Read Timugon Murut I DANIL AM DEWA BEL AM TAMBUAKAL BABIL 1 Bible Online

I DANIL AM DEWA BEL AM TAMBUAKAL BABIL 1 - Timugon Murut bible

I DANIL AM DEWA BEL AM TAMBUAKAL BABIL 1

¹Kopongo Raja’ Astiagis minatoi, pamarintaan nano tinalison ri Koris, ulun ru Pirsia.

²I Danil iono maminson ra raja’ ondo’ minayan giu’ ra istana am ondo’ urumaton toojo intor ra rangan-rangan nano.

³Ulun ru Babil mokoondo’ rondo’ sinungkalalaing ondo’ sabiton ri Bel, am koson ra pakuan nano ra moonong orou mangingkual ilo mopor am ruo ngagantang tapung moonsoi kaga’, apat ngoopor ngainan domba am ruo ngaatus ngalito wain.

⁴Mangintopot Raja’ Koris ra Bel no dewa, am moonong orou mongoi io samba riso. Kaa’ nagulayun i Danil sumamba ri Aki Kapuuno’ nano galama’.

⁵Paat ra sangarawan nangkuot raja’ ri Danil, “Kua rirun kalo sumamba ri Bel?” Taam i Danil, “Sabap ra kalo sumamba aku ra sinungkalalaing binaal ru ulun, kaa’ i Aki Kapuuno’ ondo’ naayag, ondo’ nambaal ra limbowon am tana’ ti am makakuasa’ ra ngaangai’ ondo’ naayag.”

⁶Pangkuot raja’, “Ginio ra okou kalo mangintopot ra i Bel noyo i aki kapuuno’ ondo’ naayag? Kalo kia nakakito kou kula’ suang ru akanon am inumon ondo’ koyoon nano ra moonong orou?”

⁷Kaa’ nakakurit i Danil am indagu, “Pai’ kasaga’ ruungon, okou raja’. Io ondo’ sabiton ra Dewa Bel no sinungkalalaing ayuk ru tana’ labu’ inangkupan ra tambaga’ ralimbou nano. Kalo igondo’ io mangakan kapoam manginum ra atan pana.”

⁸Norongog ginio, siminangit kaga’ raja’. Piniau no imam-imam ru dewa Bel. Suang nilo tulu’ ngoopor ngaulun, kalo poyo nakasimpung anak andu’ nilo. Indagu raja’ ra imam-imam no, “Painonoo’ raki’ ra ngaangai’ akanon pinasulung inakan ru Dewa Bel. Amon ru kalo makainono’ min ginio, ukumin kau ra matoi. Kaa’ amon ru maalap, i Danil ukumin ra matoi, sabap ra nagasab ri Dewa Bel.” Nangiou i Danil ra rinagu ru raja’.

¹⁰Raja’ pana nabaya’ ri Danil minongoi ra kuil Bel.

¹¹Giu’ no indagu imam-imam ra raja’, “Moonsoi mingkual akai maa’ raginio okou raja’ galama’ mampasulung ra akanon giu’ ra rasawat ru mija’ taak simbalui am mampasulung ra wain nano. Mopongo raginio angabin mu kulobon am saapin ra segel ru pamarintaan.

¹²Paat ra okou sumaguli’ ra susuab no am makakito ra i Bel kalo makakai’ ra ngaangai’ no, ukumin akai ra matoi. Kaa’ amon makakai’ io ra ngaangai’ no, i Danil musiti’ matoi sabap ra nanguu’ ra kalo motopot intor ramon.”

¹³Imam-imam no kalo magalabo sabap ra nambaal ilo ra kulobon nasibuni giu’ ra ragana’ ru mija’ ru taak simbalui. Moonong rondom sumubol ilo ra kuil maya’ ra kulobon raginio am mangai’ ra ngaangai’ akanon pasulungon.

¹⁴Pakaingkual imam-imam no, nampasulung raja’ ra akanon ri Bel. Panusub boo i Danil ra ulun-ulun mangindangan riso magibit ra kaau am patauko’ ra ngaangai’ sulig ru kuil. Raja’ ayuk nakakito risilo nambaal raginio. Kopongo ginio miningkual ilo. Kulobon kinaput am sinaapan ra segel ru pamarintaan, am ugar ilo.

¹⁵Rondom raginio koson ra kaindalaman imam-imam nababaya’ ra anak andu’ nilo siminubol ra ralalom ru kuil minaya’ ra kulobon nakasibuni am nangai’ ra ngaangai’ akanon am wain.

¹⁶Suabon no riminondom raja’ minatong nabaya’ ri Danil.

¹⁷Pangkuot raja’, “Lakat poyo kia moonsoi segel no?” Taam i Danil, “Lakat poyo moonsoi, raja’ kuno.”

¹⁸Kaukabi’ ayuk kulobon, inilayan ru raja’ giu’ ra mija’ ru taak simbalui ondo’ naliung-liung am nompogolok, “Totopot maayo kou, Bel! Kolondo’ pamparuungan ra atan pana rirun!”

¹⁹Kaa’ nakakurit i Danil am nanginggalar ra raja’ sumubol. Kono, “Ilai’ sulig. Nakapandai kou raja’ kia ra babaya’ ru kalayam ri osoi ginio?”

