Read Timugon Murut YEHEZKIEL 48 Bible Online

YEHEZKIEL 48 - Timugon Murut bible

YEHEZKIEL 48

¹Balitan giu' ra ralayo ru tana' no mongoi ra sirangon, tumalimpuun intor ra Raat Tanga' mongoi ra bandar Gitlon, ralan mongoi ra Ginting Gamat, bandar Inon, saboi ra balitan ru pamarintaan Damsyik am pamarintaan Gamat. Moonong bansa' ti musiti' mangapu ra santayaran tana' ondo' malangka' intor ra balitan ra sirangon mongoi ra kalasaan saboi ra Raat Tanga',[110] ralalom ru pansunuan ragitio intor ra ralayo mongoi ra rabugus: Dan Asyir Naptali Manasi Ipraim Rubin Jiuda.

⁸Tayar ru tana' ondo' sumunu' no musiti' pasuayon koson pamakayan ra inaru'. Gawar no musiti' 12.5 ngakilomito intor ra balitan ralayo mongoi ra rabugus. Balitan ra sirangon am kalasaan musiti' mogondo' gawar no ra tayar-tayar ondo' pataakin ra bansa'-bansa' ra bokon. Baloi ru TUHAN baalon ra tayar ragitio.

⁹Giu' ra pusor ru tayar ragitio, rondo' intok ra langka' no 12.5 ngakilomito gawar am 10 ngakilomito[111] pila', luntukon ra TUHAN.

¹⁰Imam-imam no makaalap ra santayaran intor ra intok ondo' matulai ti. Tayar nilo langka' no 12.5 ngakilomito intor ra sirangon mongoi ra kalasaan, am 5 ngakilomito intor ra ralayo mongoi ra rabugus. Baloi ru TUHAN musiti' baalon giu' ra tatanga' ru tayar ragitio.

¹¹Tayar matulai ti koson imam-imam papag ri Jadok. Nangandoi ilo Raki' ayuk ra giminagaya' am kalo koson ra ulun ru Liwi bansa' nilo, ondo' minaya' makatula nababaya' ra ulun ru Israil ra bokon.

¹²Ginio ra papag ri Jadok musiti' aniin ra tayar linuntuk, giu' ra kiing ru tana' ru ulun ru Liwi. Tayar raginio noyo ondo' matulai kaga'.

¹³Ulun ru Liwi niayuk mokoondo' ra tayar luntukin giu' ra tampilon rabugus ru tana' ru imam-imam. Langka' nano niayuk musiti' 12.5 ngakilomito intor ra sirangon mongoi ra kalasaan, am 5 ngakilomito intor ra ralayo mongoi ra rabugus.

¹⁴Tana' linuntuk ra TUHAN iono tana' ondo' moonsoi kaga' giu' ra titikop pagun. Sandangou pana intor ra tana' no kalo iowon talanon, aligin kapoam pabandingon ra ulun bokon, sabap ra tana' no matulai am longgom ru TUHAN.

¹⁵Giu' ra tayar rabugus ru tana' ondo' linuntuk no, lakat poyo mokoondo' tayar ra suwo no ondo' gawar nano 12.5 ngakilomito am pila' nano 2.5 ngakilomito. Tayar ragitio kalo mapasau am iowon pakayon ru mamagun. Iowon ilo mayan ra giu' no am mamakai ra tana' no koson ra padang sakot. Rondo' bandar musiti' baalon ra tatanga' no,

¹⁶am binaal apat persegi; moonong kiing no tinuku' ra 2.25 ngakilomito.

¹⁷Giu' ra liliut ru bandar no musiti' mokoondo' intok maukab ondo' pila' nano 125 ngamito.

¹⁸Giu' ra tampilon sirangon am kalasaan ru bandar no, mokoondo' tana' malimparang ondo' langka' no 5 ngakilomito darab ra 2.5 ngakilomito. Karuruo ngampila' ra tana' no musiti' pakayon ru mamagun giu' ra bandar no koson magitanom.

¹⁹Osoi ayuk ondo' mayan giu' ra bandar no, intor ra ngaangai' bansa' ru Israil, iowon mamakai ra tana' no koson pantanaman.

²⁰Titikop ru libung no, nakaaya' tana' ondo' linuntuk am tana' koson ra bandar, binaal apat persegi ondo' tuku' no 12.5 ngakilomito ra moonong kiing.

²¹Tana' giu' ra tampilon kalasaan am sirangon intor ra tana' ondo' linuntuk koson Baloi ru TUHAN, tana' ru imam-imam no, tana' ru ulun ru Liwi am bandar no, iono longgom ru ulun manguasa' ondo' mamarinta. Giu' ra tampilon sirangon, tana' no malangka' saboi ra balitan ra sirangon, am giu' ra tampilon kalasaan saboi ra Raat Tanga', am ginio nambalit ra tana' ru Jiuda giu' ra ralayo, am tana' ru Binjamin giu' ra rabugus.

²³Tana' giu' ra tampilon rabugus libung ondo' linuntuk no, iono intor ra balitan sirangon saboi ra Raat Tanga' giu' ra tampilon kalasaan, am tayaron ra bansa' ra bokon no sumugut ra pansunuan ragitio intor ra ralayo mongoi ra rabugus: Binjamin Simion Isakar Jibulon Gad.

²⁸Giu' ra tampilon rabugus ru tana' Gad mokoondo' balitan ondo' tumalimpuun intor ra bandar Tamar mongoi ra Taur ru timug Kadis-Miriba, am mongoi boo ra kalasaan rabugus ra gawar ru balitan ru pagun ru Misir saboi ra Raat Tanga'.

²⁹Indagu TUHAN Raja', “Koson raginio noyo tana' no musiti' tayaron ra bansa'-bansa' Israil koson masauk ra longgom nilo.”

³⁰Bandar Jirusalim mokoondo' mopor am ruo kulobon garabang. Moonong apat timbok ru bandar no ra tinuku' 2.25 ngakilomito am mokoondo' talu kulobon garabang, ondo' ininggalanan sumugut ra inggalan ru bansa'-bansa' ru Israil. Kulobon garabang giu' ra timbok ralayo ininggalanan ra Rubin, Jiuda am Liwi; ondo' giu' ra timbok sirangon ininggalanan ri Jusup, Binjamin am Dan; ondo' giu' ra timbok rabugus ininggalanan ri Simion, Isakar am Jibulon; am ondo' giu' ra timbok kalasaan ininggalanan ri Gad, Asyir am Naptali.

³⁵Ngaangai' ru timbok no ra gawar 9 ngakilomito. Intor raino bandar no ininggalanan ra “TUHAN Soroi Ragiti!”