Read Timugon Murut YEHEZKIEL 44 Bible Online

YEHEZKIEL 44 - Timugon Murut bible

YEHEZKIEL 44

¹Nagibit ungkuyon no raki' ra kulobon garabang ra liwar tampilon ra sirangon ra libung Baloi ru TUHAN. Kulobon garabang no naangaban.

²Indagu boo TUHAN raki', “Kulobon garabang ti magulayun naangaban am kalo maukab. Kolondo' sangulun pana makasubol raginio sabap ra Aku, TUHAN, i Aki Kapuuno' ru Israil, nansail noyo ra giu' no. Kulobon garabang no magulayun maangaban.

³Raja' ayuk ondo' mamarinta makasubol ra giu' no koson mangakan ra akanon mapasau giu' ra saang Kuno. Musiti' io sumubol am mingkual mansail ra intok maayo giu' ra tampilon ralalom.”

⁴Ungkuyon no nagibit boo raki' ra saang Baloi ru TUHAN mansail ra kulobon garabang ralayo. Makakito Aku ra Baloi ru TUHAN liniputan ru sinda manguliat ondo' tatandu' ratangan ru TUHAN. Igulatur aku polos ra tana',

⁵am indagu TUHAN raki', “Okou ulun mapandai matoi, ilai' toojo ngaangai' ondo' nakito am norongog muno. Balain Tokou ra aturan-aturan ra tayar ru Baloi Kutu. Ilai' toojo osoi ondo' iowon sumubol ra Baloi Kutu am osoi ondo' inggalarin.

⁶“Balai' Israil, bansa' ra gumuor no, ra Aku, TUHAN Raja', marara' boo mompoloso risilo mambaal ra ondo' makauyuyu'.

⁷Jinamalan nilo Baloi Kuno ra nangiou ra ulun bansa' ru bokon ondo' kalo sinunatan am kalo giminagaya' Raki', siminubol ra Baloi Kuno, paat ulun mampataak ra lomok am raraa' ru taak simbalui Raki'. Ra ngaangai' ru binaal ondo' makauyuyu' no, minanggal ilo ra nabantuan Kuno risilo.

⁸Sala' ka ilo galama' ondo' nambaal ra upacara mapasau ralalom ru Baloi Kuno, kaa' ulun bansa' ru bokon ondo' pinangandoi nilo koson mambaal raginio.

⁹“Aku, TUHAN Raja' nampatanou ra ulun bansa' ru bokon ondo' kalo sinunatan am ulun ondo' kalo giminagaya' Raki', kalo iowon sumubol ra Baloi Kuno. Ulun bansa' ru bokon ondo' minayan ra gino ngai' ru ulun ru Israil pana kalo iowon sumubol.”

¹⁰Indagu TUHAN raki', “Ukumin Ku ulun ru Liwi ondo' nababaya' ra ulun ru Israil ra bokon ondo' nangiruan Raki' am siminamba ra sinungkalalaing.

¹¹Iowon ilo mangandoi ra Baloi Kuno am magalung ra kulobon garabang am mambaal ra kandoi giu' ra ralalom Baloi Kuno. Iowon ilo manimbalui ra bibiag ondo' pataakon koson ra taak simbalui koson mapabansuk ra guang Kuno,[83] am koson ra taak intor ra ulun, am musiti' ilo masalok mangindangan ra ulun.

¹²Kaa', sabap ra nambaal ilo ra upacara sumamba ra sinungkalalaing koson bansa' ru Israil, am binaal raginio nangkinibit ra ulun makatula, ginio ra Aku, TUHAN Raja' magibot ra ilo musiti' ukumin.

¹³Kalo iowon ilo mangandoi Raki' koson ra imam, kapoam minggaar ra atan ayuk ondo' mapasau ra tayar Kuno, kapoam sumubol ra Lamin Matulai Kaga'. Gitio noyo ukuman tayar ru binaal makauyuyu' ondo' binaal nilo.

¹⁴Raino pongondoyon Ku ilo mambaal ra kandoi ondo' musiti' paugaron giu' ra Baloi Kuno.”