²⁰Taam raja’, “Ginio babaya’ ru kalayam ru ungkuyon, ruandu’ am lalaing-lalaing.”

²¹Siminangit io kaga’ am nanusub maa’ raginio imam-imam am anak andu’ nilo rokopon. Ilo pana nanulu’ riso ra kulobon nakasibuni ondo’ bayaan nilo moonong rondom koson mangakan ra akanon pinasulung ondo’ patampakon giu’ ra mija’ ru taak simbalui.

²²Kopongo raginio nanusub raja’ maa’ raginio imam-imam pinatoi. Pinataak ru raja’ i Bel ri Danil ondo’ nanutuk ra sinungkalalaing no am niayuk kuil no.

²³Mokoondo’ sanginan tambuakal maayo ondo’ sambaan ru ulun Babil.

²⁴Paat ra sangarawan, indagu raja’ ri Danil, “Kalo maalap mu ra imbuali ra io i aki kapuuno’ ondo’ naayag. Ginio ra samba no riso!”

²⁵Taam i Danil, “Sambaan ku ayuk Tuhan i Aki Kapuuno’ kuno. Io ayuk i Aki Kapuuno’ ondo’ naayag.

²⁶Amon ru mangiou kou raja’, tambuakal no potoyon ku ra kalo manangilang kapoam tataun lalamba’.” Indagu raja’, “Iou noyo, iowon ku.”

²⁷Alapo’ boo ri Danil tiir, lomok am abuk. Ngaangai’ no sinauk no ra kuui-kuui ondo’ mapungol am pinasuu’ ra kabang ru tambuakal. Ngaangai’ no inakan koyoo’ ru tambuakal saboi io liminaput. Indagu boo i Danil, “Ilai’, ginio noyo sambaan ru ulun Babil!”

²⁸Nokorongog ra baal raginio, ulun-ulun ru Babil siminangit kaga’ am giminuor ra raja’. Golok ilo, “Raja’ nasauk noyo ra ulun ru Jaudi! Pinatoi no noyo imam-imam am nanutuk ri Bel. Raino pinatoi no tambuakal no!”

²⁹Minuma’ ilo ra raja’ am indagu, “Pataako’ i Danil ramon! Amon ru kalo, akau sambaloi potoyon mai!”

³⁰Nalimanan ru raja’ ra najajalan io saboi nampataak kalalaat ri Danil risilo.

³¹I Danil pana pinatiran ra ralalom luang ru singa’ am tinatang ra giu’ buoi onom ngoorou.

³²Giu’ ra luang no mokoondo’ tulu’ ngainan singa’, am moonong orou singa’-singa’ no pakanon ra ruo baangkai ru ulun am ruo ngainan domba. Kaa’ buoi onom ngoorou no bibiag-bibiag no kalo pinakan ra atan pana maa’ raginio mansaam ri Danil.

³³Paat raginio mokoondo’ sangulun nabi giu’ ra pagun Judia ondo’ ininggalanan ri Abakuk. Bagu io ayuk nangansak ra linusou am pinatapung putul-putul ru ruti’ ra ralalom ru mangkuk. Io pana masaga’ mangator ra linusou no ra ulun-ulun ondo’ tatanga’ mangkumos ra gandum giu’ ra umo.

³⁴Kaa’ giu’ ra tanga’ ralan malaikat ru Tuhan minindagu riso, “Ibito’ akanon no ra Babil am pataako’ ri Danil giu’ ra luang ru singa’.”

³⁵Taam i Abakuk, “Tuan, kalo igondo’ aku minongoi ra Babil am kalo nakapandai ati luang ru singa’ no.”

³⁶Malaikat pana nampaguut ra abuk nano am nagibit riso ra Babil minaya’ ra kinapuor ru angin.[1] Kopongo raginio patuuno’ no i Abakuk giu’ ra mamaar ra luang ru singa’.

³⁷Golok i Abakuk, “Danil, Danil! Gitio akanon ondo’ inataran ru Tuhan rirun. Alapo’!”

³⁸Nokorongog raginio pakiasi’ i Danil, “Iou Aki Kapuuno’, nangkara’ Kou raki’. Kalo igondo’ Kou pangiruan ra ulun ondo’ motogom rirun.” Io pana miningkakat am nangakan ra akanon no.

³⁹Paat raginio niayuk i Abakuk inibit ru malaikat ri Aki Kapuuno’ siminaguli’ ra intok nano.

⁴⁰Paat orou ra katulu’ minatong raja’ koson manulaboi ri Danil. Pakasaboi io giu’ ra luang am nagilong ra ralalom, ilai’ no i Danil nanturung ra giu’.

⁴¹Golok boo raja’, “Iou Tuhan, i Aki Kapuuno’ ri Danil, totopot maayo Kou! Okou ayuk i Aki Kapuuno’!”

⁴²Io pana nanusub maa’ raginio i Danil paingkualon intor ra luang, kaa’ ulun-ulun ondo’ masaga’ mamatoi ri Danil, pinapatir no giu’ ra ralalom no. Paat raginio niayuk giu’ ra talupak ru mato ru raja’, sinaam ilo ru singa’-singa’ no.