Read Timugon Murut DANIL 3 Bible Online

DANIL 3 - Timugon Murut bible

DANIL 3

¹Paat ra sanganuan nambaal Raja' Nibukadnijar ra rondo' sinungkalalaing intor ra mas: sawat no 27 ngamito am pila' no maar 3 ngamito. Pinabigor no sinungkalalaing no giu' ra intok marata' Dura ra wilayah Babil.

²Raja' pana nanusub boo ra ngaangai' pagawai nano tumimung — raja'-raja' ru wilayah, gabenor, tingganai ru libung, ulun maminson ra pagun, ulun manalingapu ra ruit ru pagun, akim, majistrit, am ngaangai' pagawai ru libung. Musiti' ilo sumaang ra upacara parasmian ra sinungkalalaing ondo' pinabigor ru Raja' Nibukadnijar.

³Paat ra ilo ngaangai' tumimung koson ra upacara parasmian am minigor giu' ra saang ru sinungkalalaing no,

⁴korongog boo sangulun susubon ru raja' nampatanou ra bolos matangil, “Akau ulun intor ra ngaangai' bansa', am ragu, rongogo' raguon ru raja' ti:

⁵Mokorongog kau ra bolos ru bujung, sumunu' bolos ru suling, rebab, gambus, jitor am kuliamos miujik ra bokon. Makatalimpuun ayuk miujik, akau musiti' migulatur am sumamba ra sinungkalalaing mas ondo' pinabigor ru Raja' Nibukadnijar.

⁶Osoi ayuk ondo' kalo migulatur am sumamba riso indibakin papatiron ra ralalom ru rapuan ondo' bibilak.”

⁷Ginio ra, pakatalimpuun ilo ayuk nokorongog ra bolos ru kuliamos miujik no, ulun intor ra ngaangai' bansa', bansa' boborok am ragu, migulatur am sumamba ra sinungkalalaing mas ondo' pinabigor ru Raja' Nibukadnijar.

⁸Bulintok raginio noyo kukula' ngaulun Babilonia nangalap ra kaluagan koson maguyum ra kasalaan ru ulun ru Jaudi.

⁹Indagu ilo ra Raja' Nibukadnijar, “Kaayag kono raja' ra sabubuoi no!

¹⁰Okou raja' minindagu ra makatalimpuun ayuk miujik, moonong ulun musiti' migulatur am sumamba ra sinungkalalaing no.

¹¹Osoi ayuk kalo migulatur koson sumamba riso patirin ra rapuan ondo' bibilak.

¹²Kukula' ngaulun ru Jaudi ondo' sinauk muno ra ulun mampaugar ra kandoi tadbir ra wilayah Babil kalo gumagaya' ra susuban muno. Ilo iono i Sadrak, Misak am Abidnigo. Ilo kalo migulatur am sumamba ra dewa muno, ondo' niayuk ra sinungkalalaing ondo' pinabigor muno.”

¹³Pokorongog ra baal raginio sangit raja' am nanusub maa' raginio katalu-talu ngaulun no ibiton muma' riso.

¹⁴Indagu raja' risilo, “Sadrak, Misak am Abidnigo, motopot kia ra kalo masaga' kau sumamba ra dewa kuno am kalo masaga' migulatur ra saang ru sinungkalalaing mas ondo' pinabigor kuno?

¹⁵Raino paat ra akau mokorongog ra bolos ru bujung, suling, rebab, gambus, jitor am kuliamos ru miujik ra bokon, migulatur kau am samba ra sinungkalalaing no. Amon ru kalo, indibakin kau papatiron ra rapuan ondo' bibilak. Ati kia ra dewa ondo' makapamayag ramuyun?”

¹⁶Taam i Sadrak, Misak am i Abidnigo, “Okou raja', kalo kuminam akai magisaung ra inan.

¹⁷Amon ru i Aki Kapuuno' ondo' sambaan maino masaga' mamayag ramon intor ra rapuan ondo' bibilak am intor ra kuasa' muno, bayagon No akai.[2]

¹⁸Kaa' amon ru kalo niayuk baalon No, musiti' mu pabalaan ra kalo sumamba akai ra dewa muno am niayuk migulatur samba ra sinungkalalaing mas ondo' pinabigor muno.”

¹⁹Bulintok raginio Raja' Nibukadnijar siminangit kaga' ri Sadrak, Misak am i Abidnigo saboi malia' bulos nano. Ginio ra nanusub raja' ra ulun-ulun nano mampalasu' ra rapuan intulu' poyo lasu' intor ra kaindalaman.

²⁰Nanusub io ra kukula' ngaulun saujor ondo' maikang kaga' koson mamangkil ra katalu ngaulun no am papatiron ilo ra ralalom ru rapuan ondo' bibilak no.

²¹Saujor ru raja' pana namangkil ra talu ngaulun no ondo' lakat poyo nambayang ra naukop — bayang maawar, sukub, serban am ngaangai' bayang ra bokon — am pinapatir ilo ra ralalom ru rapuan ondo' bibilak.

²²Sabap ra raja' nangani' ra susuban maa' raginio rapuan no kinalasu' nasailan intor ra kaindalaman, apui no nonolob saboi minatoi saujor-saujor ondo' nampapatir ra talu ngaulun no ra ralalom ru rapuan.

²³I Sadrak, Misak am i Abidnigo ondo' nabangkil no naratu' ra ralalom ru rapuan ondo' bibilak no.

²⁴Pulusat ru Raja' Nibukadnijar minigor sabap ra nakatigog am nangkuot ra pagawai-pagawai nano, “Sala' ka kia binangkil takau talu ngaulun am pinapatir ra ralalom ru rapuan ondo' bibilak no?” Taam ilo, “Motopot, raja' mai.”

²⁵Pangkuot raja', “Kaa' kua kia nakito ku apat ngaulun mugar-ugar ra tatanga' ru apui no? Kalo binangkil ilo, am ilain ra kalo napilatan ilo. Ulun kaapat no koson ra malaikat baal nano.”[3]

²⁶Inggaari' boo ru Raja' Nibukadnijar kulobon ru rapuan no am indagu, “Sadrak! Misak! Abidnigo! Ulipon-ulipon ri Aki Kapuuno' Ondo' Masawat Kaga', ingkual no!” Ilo pana miningkual ra mataki'.

²⁷Ngaangai' raja', gabenor, tingganai ru libung am pagawai-pagawai ra bokon timinimung koson magilong ra talu ngaulun ondo' kalo nosolob ru apui no. Abuk nilo kalo nosolob, bayang nilo kalo nosolob, am poyo ilo pana kalo moowou ra lisun.

²⁸Indagu boo raja', “Koompor noyo i Aki Kapuuno' ondo' sambaan ri Sadrak, Misak am i Abidnigo! Nanusub Io ra malaikat koson mamayag ra ulun ondo' mangandoi ayuk am mangintopot Riso. Minanggal ilo ra susuban kuno am baani matoi intor ra migulatur samba ra dewa ra bokon ondo' ak am i Aki Kapuuno' nilo.

²⁹“Raino rongogo' raguon kutu: Osoi ayuk intor ra bansa', bansa' boborok kapoam ragu ra atan ayuk ondo' magasab ri Aki Kapuuno' ri Sadrak, Misak am niayuk i Abidnigo, puputulon, am baloi nano gabaan am saukon ra tuntur ru nalunsai. Kolondo' dewa ondo' makapambaal ra ondo' binaal ri Aki Kapuuno' nilo.”

³⁰Kopongo raginio kinasawat ru raja' pangkat ri Sadrak, Misak am i Abidnigo giu' ra wilayah Babil.