Read Timugon Murut DANIL 12 Bible Online

DANIL 12 - Timugon Murut bible

DANIL 12

¹Malaikat ondo' nambayang ra linon no mindagu, “Paat raginio, malaikat maayo, iono i Maikol manindung ra bansa' muno sumalula'. Bulintok raginio mokoondo' ra kapaganan ondo' maagat kaga' intor ra bansa'-bansa' soroi. Paat raginio, ngaangai' ulun intor ra bansa' muno ondo' inggalan nano tinulisan ra ralalom ru kitab ri Aki Kapuuno' bayagon.

²Masuang ulun ondo' minatoi maayag saguli': mokoondo' ondo' makasia' ra kaayagan mantilayun, mokoondo' poyo ondo' maimbolo' ra mantilayun.

³Tingganai-tingganai ondo' mapintar suminda koson ra limbowon ondo' mapaang, am ilo ondo' mangila' ra ulun mambaal ra moonsoi am matimpok suminda koson ra butitin ra sabuoi-buoi no.”

⁴Kon ru malaikat no raki', “Raino, okou Danil, puruno' am saapi' ra meterai kitab no, saboi ra orou pupus. Masuang ulun kuminam makarati' ra baal ondo' tatanga' masauk, kaa' pirot nilono kolondo' onong.”

⁵Kopongo raginio kakito ku ruo ngaulun ungkuyon, ondo' sangulun minigor ra igig ru sungoi tampilon ragiti, am sangulun poyo tampilon ra giu'.

⁶Sangulun no nangkuot ra malaikat ondo' minigor giu' ra ralayo ru sungoi, “Kula' kia buoi ru kasaukan-kasaukan ondo' makaimuag no masauk ra kalo poyo pupusin?”

⁷Kakato' ru malaikat no karuo-ruo kalindu' nano ra tampilon ru limbowon, am pagibot ra ralalom inggalan ri Aki Kapuuno' ondo' mantilayun. Nokorongog aku ra io mindagu, “Talu ngambilor am maintanga'! Mopongo pangimbalaan ra ulun ri Aki Kapuuno' pupusin, am kasaukan-kasaukan ondo' makaimuag no pana pupusin.”

⁸Nokorongog aku ra ragu-ragu nano, kaa' kalo maratian ku. Ginio ra nangkuot aku, “Tuan, kaa' ati kulaan boo ra pupus nano ra tauli no?”

⁹Taam io, “Okou Danil, musiti' kou mongoi raino, sabap ra ragu-ragu raginio musiti' kalo pabalaan saboi ra orou pupus.

¹⁰Masuang ulun kinamin am kapasawon. Ulun malaat kalo makarati'; rumayus ilo mambaal ra kalaatan nilo. Ulun mapintar ayuk makarati'.

¹¹“Intor poyo ra taak simbalui orou-orou no linanggaan, iono intor ra ‘Karaat Ondo' Moporos’[36] no, 1,290 ngoorou mansail.

¹²Pakaansuk noyo ulun ondo' magulayun gumagaya' saboi 1,335 ngoorou no nakasail noyo.

¹³Okou Danil, musiti' gumagaya' saboi ra pupus. Matoi kou, kaa' maayag saguli' koson mangapu ra tangguang muno ra orou pupus.”