Read Timugon Murut GOSIA 1 Bible Online

GOSIA 1 - Timugon Murut bible

GOSIA 1

¹Gitio noyo tanou ondo' pinataak ru TUHAN ri Gosia anak ri Biiri paat ra Raja' Ujia, Raja' Jotam, Raja' Agas am Raja' Gijkia nasauk ra raja' giu' ra Jiuda, am Raja' Jirobiam anak ungkuyon ru Raja' Jigoas masauk ra raja' giu' ra Israil.

²Paat ra TUHAN mindagu ra Israil ra kainsaa' ondo' pinabala' galing ri Gosia, indagu Io, “Anduo' sangulun ruandu' ondo' masaga' mantalan ra inan; am anak-anak muno niayuk masauk koson riso. Ulun Kuno mogondo' ra andu' muno; kalo gumagaya' ilo Raki' am nangiruan noyo Raki'.”

³Ginio ra inandu' ri Gosia i Gomir anak ri Diblaim. Maapang i Gomir, am naganak ra sangulun anak ungkuyon.

⁴Indagu TUHAN riso, “Inggalani' anak no ri ‘Jijriil’, sabap ra kalo boo mabuoi mangukum Aku ra raja' ru Israil koson mambalos ra pamatayan ondo' binaal ru kinamatuaan nano, i Jigu, giu' ra Jijriil[1] Pupusin Ku pamarintaan ru papag ri Jigu[2] giu' ra Israil.

⁵Paat raginio giu' ra Limayak Jijriil, tutukon Ku kuasa' ru saujor ru Israil.”

⁶I Gomir pana maapang poyo am naganak sangulun anak ruandu'. Indagu TUHAN ri Gosia, “Inggalani' anak raginio ‘Kalo Tagamin’,[3] sabap ra kalo boo makaasi' Aku kapoam mangampun ra bansa' ru Israil.

⁷Kaa' makaasi' Aku ra bansa' ru Jiuda. Aku, TUHAN, i Aki Kapuuno' nilo mamayag risilo, kaa' sala' ka ra pamulunsaran — sala' ka ra ilang, kapoam busur am panah, kapoam kuda am ulun mangura' nano.”

⁸Pokolonggo' ra tumiti' anak ondo' ininggalanan “Kalo Tagamin”, maapang poyo i Gomir am naganak sangulun anak ungkuyon.

⁹Indagu boo TUHAN ri Gosia, “Inggalani' io ri ‘Sala' ka Ulun Kuno’,[4] sabap ra ulun ru Israil sala' ka ulun Kuno, am Aku sala' ka i Aki Kapuuno' nilo.”

¹⁰Ulun ru Israil masauk ra masuang koson ra kinasuang ru agis giu' ra raat, kalo maalap kauntob kapoam tukuon. Raino mindagu i Aki Kapuuno' risilo, “Akau sala' ka ulun Kuno, kaa' masaboi paat no ra mindagu Io risilo, “Aku noyo i Aki Kapuuno' ondo' naayag am akau noyo anak-anak Kuno.”

¹¹Ulun ru Jiuda am ulun ru Israil pasimpungon saguli'. Mampalantik ilo ra sangulun tingganai ra tayar ru bansa' nilo; igondo' poyo masauk ilo ra makasingkot am langkaya' giu' ra pagun nilo. Sotopot no orou ru Jijriil[5] masauk ra orou maayo!

¹²Ginio ra piawo' akau po ngai' ulun ru Israil, ra inggalan “Ulun Kuno”[6] am “Tagamin”.[7]