Read Timugon Murut DANIL 1 Bible Online

DANIL 1 - Timugon Murut bible

DANIL 1

¹Paat ra bilor katalu pamarintaan ri Joyakim koson ra raja' ru Jiuda, Raja' Nibukadnijar, raja' ru Babilonia namulunsar ra Jirusalim am nagawang ra bandar no.

²Nangiou Tuhan ra Raja' Nibukadnijar namparakop ra Raja' Joyakim am nampagaau santayaran intor ra kuliamos mongologo giu' ra Baloi ru TUHAN. Nagibit Raja' Nibukadnijar nababaya' riso kukula' ngaulun rinakop am pinaayan ilo giu' ra kuil ru dewa-dewa nano giu' ra Babil. Nambuli io ra kuliamos mongologo no giu' ra ralalom ru intok-intok pambulian ru kuil.

³Nanusub raja' Nibukadnijar ri Aspinas, tingganai ru pagawai istana nano, koson mampili' ra kukula' ngaulun ungkuyon mamulok intor ra gino ngai' ru ulun ru Israil ondo' ralalom ru pamatiran. Ungkuyon mangamulok no musiti' intor ra papag ru raja' kapoam bangsawan.

⁴Ilo musiti' maindon, masawat inigilaan, maligag am masuang napandayan am niayuk kalo najamaran, maa' raginio makapangandoi ilo ra istana ru raja'. Sinusub i Aspinas maa' raginio mangila' risilo mambasa' am manulis ra ragu ru Babilonia.

⁵Nanusub niayuk raja' maa' raginio moonong orou ilo aniin ra akanon am wain nogondo' koson ra ondo' pataakon ra pabukat ru raja'. Kopongo igilaan buoi talu ngambilor, paumaan ilo ra raja'.

⁶Ilo ondo' pinili' iono i Danil, Gananya, Misail am i Ajaria, ngaangai' no intor ra bansa' ru Jiuda.

⁷Tingganai pagawai ru istana no nangani' risilo ra inggalan-inggalan bagu iono i Biltsajar, Sadrak, Misak am i Abidnigo.

⁸Inaru' toojo ri Danil koson kalo jamalin inan nano ra akanon am wain ondo' inaru' ru raja'. Ginio ra nakiindangan io ri Aspinas,

⁹am i Aki Kapuuno' nangkinibit ri Aspinas makaasi' am motogom ri Danil.

¹⁰Kaa' indagu i Aspinas ri Danil, “Malaa' aku ra raja' no. Nangaru' io noyo ra akanon am inumon min. Amon ru okou ilain kalo maligag koson ra ungkuyon mamulok ra bokon no, potoyon aku ru raja' no.”

¹¹I Danil pana mindagu boo ra ulun magalung ondo' sinusub ri Aspinas koson magalung riso am talu ngaulun rangan nano,

¹²“Pangkinam no ramon buoi mopor ngoorou. Anii' akai sansam am timug ayuk koson akanon am inumon.

¹³Mopongo mopor ngoorou, pogondoon baal mai ra baal ru ungkuyon mamulok ra bokon, ondo' nangakan ra akanon ondo' inaru' ru raja'. Mopongo raginio pamatas mimpuun ra pangurio muno.”

¹⁴Nangiou ulun magalung no am nangiou risilo mangkinam buoi mopor ngoorou.

¹⁵Kopongo mopor ngoorou, ilain ilo maligag poyo am maikang poyo intor ra ngaangai' ungkuyon mamulok ondo' nangakan ra akanon ondo' inaru' ru raja'.

¹⁶Intor ra orou raginio ulun magalung no nangiou risilo mangakan ayuk ra sansam, am kalo mangakan ra akanon kapoam manginum ra wain ondo' inaru' ru raja'.

¹⁷Nangani' i Aki Kapuuno' ra apat ngaulun ungkuyon mamulok no ra napandayan am katandaan ralalom kasusasteraan am falsafah. Rinuangan poyo, nangani' Io ri Danil ra mapandai koson mambala' ra arati' ru pinaintalang am inupi.

¹⁸Paat ra pupus ru talu ngambilor buoi igilaan ondo' inaru' ru raja' no, pinauma' ri Aspinas ngaangai' ungkuyon mamulok no ra Raja' Nibukadnijar.

¹⁹Nangkuot raja' risilo am nakapandai ra i Danil, Gananya, Misail am i Ajaria makasigulu poyo ra ungkuyon mangamulok ra bokon ralalom ru ngaangai' katutunan. Ginio ra inalap ilo koson mangandoi giu' ra istana ru raja'.

²⁰Moonong raja' mangkuot ra ondo' pataamon no maawar am karaan toojo, makapandai raja' ra pataamon am guangon ru kaapat ngaulun ungkuyon mamulok no inggopor moonsoi poyo intor ra pataamon am guangon ru ngaangai' ulun mangilong am ulun mapandai kaga' ra sihir giu' ra titikop ru pamarintaan nano.

²¹Narayus i Danil nangandoi giu' ra istana no saboi ra Raja' Koris intor ra Pirsia, tumalimpuun mamarinta.