Read Timugon Murut YEHEZKIEL 45 Bible Online

YEHEZKIEL 45 - Timugon Murut bible

YEHEZKIEL 45

¹Paat ra tana' no tinayar ra moonong bansa', santayaran intor raginio musiti' pasuayon koson ra TUHAN. Gawar ru tana' no musiti' 12.5 ngakilomito, am pila' no 10 ngakilomito.[86] Titikop ru intok no matulai.

²Giu' ra intok no, sampila' tana' ondo' apat persegi musiti' palilion ayuk koson Baloi ru TUHAN. Tuku' ru moonong kiing ru tana' no musiti' 250 ngamito am maliputan ru intok marata' ra pila' no 25 ngamito.

³Sampiruo intor ra intok no, ondo' gawar no 12.5 ngakilomito am pila' no 5 ngakilomito, musiti' palilion ayuk koson Baloi ru TUHAN, intok ondo' matulai kaga'.

⁴Tana' no matulai am pataakin ra imam-imam ondo' maningganai ra sambayang giu' ra Baloi ru TUHAN. Baloi-baloi nilo am Baloi ru TUHAN musiti' baalon ra giu' no.

⁵Sampiruo poyo ra intok no musiti' pataakin koson ra tungkus ra ulun ru Liwi ondo' mangandoi giu' ra Baloi ru TUHAN. Tayar raginio masauk ra bandar-bandar intok ayanan nilo.[87]

⁶Suai ra tana' ondo' matulai no musiti' poyo pasuayon sampila' tana' koson rondo' bandar ondo' maayanan ru osoi ayuk ulun ru Israil. Gawar ru tana' no musiti' 12.5 ngakilomito, am pila' no 2.5 ngakilomito.

⁷Tana' niayuk musiti' paatangon tayar ru ulun manguasa' ondo' mamarinta. Intok no tumalimpuun intor ra balitan ra kalasaan ru intok matulai no saboi ra Raat Tanga' am intor ra balitan ra sirangon ru intok matulai no saboi ra balitan ra sirangon ru pagun no. Gawar ru tana' no nogondo' ra gawar ru rondo' ra intok ondo' inaru' ra tayar ru bansa' ru Israil.

⁸Tana' no masauk ra longgom ru ulun manguasa' ondo' mamarinta giu' ra Israil, maa' raginio kalo mangimbolo' io ra mamagun, kaa' mompoloso ra tana' ondo' suwo no masauk ra longgom ru bansa'-bansa' ru Israil.

⁹Indagu TUHAN Raja', “Akau ngaangai' ondo' mamarinta ra Israil, makatula kano ra nabuoi noyo. Langgai' pangimbalaan am binaal ondo' malaat. Baalo' ondo' motopot am matimpok. Totopot pai' boo pagiruo' ulun Kuno intor ra tana' nilo. Aku, TUHAN Raja' nakaindagu noyo ramuyun.

¹⁰“Moonong ulun musiti' mamakai ra timbangan am tutuku' ondo' motopot:

¹¹“Rondo' efa koson manuku' ra kuliamos mapua' musiti' mogondo' ra rondo' bat koson manuku' ra kuliamos timug. Tutuku' motopot iono homer.[88] Ginio ra tutuku' mino musiti' koson ragitio: 1 homer = 10 efa = 10 bat

¹²“Timbangan mino musiti' koson ragitio: 20 gera = 1 syikal[89] 60 syikal = 1 mina

¹³“Taak mino musiti' mimpuun ra tutuku' koson ragitio: Gandum: 1/60 intor ra kumoson mino Barli: 1/60 intor ra kumoson mino Umau jaitun: 1/100 intor ra ampos ru puun mino (Tukuo' sumugut ra bat: 10 bat = 1 homer = 1 kor.) Domba: 1 intor ra moonong 200 ngainan ondo' giu' ra padang sakot ru Israil. “Musiti' kau mampataak ra taak simbalui koson paringkuanangan Raki';[90] taak simbalui koson mapabansuk ra guang Kuno;[91] am taak simbalui koson makibarakat Raki';[92] maa' raginio tula mino ampunon. Aku, TUHAN Raja' ondo' nangani' ra susuban ti.

¹⁶“Ngaangai' mamagun ru pagun musiti' magibit ra taak no ra ulun manguasa' ra Israil.

¹⁷Kaa' paat ra pangiantakan ra sila' bagu, am orou Sabat, am orou pangiantakan ra bokon, ulun manguasa' lansanin manampos ra bibiag koson pataakon koson ra taak simbalui, am niayuk taak simbalui koson paringkuanangan Raki';[93] am niayuk taak simbalui wain ra tayar ru ngaangai' bansa' ru Israil. Io no lansanin manampos ra taak simbalui koson mangampun ra tula, taak simbalui koson paringkuanangan Raki',[94] taak simbalui koson mapabansuk ra guang Kuno,[95] am taak simbalui koson makibarakat Raki'.[96] Aku pana mangampun boo ra tula ru ulun ru Israil.”

¹⁸Indagu TUHAN Raja', “Paat ra orou kasaa', sila' kasaa', musiti' kau mamasau ra Baloi Kuno ra mampataak ra sanginan sapi' gawayan mamulok ondo' kalo najamaran.

¹⁹Imam pana musiti' mangalap ra raraa' intor ra taak simbalui koson mangampun ra tula no, am papiiron boo ginio ra lugu'-lugu' kulobon Baloi ru TUHAN, kaapat-apat pisuk ru altar, am lugu'-lugu' ru kulobon garabang ondo' mongoi ra liliut ralalom.

²⁰Paat ra orou katulu', sila' raginio, musiti' kau mambaal koson raginio tayar ru osoi ayuk makatula ra kalo siningon kapoam ra kalo napandayan no. Koson raginio noyo ra akau magalung ra kapasawan ru Baloi Kuno.

²¹“Paat ra orou koopor am apat, sila' kasaa', musiti' kau mangiantak ra Pangiantakan Paska. Buoi ru pangiantakan no tulu' ngoorou, ngaangai' ulun musiti' mangakan ra ruti' kalo linatakan ra ragi.

²²Paat ra orou kasaa' ru pangiantakan no, ulun manguasa' ondo' mamarinta musiti' mampataak ra sanginan sapi' gawayan koson ra taak simbalui koson mangampun ra tula nano galama' am ra ngaangai' mamagun.

²³Moonong orou ra buoi ru pangiantakan tulu' ngoorou no, ulun manguasa' musiti' mampataak ra tulu' ngainan sapi' gawayan am tulu' ngainan domba gawayan ondo' kalo najamaran ra TUHAN, koson ra taak simbalui koson mapabansuk ra guang ru TUHAN.[97] Moonong orou musiti' io niayuk mampataak sanginan kambing gawayan koson ra taak simbalui koson mangampun ra tula.

²⁴Tayar ru moonong sanginan sapi' gawayan am domba gawayan ondo' pataakon, musiti' pabayaan ra 17.5 ngalito unor-unor am 3 ngalito umau jaitun.

²⁵“Tayar ru Pangiantakan Mangkalukub ra Raun, ondo' tumalimpuun paat ra orou koopor am limo, sila' katulu', paat ra moonong orou buoi tulu' ngoorou no, ulun manguasa' musiti' mampataak ra taak simbalui ra nogondo', iono taak simbalui koson mangampun ra tula, taak simbalui koson mapabansuk ra guang ru TUHAN,[98] am taak simbalui koson paringkuanangan ra TUHAN,[99] am niayuk umau jaitun.”