalaan ru pantula' am potoyon ralalom pangayawan.

²⁴Balasin Ku ilo mogondo' ra kinajamol am kinalaat nilo, am iruanin Ku ilo.”

²⁵Indagu TUHAN Raja', “Kaa' raino makaasi' Aku ra papag ri Jakub, ulun ru Israil, am pasaukon ilo ra langkaya' saguli'. Alungin Ku inggalan Kuno ondo' matulai.

²⁶Paat ilo mayan poyo giu' ra pagun nilo galama' ra kaansayan, am kolondo' sangulun pana mampajajou risilo, am ilo pana mampalilian ra nagasaban risilo sabap ra nanumbalik Raki'.

²⁷Koson ra inono' ra bansa'-bansa' ra Aku ti matulai, ibiton Ku ulun Kuno muli' intor ra pagun-pagun ru pantula' nilo.

²⁸Makapandai boo ulun Kuno ra Aku TUHAN, i Aki Kapuuno' nilo. Makapandai ilo boo ra pinoloso Ku ilo pinatiran ra pagun ru ulun, kaa' timungon Ku niayuk ilo am ibiton ilo muli' ra pagun nilo galama', ra kalo tatangon sangulun pana giu' ra pagun namatiran.

²⁹Pasasaron Ku Ambiluo Kuno ra ulun ru Israil, am kalo boo iruanin Ku ilo. Aku, TUHAN Raja', nakaindagu noyo.”