Read Timugon Murut YEHEZKIEL 7 Bible Online

YEHEZKIEL 7 - Timugon Murut bible

YEHEZKIEL 7

¹Indagu TUHAN raki',

²“Okou ulun mapandai matoi, Aku, TUHAN Raja' masaga' mindagu ra pagun ru Israil: Gitio noyo kapusaan ru titikop pagun!

³Okou Israil, raino nasaboi noyo kapusaan muno! Makaliman kou ra poros ru sangit Kuno, sabap ra mangakim Aku ra binaal muno. Mambalos Aku ra paliso muno ondo' makauyuyu' no.

⁴Kalo malubatan Aku rirun kapoam makaasi' rirun. Ukumin Tokou ra binaal muno ondo' makauyuyu' no, maa' raginio makapandai kou ra Aku noyo TUHAN.”

⁵Gitio noyo ondo' rinagu ru TUHAN Raja', “Karaat mansusunu' palumpaan rirun.

⁶Ngaangai' no pupusin. Gitio noyo kapusaan muno. Kolondo' boo kalansanan muno.

⁷Akau mamagun ru pagun ti, ngaangai' no pupusin noyo ramuyun. Kalo boo mambaal kau ra pangiantakan giu' ra intok sambaan giu' ra rasawat ru gunung; jajajou no ayuk mailian min.

⁸Sangkinolor poyo am makaliman kau ra kinoporos ru sangit Kuno. Mangakim Aku ramuyun, am mambalos Aku ramuyun ra ngaangai' paliso min ra makauyuyu' no.

⁹Kalo malubatan Aku ramuyun kapoam makaasi' ramuyun. Mangukum Aku ramuyun ra binaal min ondo' makauyuyu', maa' raginio makapandai kau ra Aku noyo TUHAN am Aku noyo ondo' mangukum ramuyun.”

¹⁰Orou karaat ra tayar ru Israil mamaar noyo. Pampatayan gumaai-gaai. Kalimbawan nokopolos ra tampak nano.

¹¹Pampatayan nangkinibit ra masuang poyo kalaatan. Ngaangai' kalangkayaan, urumat am katulayan nilo lumiot.

¹²Paat nano mamaar noyo toojo, orou nano mamaar noyo, paat mambali mantalan kolondo' boo arati', sabap ra ukuman ri Aki Kapuuno' lumumpa' ra moonong ulun.

¹³Ulun mantatalan kalo maayag ra mabuoi koson manili ra kalubatan, sabap ra sangit ri Aki Kapuuno' lumumpa' ra moonong ulun. Ilo ondo' malaat kalo maayag.

¹⁴Bujung samputin am ngaangai' ulun nakatampos. Kaa' kolondo' sangulun pana mintor mongoi ra intok pangayawan, sabap ra sangit ri Aki Kapuuno' lumumpa' ra moonong ulun.

¹⁵Ulun mantutula' giu' ra ralan, ulun marualan am maitilan giu' ra ralalom ru baloi. Osoi ayuk ondo' soroi giu' ra liwar ru bandar matoi sabap ra pangayawan, am osoi ayuk ondo' soroi giu' ra ralalom ru bandar matiu' ra maruol am maitilan.

¹⁶Mokoondo' ulun ondo' nagiru' ra gunung koson ra susuit asang mansiab intor ra limayak sabap ra malaa'. Ilo ngaangai' nampalaa sabap ra tula nilo.

¹⁷Kalindu' ru moonong ulun lumawo, atur nilo monontol.

¹⁸Mambayang ilo ra konoon karung am ngaangai' inan nilo monontol. Abuk nilo lamparin, am ilo ngaangai' tauyuon.

¹⁹Mamatir ilo ra mas am pirok koson ra ginsamol giu' ra ralan, sabap ra pirok am niayuk mas kalo makapamayag risilo paat ra TUHAN mapasingkual ra sangit Nano. Kalo mamakai ilo ra mas am pirok no koson mampajala' ra inan kapoam mamasug ra tinai'. Kaa' mas am pirok noyo ondo' nangkinibit risilo makatula.

²⁰Paat ragili mamanggo ilo ra intan ondo' moonsoi, kaa' pinakai nilo ginio koson mambaal ra sinungkalalaing ondo' makauyuyu'. Ginio ra TUHAN nambaal ra rapu' nilono makajala' risilo.

²¹Indagu TUHAN, “Mompoloso Aku ra ulun bansa' ra bokon mantakou risilo. Ulun malaat manalingaau ra rapu' nilo am niayuk mampajamol raginio.

²²Kalo mongoi aku labit paat ra Baloi Kuno ondo' tagamin Kuno jamalin ru ulun, paat ulun mantatakou sumubol am mampajamol raginio.

²³Titikop pagun mataliajou; pagun natikop ra pampatayan, am bandar-bandar nototop ra kalaatan.

²⁴Mangator Aku ra bansa'-bansa' ondo' malaat kaga' mongoi ra pagun ti am polosoon ilo mayan ra baloi-baloi min. Paat ra Aku mompoloso risilo mampajamol ra intok sambayangan min, ungkuyon ondo' mapanggol kaga' intor ramuyun no magiru' ambiluo.

²⁵Malawo guang min. Maguyum kau ra kaansayan kaa' papalo min ayuk.

²⁶Karaat am tanou malaat matong kalo lulumonggo'. Paat raginio makitaak kau ra nabi-nabi koson mambala' ra pinaintalang, kaa' papalo min ayuk. Imam-imam kolondo' atan-atan pailaan ra ulun, am ulun matutuo nakayaan ra bilin.

²⁷Raja' mangulir; anak ungkuyon ru raja' kolondo' boo kalansanan, am mamagun monontol ra malaa'. Ukumin Takamin mogondo' ra ngaangai' binaal min. Mangakim Aku ramuyun koson ra Aku nangakim noyo ra ulun ra bokon. Bagu no makapandai kau ra Aku noyo TUHAN.”