¹⁵Indagu TUHAN Raja', “Imam-imam ru Liwi intor ra papag ri Jadok, magulayun toojo mangandoi Raki' paat ulun ru Israil nangiruan Raki'. Ginio ra, raino ilo noyo ondo' mangandoi Raki' am matong ra saang Kuno koson mampataak ra lomok am niayuk raraa' ru bibiag sinimbalui.

¹⁶Ilo ayuk iowon sumubol ra ralalom ru Baloi Kuno, mangandoi giu' ra altar Kuno, am maningganai ra sambayang ra giu' no.

¹⁷Paat ra ilo sumubol ra liliut ralalom mansail ra kulobon garabang, musiti' ilo mambayang ra linon. Kalo iowon ilo mambayang intor ra bulu ru domba paat mangandoi giu' ra liliut ralalom kapoam giu' ra ralalom ru Baloi Kuno.

¹⁸Koson kalo rasangon, musiti' ilo mansigal ra linon am mansaluar ra linon kolondo' abot.

¹⁹Ra ilo kalo poyo mingkual mongoi ra liliut ra liwar, mongoi ra intok timungan ru ulun, imam-imam no musiti' mangalus ra bayang ru imam am tatangon ginio giu' ra ralalom ru lamin-lamin matulai. Musiti' ilo mambayang ra bokon maa' raginio bayang matulai no kalo makausung ra ulun.[84]

²⁰“Kalo iowon imam-imam no mambulut ra ulu saboi kolondo' abuk kapoam polosoon abuk gumawar. Abuk nilo musiti' lomporon sumugut ra aturan ondo' inaru'.

²¹Kalo iowon ilo manginum ra wain paat mongoi subol ra liliut ralalom.

²²Sasangulun imam kalo iowon magandu' ra ruandu' ondo' inali noyo. Sasangulun imam iowon ayuk magandu' ra ralaa ru Israil, kapoam ruandu' napuor inandu' ru imam.

²³“Imam-imam no mangila' ra ulun Kuno mampasuai ra atan ondo' matulai am atan ondo' kalo matulai; atan ondo' mapasau am atan ondo' majamol.

²⁴Paat ra makatabual pansangaran intor ra baal ru ukum, imam-imam no musiti' mangakim raginio sumugut ra ukum Kuno. Musiti' nilo salingapuon pangiantakan-pangiantakan ru ugama sumugut ra ukum am aturan Kuno am niayuk mangiantak ra orou Sabat koson ra orou ondo' matulai.

²⁵“Sangulun imam kalo iowon mampajamol ra inan am mangambong ra baangkai, ondo' ayuk am baangkai ru ina' am ama' nano kapoam anak-anak nano kapoam pabukat ungkuyon nano kapoam pabukat ruandu' nano ondo' kalo poyo inandu'.

²⁶Mopongo imam no mapasau saguli', musiti' io maginaa buoi tulu' ngoorou poyo,

²⁷am sumubol ra liliut ralalom giu' ra Baloi Kuno, am mampataak ra taak simbalui koson mamasau ra inan maa' raginio iowon io mangandoi poyo giu' ra Baloi Kuno. Aku, TUHAN Raja' nakaindagu noyo.

²⁸“Imam-imam no musiti' mangapu ra kandoi no koson ra tayar nilo intor ra atan ondo' tinaakan Kuno ra Israil tungkus-manungkus. Kalo iowon ilo mompolonggom ra pinatungkus giu' ra Israil; Aku noyo pinatungkus risilo.

²⁹Taak simbalui koson paringkuanangan ra TUHAN,[85] taak simbalui koson mangampun ra tula, am taak simbalui koson mambayar ra kalubatan, masauk ra akanon ru imam. Musiti' ilo mangapu ra atan ayuk giu' ra Israil, ondo' pataakon Raki', koson ra tayar nilo.

³⁰Imam-imam no musiti' aniin ra tayar moonsoi kaga' intor ra ngaangai' kumoson kasaa', am atan ayuk ondo' pataakon Raki'. Moonong igondo' ulun mangansak ra ruti', musiti' ilo mangani' ra ruti' kasaa' ra imam-imam no; am koson raginio noyo Aku mambarakat ra sasambaloi nilo.

³¹Imam-imam no kalo iowon mangakan ra susuit kapoam kual ru bibiag minatoi toojo ayuk kapoam ondo' sinaam ru bibiag ra bokon.”